Qazaqstan • 03 Qazan, 2019

Nur-Sultanda 11-12 qazan kúnderi «Qazaqstannyń úzdik taýary» kórme-baıqaýy ótedi

58 ret kórsetildi

11-12 qazan kúnderi Nur-Sultan qalasyndaǵy «Kórme» ortalyǵynda ár óńirden iriktelip, úzdik atanǵan otandyq taýar óndirýshiler jınalatyn «Qazaqstannyń úzdik taýary» respýblıkalyq kórme-baıqaýy ótedi. Sharaǵa respýblıkanyń ár óńirinen úzdik taýar óndirýshiler jınalady. Bul týraly elorda ákimdiginiń resmı saıty habarlady.

Kórme-baıqaýdy «Atameken» Qazaqstan Respýblıkasynyń Ulttyq kásipkerler palatasy uıymdastyryp otyr.   Bıylǵy kórmege 153 otandyq kásiporyn óz ónimderin «О́ndiristik maqsattaǵy úzdik taýarlar», «Halyq tutynatyn úzdik taýarlar», «Úzdik azyq-túlik taýarlary» atalymdary boıynsha usynbaq.

Kórme-baıqaýmen qosa «Atameken» UKP Azııa Damý Banki, Qazaqstan qolónershiler odaǵy jáne Ulttyq kýrorttyq qaýymdastyqpen birlese otyryp «Uly dala eli» forýmyn ótkizedi. Bul jerde otandyq qolónershiler, halyqaralyq spıkerler, sheteldik elshilikter, saýda-ónerkásip palatalary men otandyq jáne sheteldik saýda jelileri, ónim dıstrıbıýtorlary jınalady.

Forým aıasynda eki kórme ótetin bolady. Birinshisi – 70-ke jýyq qolóner sheberleriniń ónimderi usynylatyn Dástúrli qolóner buıymdarynyń kórmesi. Olardyń arasyndaǵy eń tanymal sheberler qolónerdiń ár túrli baǵdary boıynsha kórmege kelýshilerge arnap tegin sheberlik saǵattaryn ótkizedi (kúmisten, bylǵarydan, sazdan, kıizden buıymdar jasaý jáne t.b.). Al ekinshisi – Saýyqtyrý jáne medısınalyq týrızm kórmesi. Basty maqsat – kelýshilerge Qazaqstandaǵy saýyqtyrý jáne medısınalyq týrızmniń barlyq múmkindikterimen tanystyrý. Barlyq otandyq sanatorııler men balshyqpen emdeý oryndary, mıneraldy kózderdegi pansıonattar men demalys oryndary, mıneraldy jáne ashanalyq sýdy óndirýshiler, SPA, úzdik medısınalyq jáne ońaltý ortalyqtary kelýshilerge óz ónimderi men qyzmetterin tanystyrady.

Elorda turǵyndary men qonaqtary taýar óndirýshilermen tanysyp jáne óndirýshilerdiń ózderi usynǵan baǵada taýarlardy tómen baǵada satyp ala alady. Kórmede nan-toqash jáne kondıterlik ónimder, sút ónimderi, jartylaı fabrıkattar, tekstıl jáne kıim-keshek, qurylys materıaldary, medısınalyq buıymdar, korpýstyq jıhaz jáne t. b. qazaqstandyq taýarlar usynylatyn bolady.

Sondaı-aq kórmege kelýshiler elimizdiń eń úzdik saýyqtyrý oryndaryna joldamalar jáne baǵaly syılyqtar utysyna qatysa alady, al jumys berýshiler óz qyzmetkerlerine eń tıimdi baǵada kelisim-sharttar jasasa alady.


Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar