Sport • 07 Qazan, 2019

Ekinshi oıynynda da jeńiske jete almady

21 ret kórsetildi

Elordanyń «Astana» fýtbol klýby Eýropa lıgasynyń toptyq kezeńindegi ekinshi oıynyn ótkizip, bul joly da jeńilip qaldy. О́z alańynda Serbııanyń «Partızan» komandasyn qabyldaǵan jerlesterimiz 1:2 esebimen ese jiberdi.

Match bastalardan 3-4 saǵat buryn «Astananyń» kóshbasshysy Marın Tomasovtyń alańǵa shyǵa almaıtyndyǵy belgili boldy. Kezdesýden keıingi baspasóz máslıhatynda Grıgorchýk horvat fýtbolshysy ózin jaısyz sezingenin aıtty. Sondaı-aq oıyn aldyndaǵy baspasóz jıynynda «Partızan» komandasynyń bas bapkeri Savo Mıloshevıch «Tomasov pen Maevskııge erekshe nazar aýdaramyz, óıtkeni olar «Astana» sapynda eń qaýipti oıynshylar» dep aıtqan bolatyn. Biraq Serbııalyq komandanyń qýanyshyna oraı sol oıynda Tomasov alańǵa shyǵa almady.

Sonymen qatar «Astana» bas bapkeri Roman Grıgorchýk match aldyndaǵy baspasóz máslıhatynda «Erteń negizgi quram boıynsha táýekelge baramyz jáne quramda mindetti túrde ózgeris bolady» degen-di. Alańǵa birinshi mınýttan bastap shyǵatyn fýtbolshylardyń tizimin kórgende birden úsh ózgeristiń bolǵanyn baıqadyq. Shabýylshy Sergeı Hıjnıchenko men jartylaı qorǵaýshy Iýrıı Persýh Eýrokýbok oıyndaryndaǵy debıýt matchyn ótkizse, qorǵaýshy Abzal Beısebekov Chempıondar lıgasynyń birinshi irikteý kezeńindegi ChFR klýbyna qarsy ótken oıynan keıin Eýrokýbok básekesinde jasyl alańǵa birinshi ret shyqty. Sondaı-aq qorǵaýshy Lýka Shımýnovıch pen Jarko Tomashevıch Eýropa lıgasynda birinshi ret qorǵanysta ıyq tiresip óner kórsetti. Eýrolıgada turaqty oıyn ótkizip júrgen Roman Murtazaev, Evgenıı Postnıkovtyń qosalqy quramda qalyp qoıǵany azdap tańǵaldyrdy. Al «Partızan» komandasy ózderiniń negizgi quram oıynshylarymen kezdesýdi bastady.

Matchtyń alǵashqy 15 mınýty teń dárejede bastalyp, qos komanda da alma-kezek shabýyldaýmen boldy. Shabýylshy Sergeı Hıjnıchenko men Dmıtrıı Shomko «Partızan» qaqpasyna alystan soqqy jasap, qaqpashynyń qyraǵylyǵyn bir baıqap kórdi. Degenmen serbııalyq tájirıbeli qaqpashy Vladımır Stoıkovıch óz ornynan tabyla bildi. Al oıynnyń 16-mınýtynda qorǵaýshy Jarko Tomashevıch jaraqat alyp, komandany qıyn jaǵdaıǵa qaldyrdy. Onyń ornyna Evgenıı Postnıkov shyqty. Kezdesýdiń 20-mınýtynan bastap serbııalyq komanda urymtal sətterdi izdep, qarsy shabýylǵa jıi shyǵyp jatty. Nátıjesinde qonaqtar óz degenderine jetip, kezdesýdegi esepti birinshi bolyp ashty. Matchtyń 28-mınýtynda Nenad Erıch qaqpasynyń aldyndaǵy qarbalas sətte Ýmar Sadık múmkindigin múlt jibermedi. Esep 0:1. Sóıtip alǵashqy 45 mınýt qonaqtardyń paıdasyna aıaqtaldy.

Kezdesýdiń ekinshi taımy da «Partı­zan­nyń» dopqa ıelik etýimen jalǵasyp jatty. Seıdýba Sýma, Boıan Asano «Astana» qaqpasyn jıi torýyldady. 37 jastaǵy Nenad Erıchtiń sheberligi bolmasa oıynnyń 55-mınýtyna taman esep 0:3 bolýy əbden múmkin edi. 60-mınýtta Ýmar Sadık kezdesýdegi ekinshi golyn soqqan bolatyn. Alaıda shvesııalyq bas tóreshi Mohammed ál-Hakım gol oıynnan tys soǵyldy dep, goldy eseptemeı tastady. Arada 13 mınýt ótkende Ýmar Sadık óz degenine jetip, dýbl avtory atandy. Serbııa komandasy eseptegi basymdyǵyna qaramastan qorǵanysta saýatty oınap, shabýylda jınaqy oıyn kɵrsetti. 76-mınýtta Ýmar Sadık buryshtama dobynan úshinshi golyn soqqanymen tóreshi esepke almady.

Ɵz jankúıeriniń aldynda ɵner kɵr­set­ken «Astana» 85-mınýtta ıslandııalyq legıonerdiń kɵmegimen esep aıyrmasyn qysqartty. Shamamen 20-25 metr jerden qaqpany nysanaǵa alǵan Rýnar Sıgýronsson alys buryshty dəl kɵzdedi. Es jıyp sońǵy bes mınýtta tarazy basyn teńestirýge tyrysqanmen «Partızan» múmkindik bere qoımady. Qorytyndy esep 1:2.

«L» tobyndaǵy kezdesýde Nıder­lan­dynyń «AZ Alkmar» komandasy óz alańynda aǵylshynnyń «Manchester Iýnaıted» klýbyn qabyldady. Bul kezdesýde esep ashylmaı, qos komanda 0:0 esebimen teń tarqasty. Sondaı-aq eki komanda da bir-bir upaı ıelendi. Osylaısha MIý men «Partızan» komandasy 4 upaımen alǵashqy eki oryndy bólisip tursa, «AZ Alkmar» 2 upaımen úshinshi orynǵa jaıǵasty. «Astana» ázirshe sońǵy orynda tur. Alda áli 4 týr bar ekenin jáne MIý men AZ komandalarynyń teń oınaǵanyn eskerer bolsaq, «Astanaǵa» Eýropa lıgasynyń pleı-off kezeńine ótýge áli de múmkindik bar.  Endi «Astana Arenada» ótetin eki oıynda jeńiske jetip, syrt alańdaǵy matchtarda meıilinshe upaı oljalaý kerek.

Sóz sońynda statıstıka súıer jan­kúıer­lerge, álgi oıynnyń birneshe naqty sıfrlaryn aıta keteıik. «Astana» sapyndaǵy jalǵyz goldyń avtory Rýnar Mar Sıgýronsson elorda klýbynyń Eýrokýbok oıyndaryndaǵy úzdik bes surmergenniń qataryna endi. Bes gol soqqan Islandııalyq oıynshy Roman Mýrtazaev pen Baýyrjan Djolchıevpen bir qatarda tur. Al Sıgýronssonǵa ná­tı­jeli pas asyrǵan Roman Mýrtazaev gol+pas júıesi boıynsha úzdik bestikke endi.

Eýropa lıgasynyń ekinshi týr oıy­nynan keıin «Astana» komandasy eń tártipti komanda atandy. Qazaqstandyq komanda eki týrdyń qorytyndysy bo­ıynsha, birde-bir sary jáne qyzyl qaǵaz almaǵan. Sonymen qatar eki oıynda 18 ret ereje buzyp, TOP-6 komandanyń qa­taryna kirdi. Al Ispanııanyń «He­tafe», Shotlandııanyń «Seltık» jáne Germanııanyń «Aıntraht» komandasy eń tártipsiz komanda atandy. Sondaı-aq «Astana» 48 komandanyń ishinde bir gol soqqan 45-shi, úsh gol ótkizip alǵan 32-shi, qarsylas komandanyń qaqpasynda 12 soqqy jasaǵan 47-shi, 795 ret pas anyq pas bergen 37-shi, eki buryshtama dobyn oryndaǵan 48-shi jáne bes ret oıynnan tys qalǵan 15-shi komandanyń qatarynan kórindi.

Aıta keteıik, «Astana» klýby Eýropa lıgasyndaǵy 3-týr oıynyn syrt alańda Nıderlandynyń «AZ Alkmar» komandasyna qarsy ótkizedi. Kezdesý 24 qazanda ótedi dep josparlanǵan.

 

Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar