Qoǵam • 01 Qazan, 2019

Bıyl qazaqstandyq jáne sheteldik áýe kompanııalary 7 halyqaralyq reıs ashty

42 ret kórsetildi

PrimeMinister.kz-ke bergen suhbatynda Indýstrııa jáne ınfraqurylymdyq damý mınıstrliginiń Azamattyq avıasııa komıteti tóraǵasynyń orynbasary Aıbek Áljanov tranzıttik avıa tasymaldar salasyn damytý týraly aıtyp berdi. Bul týraly PrimeMinister.kz habarlady. 

A. Áljanovtyń aıtýynsha, halyqaralyq tasymaldardy damytý salasynda turaqty ósim baıqalýda. 2013 jyly 73 baǵyt boıynsha ushqan bolsa, 2019 jyly 99 baǵytqa deıin ulǵaıdy.

Indýstrııa jáne ınfraqurylymdyq damý mınıstrliginiń Azamattyq avıasııa komıteti normatıvtik-quqyqtyq bazany qurý jáne tolyqqandy yntymaqtastyq ornatý boıynsha basqa eldermen únemi kelissózder júrgizip turady.

2019 jyldyń basynan beri qazaqstandyq jáne sheteldik áýe kompanııalary 7 baǵyt boıynsha halyqaralyq reısti ashty: «Nur-Sultan – Praga», «Nur-Sultan – Ulan-Batyr», «Almaty – Baký», «Jýkovskıı – Qaraǵandy», «Jýkovskıı – Kókshetaý», «Jýkovskıı – Petropavl», «Nur-Sultan – Ulan-Batyr» jáne «Nur-Sultan – Tokıo».

Búginde ishki baǵyttar boıynsha 8 áýe kompanııasy 54 ishki reısti oryndaıdy.

Sonymen qatar, bıyl Reseı Federasııasynyń Kólik mınıstrligimen «Nur-Sultan – Máskeý» baǵyty boıynsha Air Astana jáne Aeroflotpen úlestes emes, ekinshi tasymaldaýshylardy taǵaıyndaý arqyly ushý jıiligin ár taraptan aptasyna 12-den 21-ge deıin ulǵaıtý boıynsha ýaǵdalastyqqa qol jetkizildi. Qazaqstandyq taraptan SCAT áýe kompanııasy taǵaıyndaldy.     

«Buǵan deıin Air Astana kompanııasy aptasyna 14 reıs oryndasa, bıyl SCAT áýe kompanııasy 7 reıs qosty. Qazir kúnine atalǵan baǵytta 6-ǵa jýyq reıs oryndalady. Munyń barlyǵy jolaýshylar úshin bılet qunynyń tómendeýine yqpalyn tıgizedi», — dedi A. Áljanov.

Sonymen qatar alǵashqy ulttyq FlyArystan loýkosteri ushyryldy, qazir ol 6-ǵa jýyq baǵytta ushady. Bıyl jyl sońyna deıin taǵy eki borttyń qosylýy kútilip otyr, tıisinshe biz kóptegen baǵyttar boıynsha ushýlardyń artqanyn baıqaıtyn bolamyz. Jyl sońyna deıin Fly Arystan 1 mln-ǵa deıin joshaýshy tasymaldaıdy dep kútilýde. 2023 jylǵa deıin áýe kompanııasy 10-ǵa jýyq áýe kemesin alýy tıis. Sonyń nátıjesinde baǵdar jelisi 54 baǵytqa deıin artady.

«Jýyrda ǵana Nur-Sultan qalasynan Pavlodarǵa reıs ushatyny belgili boldy, munda bılet quny 999 teńgeden bastalady. Biz bul rette básekelestikti baıqap otyrmyz», — dedi Aıbek Áljanov.

Sonymen birge, qoldanystaǵy ushý-qoný jolaqtaryn rekonstrýksııalaý jáne jańalaryn salý, aerohab toraptaryn salý, áýejaı keshenderin damytý, Halyqaralyq azamattyq avıasııa uıymynyń talaptaryna sáıkes keltirý úshin aeronavıgasııalyq júıelerdi jańǵyrtý boıynsha sharalar kesheni qarastyrylatyn bolady. Atap aıtqanda, qosymsha halyqaralyq jáne tranzıttik baǵyttar ashyp, halyqaralyq reısterdi júzege asyratyn qazaqstandyq áýe tasymaldaýshylar parkin jańǵyrtyp, jańartýmen Nur-Sultan, Aqtóbe, Aqtaý, Almaty aerohabtary arqyly tranzıttiń servıstik ınfraqurylymyn damytý josparlanǵan.

Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar