Sport • 09 Qazan, 2019

Jeńimpazdar men júldegerler marapattaldy

58 retkórsetildi

Elordada boks, kúres túrleri, aýyr atletıka men sporttyq quzǵa órmeleý boıynsha álem chempıonattarynyń jeńimpazdary men júldegerlerin marapattaý rásimi ótti. Saltanatty sharaǵa Qazaqstan Ulttyq Olımpıadalyq komıtetiniń prezıdenti Tımýr Qulybaev qatysty dep habarlaıdy Olympic.kz.

Qazaqstandyq boksshylar Ekaterınbýrgte ótken álem chempıonatynda alty medal jeńip aldy. Bekzat Nurdáýletov álem chempıony atansa, Qamshybek Qońqabaev álem chempıonatynyń kúmis júldesine ıe bolǵan-dy. Al Sáken Bıbosynov, Tursynbaı Qulahmet, Vasılıı Levıt jáne Abylaıhan Júsipov álem birinshiliginiń qola júldesine qol jetkizgen edi.

Nur-Sultanda kúres túrlerinen ótken lısenzııalyq álem chempıonatynda kilem ıeleri jeti júlde jeńip aldy. Grek-rım kúresinen Horlan Jaqansha, erkin kúres sheberleri Nurqoja Qaıpanov pen Dáýlet Nııazbekov álem chempıonatynyń kúmis júldegerleri atandy. Grek-rım kúresinen Almat Kebispaev, Meırambek Aınaǵulov, erkin kúresten Nurıslam Sanaev jáne áıelder kúresinen Valentına Islamova el qorjynyn qola júldemen tolyqtyrdy. Sonymen qatar elorda kileminde beldesken qazaqstandyq balýandar Tokıoda ótetin jazǵy Olımpııa oıyndaryna  segiz joldama utyp aldy.

Aýyratlet Igor Son Taılandta ótken aýyr atletıkadan álem chempıonatynda kúmispen kúpteldi. Japonııa astanasy Tokıoda sporttyq quzǵa órmeleýden álem chempıonatynda otandasymyz Rıshat Haıbýllın qola júldemen qatar, Tokıo Olımpıadasyna joldamany jeńip aldy. 

Qazaqstan Respýblıkasy Úkimetiniń qaýlysyna sáıkes, álem chempıonattarynda joǵary nátıje kórsetkeni úshin altyn medal ıegerine – 15 000 AQSh dollary, kúmiske – 7 000 AQSh dollary, qolaǵa – 5 000 AQSh dollary kóleminde aqshalaı syıaqynyń sertıfıkatymen marapattaldy.

Sonymen qatar syıaqyǵa ulttyq qurama bas bapkerleri, sportshynyń birinshi bapkeri jáne jeke jattyqtyrýshylary men ǵylymı-keshendi toptardyń ókilderi ıe boldy.

«Osyndaǵy barlyq sportshylar atynan elimizdiń Ulttyq Olımpıadalyq komıtetine, Mádenıet jáne sport mınıstrligine alǵys aıtqym keledi. Tek qana resmı saltanatty sharalarda ǵana emes, rıngte, tatamıde, kilemge shyǵarda, kez kelgen jarysqa daıyndyq barysynda biz dál osyndaı qoldaýdyń baryn sezemiz. Bizge artylǵan úmitti, senimdi aqtaý úshin eshqashan aıanyp qalmaımyz! Sportshy bolǵannan keıin álemdik arenada el namysyn abyroımen qorǵaý – bizdiń Otan aldyndaǵy boryshymyz, paryzymyz dep bilemin. Kók týdyń kókte jelbirep, ánuranymyzdy búkil álem aldynda maqtanyshpen shyrqaý – bizge rýh berip, jigerlendiredi», dedi bokstan álem chempıony Bekzat Nurdáýletov.

Sońǵy jańalyqtar

iPhone 12 Pro renderi shyqty

Tehnologııa • Keshe

Uqsas jańalyqtar