Bul týraly oblys ákimi О́mirzaq Shókeev Túrkistanda ótken ustazdardyń kásibı merekesine arnalǵan saltanatty jıynda málim etti. Saltanatty sharaǵa óńirdiń 400-den astam bilim berý salasynyń ókilderi qatysty. Urpaq tárbıeleýde talmaı eńbek etip júrgen ustazdardyń tól merekesine arnalǵan «Merekelerińizben, ulaǵatty ustazdar!» atty sharanyń shymyldyǵy «Abaı ósıeti» teatrlyq kórinisimen ashyldy. Oblys ákimi О́mirzaq Shókeev ustazdar qaýymyna óz alǵysyn bildirip, merekesimen quttyqtady. Tulǵa bolyp qalyptasýǵa yqpal etken mektep muǵalimderin eske alyp, olarǵa degen jyly lebizin bildirdi. Eldiń erteńin aıqyndaıtyn, onyń básekelestik qabiletine yqpal etetin asa mańyzdy sala maıtalmandary Túrkistan oblysy ákiminiń qurmet gramotasymen, alǵys hatymen marapattaldy. Al ardager ustazdarǵa oblys ákiminiń atynan arnaıy syılyqtar men gúl shoqtary usynyldy. Sondaı-aq «Jastar jylyna» oraı ótken «Úzdik jas muǵalim-2019» oblystyq baıqaýynyń jeńimpazdaryna da marapattar tabys etildi.
Búginde oblysta 60 myńǵa jýyq pedagog eńbek etip keledi. Byltyr óńirdiń 150-ge jýyq oqýshysy halyqaralyq jáne respýblıkalyq deńgeıdegi bilim saıystarynda júldeli oryndarǵa ıe boldy. Al jaqynda ótken «Úzdik pedagog-2019» respýblıkalyq baıqaýyna oblystan 9 ustaz qatysyp, úsheýi bilim saıysynyń ozyǵy atandy. Saltanatty rásim konserttik baǵdarlamamen jáne teatrlandyrylǵan qoıylymdarmen jalǵasty.
Túrkistan oblysy
