Prezıdent pármen berip, Úkimet úmitin jaqqan halyqtyń áleýmettik áleýetin kóterý mınıstrliktiń mindeti. Premer-Mınıstr Asqar Mamınniń tóraǵalyǵymen ótken keshegi Úkimet otyrysynda aıqyndyq, ádilettilik jáne eńbekke yntalandyrý qaǵıdattaryna negizdelgen ataýly áleýmettik kómek kórsetýdiń jańa tásilderi qaraldy. Jıynda elimizdiń Eńbek jáne halyqty áleýmettik qorǵaý mınıstri Birjan Nurymbetov 2020 jyldyń 1 qańtarynan bastap áleýmettik qoldaý sharalarynyń keshendi tásili men ataýly sıpatyn qabyldaýdy qarastyratyn jańa zań jobasyn tanystyrǵan-dy.
Keshe muqtaj azamattarǵa ataýly áleýmettik kómek qalaı kórsetilip jatqany buqaralyq aqparat quraldaryna keńinen túsindirildi. Ataýly áleýmettik kómek áleýmettik jaǵdaıy tómen otbasylarǵa ǵana aqshalaı tólemder túrinde jáne jeke isin bastaýǵa, oqytýǵa, jumysqa ornalasýǵa qoldaý kórsetý arqyly otbasyn ómirlik qıyn jaǵdaıdan shyǵarýǵa kómektesýge baǵyttalǵany atap aıtyldy.
«Eger otbasy tabysy boıynsha az qamtylǵan otbasy sanatyna jatatyn bolsa, onda járdemaqydan bólek ataýly áleýmettik kómek beriledi. Buǵan qosa, kepildikti áleýmettik toptama usynylady. Sondyqtan az qamtylǵan, kóp balaly otbasy bolsa, atalǵan kómektiń barlyq úsh túrin alady. Sonymen qatar múgedek balasy bar otbasylarǵa qamqor bolý – mınıstrliktiń eń basty maqsattarynyń biri. Bıyl mamyr aıynda 2025 jylǵa deıin múgedekter quqyǵyn qamtamasyz etý jáne ómir súrý sapasyn jaqsartý jónindegi Ulttyq jospar qabyldandy. Atalǵan jospar aıasynda kóp jumys júrgizilýde, múgedektigi bar adamdardy tehnıkalyq quraldarmen jáne ońaltý qyzmetterimen qamtamasyz etý kózdelgen. Mysaly, 16 jasqa deıingi múgedek balalarǵa shilde aıynda mólsheri ulǵaıǵan járdemaqy beriledi.
Búgingi tańda bul 42 500 teńgeni qurap otyr. Al 16-dan 18 jasqa deıingi múgedek jasóspirimder de 35 myńnan 57 myń teńgege deıin járdemaqy alady. Budan bólek, zańnamada 18 jasqa deıin múgedek balany jáne 18 jastan asqan 1 toptaǵy múgedekti tárbıelep otyrǵan ata-anasy da, qamqorshysy da memleketten 41 500 teńge mólsherinde járdemaqy alady. Eń basty aıta ketetin jaıt, otbasynyń az qamtylǵanyn anyqtaý barysynda múgedek balalarǵa tólenetin járdemaqylar otbasy tabysynyń quramynda esepke alynbaıdy», dedi B.Nurymbetov.
Sonymen qatar ol az qamtylǵan AÁK alyp júrgen azamattardyń ishinde eńbekke jaramdy azamattardyń 55 myńy jumyspen qamtylǵanyn jetkizdi.
«Elimizde AÁK alyp júrgen azamattardyń ishinde eńbekke jaramdy azamattardyń 55 myńyn jumyspen qamtý sharalaryna tarta bildik. 8400-deı adam jeńildetilgen nesıe alyp, 3400-deı adam tegin, qaıtarymsyz 505 myń teńgege jýyq grant alyp, jeke shaǵyn kásibin júrgizip úlgerdi. О́kinishke qaraı, keıbir azamattarymyz ózderiniń shynaıy tabystaryn jasyryp, AÁK múmkindikterin teris paıdalaný faktileri de oryn aldy. Bul jerde biri bilmestikten qatelesti, biri pendeshilikke salyndy. Degenmen, munyń bári zań buzýshylyqqa alyp keldi. О́ziniń naqty tabysyn jasyrǵan 73 myńnan astam otbasyna AÁK zańsyz taǵaıyndalǵany anyqtaldy. Biz tólemderdi toqtatýǵa nemese qaıta esepteýge májbúr boldyq. Shara qoldaný barysynda 23 myń adamnyń AÁK taǵaıyndalǵan sheshimderin buzýǵa, 9 myńǵa jýyq adamdardyń tólemderin toqtatýǵa, 38 myń adamnyń AÁK mólsherin qaıta esepteýge týra keldi. Sonymen qatar ózderiniń jeke kásipteriniń bar ekenin jasyrǵan derekter de anyqtaldy. Mysaly, Almaty oblysynda kóp balaly otbasy aǵymdaǵy jyldyń 11 maýsymynan bastap AÁK aldy. Biraq tekserý barysynda bul otbasynyń 852 bas mal tirkelgen sharýashylyǵy bar ekeni belgili boldy», dedi ol.
Atalǵan áleýmettik qoldaý sharalarymen qatar balalary bar tabysy az otbasylarǵa úı bıznesin júrgizý daǵdylaryn ıgerýge kómek kórsetiledi.
«Almatynyń barlyq 8 aýdanynda úkimettik emes uıymdar tarapynan «Baqytty otbasy» ortalyqtary qurylǵan. Onda analary kýrstan ótken kezde balalarynyń qaraýsyz qalmaýyna barlyq jaǵdaı jasalǵan. Kýrstan ótken analarǵa qajetti jabdyqtar satyp alý úshin qaıtarymsyz granttar beretin bolamyz. Bul tájirıbeni barlyq óńirde taratýdy josparlap otyrmyz. Sondaı-aq «Meniń kásibim» jobasyn iske qostyq, onyń aıasynda ákimdikterdiń qoldaýymen demeýshiler esebinen analarǵa shaǵyn úı bıznesimen aınalysýǵa kómek kórsetiledi», dedi mınıstr.
«Ataýly áleýmettik kómek bul az qamtylǵan, jaǵdaıy tómen azamattarǵa beriledi. Bul – aqshalaı túrde jáne áleýmettik jaǵynan beıimdeý, ıaǵnı jumyspen qamtý sharalarymen qosylyp kórsetiletin kómek. Memleket az qamtylǵan, kómekke muqtaj, tabysy tómen azamattarǵa kómektesýge mindetti. Sondyqtan da osy áleýmettik saıasat jalǵasatyn bolady. Bir eskererligi, ataýly áleýmettik kómek – elimizdegi jalǵyz áleýmettik tólem emes. Odan bólek, elimizde ana men balaǵa qatysty járdemaqynyń keminde 10 túri bar. Oǵan jylyna 470 mlrd teńgeden astam qarajat bólinedi. Jalpy Eńbek jáne halyqty áleýmettik qorǵaý mınıstrliginiń bıýdjetinde 3 trıllıon 53 mlrd teńge jyl saıyn 4 mıllıonnan astam adamǵa zeınetaqy men járdemaqy retinde berilip otyr. Otbasynyń jeke tabysy men memleket tarapynan tólenip jatqan zeınetaqy men járdemaqy túrindegi tabystar az qamtylǵan otbasynyń ólshem sharttarynan shyqpaı qalǵan jaǵdaıda ataýly áleýmettik kómek beriledi. Búgingi tańda ataýly áleýmettik kómek qalaı taǵaıyndalady? 2018 jyly az qamtylǵan otbasy qataryna ortasha jan basyna shaqqan tabysy tómengi kúnkóristiń 50 paıyzynan tómen jáne ár adamǵa jeke tabysy men kúnkóristiń 50 paıyzynyń arasyndaǵy aıyrmashylyǵy tólenetin. 2019 jyldyń 1 sáýirinen bastap tártip sál ózgerdi. Qazir ol ólshem shart az qamtylǵan otbasynyń qataryna ený úshin eń tómengi kúnkóristiń 50 paıyzyna emes, 70 paıyzyna deıin kóterildi. Jáne otbasyndaǵy kámelettik jasqa tolmaǵan barlyq balaǵa 20 789 teńge kóleminde tólenedi. Aǵymdaǵy jyldyń toǵyz aıynda AÁK 417 myń otbasyna nemese 2,1 mln adamǵa taǵaıyndaldy. AÁK ortasha mólsheri bir adamǵa 2,5 ese, 6848 teńgeden 16 446 teńgege deıin ósti. Ortasha eseppen otbasyna 90 myń teńge shyǵady, aıyna eń kóp taǵaıyndalǵan soma – 455 myń teńge. Bıyl AÁK-ke 206 mlrd teńge qarastyrylǵan. Sózsiz osy kómek kóptegen otbasylarǵa kómegin tıgizdi. Sondaı-aq olar jumyspen qamtý sharalaryna tartylyp, osy qıyn jaǵdaıdan shyǵa bildi», dedi vedomstvo basshysy.
