Bıylǵy jyly onynshy ret ótken forýmǵa úsh júzge jýyq zańger, Joǵary sot ókilderi men tıisti mınıstrlikterdiń mamandary, sheteldik zańgerler qatysty.
Eki kúnge sozylǵan forým jumysynda bes seksııa boıynsha mamandar salalyq máselelerdi talqylady. Forýmnyń alǵashqy kezeńinde «Atameken» UQP Basqarma múshesi, Basqarma tóraǵasynyń orynbasary Rýstam Júrsinov elimizdegi kásipkerlik ahýalǵa qatysty baıandama jasasa, Joǵary sottyń mamandandyrylǵan sot alqasynyń Tóraǵasy Aıgúl Qydyrbaeva zańgerlik qoǵamdastyq qalyptastyrýdyń erekshelikteri týraly atap ótti.
«Atameken» UKP Zańnama jáne ózin-ózi retteýdi damytý departamentiniń Basqarýshy dırektory Laýra Mersalımovanyń aıtýynsha, zańnamalardy jetildirý men kásiperler úshin bıznes klımatty jaqsartýǵa baılanysty sońǵy alty jylda ákimshilik kedergilerdi joıý, kásipkerlerdiń qarjylyq shyǵyndaryn azaıtýǵa baılanysty, kóptegen ister atqaryldy. Búginde zańnamaǵa ózgerister engizýge baılanysty memlekettik organdar tıisti jumystar júrgizýde, onyń ishinde bıznes klımatty jaqsartýmen qatar ákimshilik kedergilerdiń qaıtalanbaýy úshin arnaıy tolyqtyrýlar usynylyp otyr. Sondaı-aq kásipkerlikti júrgizý men damytýǵa tikeleı yqpal etetin mańyzdy qujattar ekologııa, densaýlyq salasyna qatysty zańnamalarǵa ózgerister engiziletin bolady. Búginde kásipkerlerdi alańdatatyn máseleler arnaıy reestrde tirkelgen. Sondyqtan da kez kelgen kásipker saıt nemese áleýmettik jelilerdegi paraqshalar arqyly ózine qajetti aqparattardy alyp, der kezinde habarlanyp otyrýyna múmkindigi bar.
Bıznesti júrgizýdiń ınteraktıvti seksııasy bıznesti qorǵaýdaǵy qylmystyq-quqyqtyq máselelermen jalǵasyp taýyp, ary qaraı IT saladaǵy zańnama, jer qoınaýlaryn paıdalaný men energetıka, medısına jáne farmasevtıka, qurylys naryǵyna qatysty zańnamalaraǵa oraı máseleler talqylanyp, kásipkerler ózderin tolǵandyrǵan suraqtarǵa baılanysty mamandardyń jaýabyn tyńdady.
Al IT-quqyq seksııasy bızneske jasandy ıntellekti engizý máselesimen kásipkerlerdiń nazaryn aýdardy. Jobany Qazaqstan-Brıtan tehnıkalyq ýnıversıtetiniń mamandary Nazarbaev ýnıversıtetiniń Jasandy ıntellekt zerthanasynyń qyzmetkerlerimen júzege asyratyn bolady. Jasandy ıntellekt júıesi kásipkerlerge sot aktilerin izdeýge jáne sot isteriniń qandaı sheshimmen aıaqtalýyn boljaýǵa múmkindik beredi.
