Bul joba bastalǵan kezde Qaratóbe aýdanynda turatyn 14 pen 29 jas aralyǵyndaǵy azamattardan 78 áleýmettik joba usynylǵan eken. Nátıjesinde jalpy quny 36 mln teńge bolatyn 18 áleýmettik joba jeńimpaz atandy. Sonyń 1 mln teńgesi Gúlsezimniń jobasy – «Manas» klınıng (kilem, as úı jıhazdaryn hımııalyq tazalaý) ortalyǵyna tıdi.
– Osy jobaǵa qatysý úshin barynsha daıyndaldym. «Zhas Project» jobasy bizden buryn ótken Qyzylorda, Aqtóbe oblystaryndaǵy áriptesterimniń tájirıbesimen tanystym. Sonyń ishinde hımııalyq tazalaý oryndaryn ashqan jastar bar eken. Aýyldyq jerde kilem, jumsaq jıhaz tazalaıtyn jer joq qoı. Osy jobany aýyl jaǵdaıyna beıimdep, ózimshe usyndym, – deıdi Gúlsezim.
Gúlsezim Tabıǵatqyzynyń mamandyǵy – tehnık-programmıst. Buryn aýyl ákimdiginde jetekshi maman bolyp ýaqytsha qyzmet etken. Odan keıin balabaqshada qoımashy boldy. Otbasynda úsh balasy bar eńbekqor ananyń qol qýsyryp qarap otyrýǵa jany qas. «Zhas Project» jobasynan habar kelgende janyp túskeni sodan.
Árıne, shaǵyn aýylda stasıonarlyq tazalaý ornyn ashyp, jeke kásip etý qıyn ǵoı. Sondyqtan Gúlsezim belgili «Karcher» fırmasynyń kilem, jumsaq jıhaz, ydys-aıaq tazalaıtyn mobıldi apparattaryn alǵandy jón kórdi.
Biz Gúlsezim týraly Aqparat jáne qoǵamdyq kelisim mınıstrliginiń qoldaýymen júrgizilip jatqan «Eńbekqor jastar» aqparattyq sharasy arqyly bildik. Gúlsezim sııaqty eńbekqor jastar kóbeıse, aýyldyń da tynys-tirshiligi jaqsara túser edi-aý degen oıǵa keldik.
Batys Qazaqstan oblysy
