Qazaqstan • 08 Qazan, 2019

Andreı Kostın Qazaqstan basshylyǵymen respýblıkada VTB tobynyń bıznesin damytý týraly kelisti

47 ret kórsetildi

Memleket basshysy Qasym-Jomart Toqaev «VTB Banki» JAQ (jarııa aksıonerlik  qoǵamy) Basqarmasynyń tóraǵasy Andreı Kostındi qabyldaǵan bolatyn. 2019 jylǵy 7 qazanda Qazaqstanǵa jasalǵan resmı sapary barysynda VTB prezıdenti-basqarma tóraǵasy Andreı Kostın Respýblıka Prezıdenti Qasym-Jomart Toqaevpen, Premer-mınıstr Asqar Mamınmen, sondaı-aq Qazaqstannyń Tuńǵysh Prezıdenti Nursultan Nazarbaevpen kezdesti. Bul týraly banktiń baspasóz qyzmeti habarlady.

Kezdesý barysynda taraptar VTB tobynyń korporatıvtik-ınvestısııalyq bıznesin damytý úshin aıtarlyqtaı áleýetke ıe VTB toby men Qazaqstannyń yntymaqtastyǵyn keńeıtý týraly kelisti.

Qasym-Jomart Toqaev VTB-nyń Qazaqstandaǵy kásipkerlikti qarjylandyrý jónindegi kúsh-jigerine qoldaý bildirip, Bank sektoryn damytýdyń eki el men jalpy Eýrazııalyq odaqtyń ıntegrasııalyq prosesteri úshin mańyzdylyǵyn atap ótti. Andreı Kostın bıylǵy jyly bank Qazaqstandaǵy onjyldyǵyn atap ótetinin, bıznesti odan ári belsendi damytýdy josparlap otyrǵanyn atap ótti.

Qazaqstannyń premer-mınıstri Asqar Mamınmen kezdesý barysynda VTB tarapynan qazaqstandyq kompanııalarǵa qazirgi kezde shamamen $4 mlrd quraıtyn VTB kredıttik qorjynyn 2020 jyldyń sońyna qaraı $5-6 mlrd-qa deıin ulǵaıtý nıeti aıtyldy. Bul VTB-nyń Qazaqstan ekonomıkasyn damytý úshin negizgi qarjy ınstıtýttarynyń biri retindegi rólin nyǵaıtady. VTB tobynyń Qazaqstandaǵy negizgi ónimderi kredıt berý, taýar-shıkizat naryqtaryndaǵy operasııalar jáne qarjylyq keńes berý bolyp tabylady. VTB tobynyń Qazaqstandaǵy basty klıentteri – eldiń ulttyq ekonomıkasynyń negizin quraıtyn taý-ken óndirý, elektr energetıkasy jáne munaı-gaz salalaryndaǵy iri kompanııalar. VTB tek kredıtor ǵana emes, sonymen qatar Reseıdegi qazaqstandyq kompanııalardyń jobalaryn damytý boıynsha keńesshi bolyp tabylady.

Taraptar kólik jáne poshta ınfraqurylymyn damytý salasyndaǵy ınfraqurylymdyq jobalarǵa VTB qatysýy týraly kelisti.

Sondaı-aq VTB Qazaqstan astanasyndaǵy halyqaralyq qarjy ortalyǵynyń jumysyna qatysady. Andreı Kostın «Astana» HFO aıasynda «VTB kapıtal» bólimshesin ashý nıeti týraly málimdedi. VTB Basshysynyń aıtýynsha, top Qazaqstannyń bank sektoryn damytý maqsatynda Respýblıka Basshylyǵymen odan ári tyǵyz yntymaqtastyqqa múddeli.

Sońǵy jańalyqtar

Mennıdiń taǵy bir márttigi

Kásipqoı boks • Keshe

Uqsas jańalyqtar