Internet jelisin kimder qoldanady?
International Telecommunications Union deregi boıynsha, álemde 48% ınternet qoldanýshysy bar. Bul degenimiz álemniń túkpir-túkpirinde ınternettiń kómegimen túrli jaǵdaıdaǵy máseleler sheshimin taýyp jatyr degen sóz. Rasynda bir ǵana batyrma arqyly qajet dúnıeńizdi alasyz, barar jerińizdiń bıletine deıin daıyn turady. Bul onlaın qyzmetterdiń birnesheýi ǵana. Al ómir súrý deńgeıin jeńildete túsetin ınternettiń ıgiligi qanshama?!
Statıstıkaǵa súıensek, ınternet qoldanýshy memleketter tizimine jalpy 182 memleket engen. Bul kóshte eń birinshi orynda – Qytaı Halyq Respýblıkasy tur. Atalǵan elde 772 mln ınternet qoldanýshysy ǵalamtordyń ǵalamatyn túrli jaǵdaıda kórip otyr. Internet qoldanýshy memleketterdiń ondyǵynda qytaılyqtardan ózge Úndistan, AQSh, Brazılııa, Indonezııa, Japonııa, Reseı, Nıgerııa, Meksıka, Bangladesh syndy elder bar. Al Qazaqstan bul reıtıngte 40-orynda. Statıstıka dereginshe, elimizde
14 023 856 ınternet qoldanýshysy bar. Iá, búginde elimizde ınternet qoldanýshylar qatary qarqyndy ósip keledi. Osy oraıda «Sıfrly Qazaqstan» memlekettik baǵdarlamasy aıasynda elimizde halyqty joǵary jyldamdyqty ınternetpen qamtamasyz etý jáne aýyl men qala arasyndaǵy sıfrly teńsizdikti azaıtý máselesi bir jolǵa qoıylyp keledi. Atalǵan joba arqyly elektrondy saýda-sattyqty jandandyrý, elektrondy úkimet qyzmetterin jáne bilim berý, densaýlyq saqtaý salalaryndaǵy ınteraktıvti quraldardy engizý sharalary el damýyna eleýli áleýmettik-ekonomıkalyq serpin berýde. Qazirdiń ózinde nátıjeler kóńil qýantady. «Elektrondy úkimet» portalynyń jyldyq jumysynyń qorytyndysy boıynsha 2018 jyly 30 mln-nan astam elektrondy formatta qyzmet kórsetilip, portalǵa 8 mln-nan astam adam tirkelgen. BUU zertteý qorytyndysynda «Elektrondy úkimettiń» damý deńgeıi boıynsha Qazaqstan 39-orynnan kórindi. Bul – óte joǵary kórsetkish.
Qazaqstandyqtar ınternetti qandaı maqsatta qoldanady?
Internet jyldamdyǵyna sáıkes, jyl saıyn onlaın qyzmetke júginýshilerdiń qatary kóbeıip keledi. Statıstıka komıtetiniń málimetinshe, 2007 jyly taýarlardy satý jáne satyp alý qyzmetine halyqtyń 4,7% -y adam júginse, 2018 jyly bul kórsetkish 36,8%-dy kórsetken. Sol sııaqty aqparat izdestirý, habarlamalar almasý qyzmetteri 2007 jyly 71,8% bolǵan bolsa, 2018 jyly 75,4 %-ǵa jetken. 12 jyl aralyqta bul qatarǵa túrli qyzmetter enip otyrdy.
2018 jylǵy derek boıynsha qazaqstandyqtar ınternetti 5 negizgi maqsatta qoldanady. Derekke súıensek, ınternet qazaqstandyqtar úshin eń aldymen aqparat ornalastyrý jáne habarlama almasý (75,4%) úshin qajet. Al ekinshi kezekte áleýmettik jelige kirý úshin qajet bolatyn kórinedi. О́ıtkeni bul qyzmet úshin úles 69,7%-dy quraıdy. Al fılm kórý, sýret júkteý, mýzyka tyńdaý jáne túrli onlaın oıyndar oınaýǵa ınternet qoldanýshylarynyń 63,3 %-y qyzyǵady. Tórtinshi kezekke elektrondy saýda-sattyq qyzmeti kirip otyr. Iаǵnı 36,8% adam ınternet arqyly qajet taýaryn qalaǵan ýaqytynda, ózi tańdaǵan baǵaǵa alyp, keregine jaratyp júr degen sóz. Al besinshi kezekte ınternet qoldanýdyń qajettiligi elektrondy poshtamen hat almasý úshin kerek bolady. Bul qyzmet úshin úles 32,6%-dy kórsetti. Mine, osylaısha qazaqstandyqtar kúndelikti atalǵan 5 negizgi maqsatta ınternet jelisin qajet etedi. Iá, ınternettiń ıgiligin búginde eńbektegen baladan eńkeıgen qartqa deıin kórip otyrǵany ras. Tehnologııanyń san alýan túrin san qıly ortada qoldaný arqyly kópshiliktiń qoly kópke jetip otyr.
