Ekonomıka • 02 Qazan, 2019

«Qazatomónerkásip» aksııalary Ulttyq qordy toltyrdy

27 retkórsetildi

2016-2020 jyldarǵa arnalǵan jekeshelendirýdiń keshendi jos­paryna saı, «Samuryq-Qazyna» UÁQ» AQ London qor bırjasyna «Qazatomónerkásip» AQ aksııalaryn shyǵarý arqyly 128 mln dollar tapty. Bul týraly «Samuryq-Qazyna» AQ aktıvterdi basqarý jáne jekeshelendirý boıynsha atqarýshy dırektory Almasadam Satqalıev málimdedi.

2019 jylǵy qyrkúıektiń sońynda «Qazatomónerkásip» AQ  IPO-ǵa  3,8% jahandyq depozıtarıı qolhattaryn qosymsha ornalastyrǵan. Sonyń ishinde 1,86%-y London qor bırjasyna, 1,94%-y «Astana» halyqaralyq qor bırjasyna shyǵaryldy. Sonyń ishinde London qor bırjasynan 62,9 mln dollar tússe, «Astana» bırjasynan 65,2 mln dollar túsken.

«Jalpy, 9 mln 963 myń jahandyq depozıtarıı qolhat­taryn 13 dollardan shyǵarýdy kózdegen edik. Bul 2018 jyldaǵy IPO kezindegi alǵashqy bekitken baǵadan 11%-ǵa qymbat. Nátı­je­sinde 128 mln 219 myń dollar taptyq. Bul qarajattyń bári Ult­tyq qorǵa salynady», dedi Almasadam Satqalıev. 

Atqarýshy dırektordyń aıtýynsha, aksııa baǵasy naryqtaǵy qunyna saı boldy. Aksııany jedel satý kezinde ınvestorlarǵa belgili bir deńgeıde jeńildikter beriletini belgili. Qor ókilderi­niń pikirinshe, 13 dollar – ádil baǵa. Aksııa saýdaǵa shyqqan­nan keıin baǵanyń 12,9-13,2 dollar aralyǵynda terbelýi osyny kórsetedi.

Esterińizge sala keteıik, Úkimettiń jekeshelen­dirý naýqanyna saı, «Qazato­móner­kásip» kompanııa­sy aksııasynyń 25 paıyzyn bırjaǵa shyǵarý josparlanǵan edi. Qazirgi tańda 15 paıyz aksııa satylymǵa tústi. 3,8 paıy­zy ABB ádisimen naryq­qa shy­ǵa­ryl­dy. Qalǵany aldaǵy ýaqytta saýdalanbaq.

Atqarýshy dırektordyń aıtýynsha, kompanııadan úles alýǵa ınstıtýsıonaldy ınvestorlarmen qatar jekelegen saýdagerler de qyzyǵýshylyq tanytyp otyr. Jalpy, búginge deıin kompa­nııa aksııalaryn satyp alǵandar­dyń arasynda qazaqstandyq ınvestorlar da bar. «Máselen, jahandyq depozıtarıılerdiń 6,5 mln danasyn sheteldik ınvestorlar satyp alsa, 3,3 mln danasyn otandyq ınvestorlar satyp alǵan.

Jalpy, ınstıtýsıonaldy ınvestorlardyń 20-sy otan­dyq uıymdar. Sheteldik ınves­torlar­dyń qatarynda BlackRock, Morgan Stanley, Wellington se­kil­di ınvestısııalyq qorlar men hedj qorlar bar. Sıngapýr úki­meti de otandyq kompanııadan úles alǵan eken. Sheteldik ın­ves­torlardyń uzyn sany qazirgi tańda 40-qa jetti. Olar negizinen AQSh, Kanada sekildi alpaýyt elderge tıesili. Bul jahandyq naryqtyń Qazaqstan ekonomıkasyna úlken senimmen qaraıtynyn kórsetedi», dedi A.Satqalıev.

Sońǵy jańalyqtar

Basty aqparat (19.02.2020)

Vıdeo • Keshe

Basylym basshylary - Nurlan ORAZALIN (1947)

Basylym basshylary • Keshe

Jaqsylyq júrek jylytady

Qazaqstan • Keshe

Erikti jastar erkin formatta pikir almasty

Ońtústik Qazaqstan • Keshe

Uqsas jańalyqtar