Qazaqstannyń Tuńǵysh Prezıdenti – Elbasy Nursultan Ábishuly Nazarbaev 2019 jyldy «Jastar jyly» dep jarııalady. Osy oraıda, jastar arasynda jańa jobalar qurý maqsatynda Qazaqstan jastarynyń kongresi Qazaq tehnologııa jáne bıznes ýnıversıtetinde jáne Astana medısınalyq ýnıversıtetinde dóńgelek ústel uıymdastyrdy. Jıyn barysynda Qazaqstan jastarynyń kongresi janyndaǵy Respýblıkalyq jastardy damytý ortalyǵynyń basshysy Erǵazy Ázimhanuly kezdesýdiń mańyzyn atap ótip, qatysýshylarǵa túsinik berdi.
Áleýmettik kásipker Emın Askerov Prezıdent Qasym-Jomart Toqaevtyń alǵashqy Joldaýyna qatysty óz pikirimen bólisti.
«Joldaýdy tyńdaý barysynda Prezıdentimizdiń qoǵamnyń olqy jaqtarynan habardar ekenin baıqadym. Sebebi bul Joldaýda qoǵamnyń negizgi tustaryna nazar aýdaryldy. Mysaly, orta jáne shaǵyn kásipti salyqtan bosatý, memlekettik satyp alýlardaǵy jemqorlyqty tyıý bastamalary Prezıdenttiń bul máselege alańdaıtynyn bildiredi. Zeınetaqy jınaǵyn baspana men bilim alýǵa jumsaýǵa bolatyny – tyń jańalyq. Bul – qazirgi tańda baspana satyp alýǵa ne oqý aqysyn tóleýge múmkindigi joq adamdar úshin úlken múmkindik ekenin túsindim», dedi ol.
QazTBÝ-de ótken is-sharada «Habar» arnasynyń jas tilshisi – Bekbolat Arystanbekov jáne «Mádenıet úzdigi» tósbelgisiniń ıegeri, rejısser, ánshi, aktrısa, kóptegen tanymal ánderdiń avtory Qurmanaı Bahtııarqyzy Prezıdent joldaýyna qatysty óz oılaryn ortaǵa saldy.
Qazaqstan jastarynyń kongresi túsindirý jumystaryn júrgizýge arnalǵan dóńgelek ústelder men kezdesýlerdi Nur-Sultan qalasynyń barlyq joǵary oqý oryndarynyń ókilderimen ótkizýdi josparlap otyr.
