Qojalyqtardy kópjyldyq egistikpen aınalysýǵa úgittep, qoldaý tanytqan aýdandyq kásipkerlik jáne aýylsharýashylyq bóliminiń basshysy Sergeı Toqpanovtyń aıtýynsha, bul shópter qýańshylyqqa beıimdelgen ósimdikter qataryna jatady. Ortasha eseppen shyǵymdylyǵyna qaraı ár gektardan 10-15 sentner shóp daıyndaýǵa múmkindik ashady. Búgingi tańda Taldyapan aýylynan iri mal bordaqylaý keshenin salyp jatqan «Et ındýstrııasy» agroholdıngi sýarmaly jerden kópjyldyq egistik egip, ónimin de jınap úlgergen.
«Júz ret estigenshe, bir ret kór» demekshi, egistik basynda bolyp, Ádilhannyń jańa bastamasyn kózimizben kórip qaıttyq. Egistikte okrýg ákimi Batyrhan Baıǵonaqovpen de jolymyz túıisti.
– Ádilhan inimizdiń qolǵa alǵan jumysy bárimizdi qýantady. Okrýgtegi aýylsharýashylyq salasyna jańa serpilis berýde. Jas sharýanyń jańashyl isi basqa da qojalyqtarǵa úlgi bolsa eken, – degen rızashylyǵyn jasyrmady.
Isker jigitti áńgimege tarttyq.
– Ákem basqarǵan sharýashylyqty 2017 jyldan bastap óz qolyma aldym. О́zimniń negizgi mamandyǵym shet tili pániniń muǵalimi. Degenmen osy bir atakásippen aınalysýǵa bet burdym. Nátıjesi jaman emes. Aýyldan 7 shaqyrym jerde mal ustap otyrǵan qystaǵymyz ornalasqan. Búginde sharýashylyǵymyzda 50 iri qara, 50 jylqy, 500 qoı bar. Buqa men qoshqar satyp alyp, mal basyn asyldandyrý baǵdarlamasyna da qatysyp jatyrmyz. Ákem Ádilhannyń mamandyǵy agronom bolǵandyqtan kópjyldyq shóp egý týraly biraz aqyldasa kelip, osy jumysty qolǵa aldyq. Negizinen erkekshóp egilýde. Sonymen birge sýdanka, boz arpa bar. Erkekshóp tehnologııasy boıynsha kúzde egiledi. Ol úshin jerdi jyrtýdyń qajeti joq. Shóp tuqymy 1 sm tereńdikke tússe jarap jatyr. Qystaı qalyń qardyń astynda jatqan dán kóktem shyǵa qaýlap ósedi. Aýa raıy qolaıly bolsa, erkekshóp 10-15 jyl qatarynan ónimin beredi. Egistikke qajetti tuqymdy Bórli aýdanyndaǵy «Agrovık» JShS-nan satyp aldyq. Arnaıy laboratorııadan tekserilgen tuqym 80 paıyzǵa deıin shyǵymdylyǵyn beredi degen mekemeniń kepildigi bar. Al sýdanka shóbiniń tuqymyn sýarmaly jerge kóktemde egetin bolamyz. Egistikke kerekti tuqymdy artyǵymen satyp alǵandyqtan, egis kólemin arttyramyz ba degen maqsat bar. Ol úshin egistik jer kerek, – dep aǵynan jaryldy Ádilhan.
Jas ta bolsa bas bolǵan Ádilhanǵa sáttilik tilep, qoshtastyq. Endigi kezekte jas sharýanyń beınetti eńbegi kópke úlgi bolǵaı.
Qaırat JAQYP,
Batys Qazaqstan oblysy,
Qaztalov aýdany
