– Bizdiń murajaı shyǵarmashylyq jastarǵa – sýretshilerge, aqyndar men jazýshylarǵa, mýzykanttar men akterlerge erekshe kóńil bóledi. Bıylǵy Jastar jylynda biz jańa dástúr engizbekpiz. Jas sýretshilerdiń óz kúshterimen uıymdastyrylǵan toptyq kórmelerin ótkize bastaımyz. Bul jas avtorlarǵa jyl saıyn óz jumystaryn kórsetýge múmkindik beredi, – deıdi mýzeı basshysy.
Taıaýda atalǵan murajaıda SERPIN-2019 jas sýretshileriniń kórmesi ashyldy. Ekspozısııada 18-30 jas aralyǵyndaǵy 20 talantty avtordyń jumystary kórermen nazaryna usynyldy.
Mamandardyń aıtýynsha, jas sýretshiler úshin osyndaı kórmelerge júıeli túrde qatysyp otyrýdyń mańyzy óte zor eken. Munyń ózi bolashaqta olardyń shyǵarmashylyq turǵyda damýyna ıgi áserin tıgizedi. Saıyp kelgende, jas avtorlardyń árqaısysy óz álinshe qaıtalanbas dara tulǵa, árkim óz álemin tanyp-bilýge umtylady jáne ony óz týyndysy arqyly kórermenderge pash etýge tyrysady. Degenmen jas qylqalam sheberlerine ortaq dúnıeler de bar: ol – shyǵarmashylyq serpilis, sheksiz qııal men asaý sezim, týyndyny jasaý, oınatý, oılaý jáne qııaldaý, óziniń qaıtalanbas izin qaldyrý. Mine, osy áreketter olardyń basyn biriktirip turady.
SERPIN-2019 jas sýretshiler kórmesi 3 qazanǵa deıin jalǵasady.
QARAǴANDY
