Raıymbek aýdanynyń bir artyqshylyǵy, mereıli toılar kezinde sýretshi Nurbolat Ysqaqovtyń salǵan sýretterinen únemi kórme uıymdastyryp otyrady. О́ıtkeni sýretshiniń búkil shyǵarmashylyq álemi týǵan el men jerge, sol ólkeden shyqqan dara tulǵalarǵa arnalǵan.
Jalpy, N.Ysqaqovtyń jyldap salǵan, kóziniń qarashyǵyndaı arnaıy jınap qoıǵan shyǵarmashylyq álemine kóz toqtatpaı ketý múmkin emes. Respýblıkamyzdyń eń kórikti jerleriniń biri, alys-jaqyn shetelderden arnaıy qyzyǵyp kelip kórip jatatyn áıgili Hantáńiri shyńy aǵamyzdyń qylqalamynda neshe túrli kelbetimen kóz tartyp turǵanda, maqtanysh sezimine shyn berilip ketesiń. Hantáńirimen qosa, osynaý syrly da nurly ólkeden shyqqan Muqaǵalıdaı aqıyq aqynymyz bar. Nurbolat Ysqaqovtyń shyǵarmashylyǵynda shaıyr beınesi shynaıy kórinis tapqan. Aqynnyń tereń oıly ári shabytyna berilgen sátteri qylqalamnyń qudiretimen óte ózgeshe kórsetilgen. Aýylda turatyn sýretshi bul úshin qanshama ýaqytyn, saǵattarǵa sozylǵan kúnderi men túnderin jumsady deseńizshi?! Iá, bul úlken eńbek, úlken dúnıe.
Eńbegine qaraı azdy-kópti ataqqa qol jetkizgeni bolmasa, qarapaıym sýretshi Narynqol aýylynan esh uzaǵan emes. Bıyl kóktemde ǵana zeınet demalysyna shyqqan óner ıesi orta mektepti támamdaǵan soń, Almaty qalasyndaǵy kórkemsýret ýchılıshesin keskindeme mamandyǵy boıynsha bitirip, sodan bergi ýaqytta B.Soqpaqbaev atyndaǵy orta mektepte oqýshylarǵa sýret páninen dáris berip keldi. Shákirtterine úıretkeni kóp, usynǵany jeterlik. Búginde Nur-Sultan qalasynda turatyn belgili sýretshi, Almas Syrǵabaevtaı shákirtinen bastap, Maqpal Dildaeva, Farhat Sartbaev, Aqylbek Shákenov, Alýa Ánýarqodja, Núsip Sultan, Raýan Baqtııar, Mádı Kenjebek sekildi shákirtteri bolashaǵynan úmit kúttiretin sýretshiler.
Iá, Nurbolat Ysqaqov zeınetkerlik jasyna kelgenshe aıtarlyqtaı eńbek etken jan. Jap-jaqsy shyǵarmashylyq álemi bar. Almaty qalasynda eki dúrkin shyǵarmashylyq kórmesin ótkizgen Nurekeńniń Á. Qasteev atyndaǵy respýblıkalyq murajaıda «Jaılaýǵa avtoklýb keldi» atty týyndysy turǵanyn da aıta ketkenimiz jón.
Jalpy, Raıymbek pen Kegen aýdandary tarıhı qundylyqqa toly óńir. 1916 jylǵy ult-azattyq kóterilisiniń bir oshaǵy Qarqara jerinde tutanǵany belgili. Nurbolat Ysqaqovtyń biraz dúnıesi dál osy Qarqara kóterilisine arnalǵan. Onyń syrtynda halyqtyń uranyna aınalǵan has batyr Raıymbek babamyz jóninde sýretteri de barshylyq. Ásirese batyr babamyzdyń Kókmoınaǵymen berilgen sýreti áserli shyqqan. Ras, batyr babamyzdyń óz tusynda Ile ózenin keship ótkeni týraly ańyz áńgimeler barshylyq. Sýretshi óziniń «Ile boıynda» atty týyndysynda batyr babamyzdyń joryǵyn bir qyrynan kórsete bilgen. Kenepke maıly boıaýmen sýret salatyn aǵamyzdyń birqatar shyǵarmashylyǵy Táýelsizdigimizge, Jeltoqsan kóterilisine arnalǵan. Al týǵan jerdiń tamasha tabıǵatyn móldirete tizgen tańǵajaıyp týyndylary óz aldyna jeke álem. Olardy kórip bir qýanyp, bir kóterilip sala beresiń. Sol tusta týǵan ólkeni kórkem de kórnekti shyǵarmalaryna arqaý etip júrgen sýretshi aǵamyzǵa degen rızashylyǵymyz arta túsedi.
«Kanıkýlǵa ketip baramyn» dep alǵashqy sýretin salǵan sýretshi bul kúnde ultymyzdyń tarıhı taǵdyry týraly qundy dúnıesin salýmen aınalysyp jatyr. Bul jumyspen shuǵyldana bastaǵanyna ekinshi jyl ótipti.
Nurbolat Ysqaqov shyǵarmashylyǵynan bólek, otbasynda da ónegeli, syıly adam. Jubaıy Baljan Omarova bar ǵumyryn ustazdyqqa arnaǵan, kóp ýaqytyn mektep basqarý isine jumsaǵan ulaǵatty ustaz. Raıymbek aýdanynyń qurmetti azamaty, Y. Altynsarın atyndaǵy medaldyń ıesi. Erli-zaıypty ekeýi Asqar, Maqpal, Raýshan, Nursultan sekildi uldary men qyzdaryn qanattandyrǵan.
– Zeınet demalysyna shyqqan soń tek qana shyǵarmashylyqpen aınalysýdy qaladym. Alda turǵan isterim kóp. Qazaqstan Respýblıkasy Sýretshiler odaǵynyń tarapynan da túsip jatqan usynystar az emes. Ne deıin, mynandaı tamasha tabıǵaty bar el men jerdi shamamnyń kelgeninshe sýretteı bereıin. Bizdiń ólke ólmes jyr men ánge, sýretke laıyqty jer. Men týǵan aýylymdy, atamekenimdi janymdaı jaqsy kóremin. Sol úshin de bir sát te alys uzaǵym kelmeıdi. Densaýlyǵyma qaramastan, Shoǵansaı óńirinen Hantáńiri shyńyn jaqyn jerden kórýge barǵanymdy umytpaımyn. Onyń maǵan bergeni kóp, –deıdi Nurbolat aǵamyz.
Shalǵaı aýylda turatyn búkil eli-jurty biletin sýretshiniń ómir joly osyndaı.
Qanat BIRJANSAL,
jýrnalıst
Almaty oblysy
