О́skemen qalasyndaǵy áskerı bólimge Halyq qaharmany polkovnık Qasym Qaısenovtiń esimi berildi.
Ofıser Qaısenov I jáne II dárejeli Otan soǵysynyń, «Chehoslovakııa partızandary» ordenderimen, jaý tylynda partızandyq urysty júrgizip, 60 adamnan quralǵan partızandyq jasaqty qurǵany úshin III dárejeli «Bogdan Hmelnıskıı» ordenimen nagradtalǵan. Surapyl soǵystan keıin Qasym Qaısenov Otanǵa oralyp, Qazaq KSR Joǵary Keńesiniń Prezıdıým apparatynda, «Jazýshy» jáne «Qaınar» baspalarynda qyzmet etti. Soǵystan keıingi aýyl sharýashylyǵyn qalpyna keltirý jumysyna qatysty. Qasym Qaısenov – Uly Otan soǵysyndaǵy qıyn-qystaý kezeńder men qarapaıym jaýyngerlerdiń erlikterin shynaıy baıandaıtyn kóptegen shyǵarmalardyń avtory. Olardyń ishinde «Jas partızan», «Partızan soqpaqtary», «Ajal aýzynda» syndy tanymal týyndalary, sondaı-aq orys, ýkraın jáne basqada tilderge aýdarylǵan áńgimeler men ocherktary bar. Batyrdyń qurmetine О́skemen qalasynda eskertkish ornatylyp, esimimen kóshe atalyndy, Ulan aýdanynyń ákimshilik ortalyǵy Qasym Qaısenov kenti dep ózgertildi.
Taraz qalasyndaǵy áskerı bólimge general-maıor Shákir Jeksenbaevtiń esimi berildi.
Uly Otan soǵysynda Jeksenbaev batys baǵytyndaǵy áskerde qyzmet etip, 3-shi Brıan armııasynda, ońtústik-batys maıdanynda, keıin 2-shi Prıbaltıkalyq maıdanynda hımııalyq qorǵaý bóliminiń bastyǵy laýazymyn atqardy. 1943 jyly 14 qazanda Jeksenbaevqa tehnıkalyq bólimniń general-maıor áskerı ataǵy berilip, Otan soǵysynyń I dárejeli ordenimen, keıin jaýyngerlik qyzmeti úshin Lenın jáne Qyzyl juldyz ordenderimen nagradtaldy. Zulmat soǵys aıaqtalǵannan keıin general Jeksenbaev hımııalyq qarý jáne qurlyq áskerlerin jabdyqtaý basqarmasynda qyzmet etip, V.Kýıbyshev atyndaǵy Qyzyl týly áskerı-ınjenerlik akademııasynda áskerı-hımııalyq jumys jóninde tálim berdi.
Áskerı bólimderge otandas-batyrlardyń esimin berýge bólimderdegi áskerı qyzmetshilerdiń jeke quramy bir aýyzdan qoldady. Qazaqstandyq armııanyń jaýyngerlik dástúrin saqtap qalý men Otan qorǵaýshylardyń esimin dáripteý ıdeıasyn Qorǵanys mınıstriliginiń basshylyǵy qoldady.
