Qoǵam • 10 Qazan, 2019

Jas muǵalimderge jataqhana berildi

46 retkórsetildi

«Jastarǵa jalǵa beriletin turǵyn úıge qujattar qarashadan bastap qabyldanady» degen shattyqqa toly jańalyq shartarapty sharlap ketken bolatyn. Bireý senip, bireý kúdikpen qaraǵany belgili. Tuńǵysh Prezıdent N.Nazarbaevtyń Jastar jylynyń ashylý saltanatynda bergen tapsyrmasyna sáıkes Jastar jáne otbasy isteri komıtetiniń tóraǵasy Madııar Qojahmet satyp alý quqyǵynsyz jalǵa beriletin turǵyn úı elimizdegi basty 3 qalada júzege asatynyn, Nur-Sultan, Almaty qalalarynda 1 050 páter, Shymkent qalasynda 904 páter berý josparlanyp otyrǵanyn, jaldaý aqysy aıyna 10 myń teńgeni quraıtynyn jetkizgen bolatyn.

Iá, «ózgeniń asylynan, óziń­niń  lashyǵyńda» ómir súrgen álde­qaıda jaqsy emes pe?! Degenmen bas­panaǵa jetý baspaldaǵy da ońaıǵa soqpas. Bireý janyn qı­nap, bireý baryn jınap je­tetin «úı» degen biraýyz sózdiń ózinde úıilip jatqan másele kóp. Bas-basyna baspana bermese de memleket meılinshe meıirim jasap, túrli baǵdarlamalardy bas­tap jatqanyn kóz kórýde. Ja­qynda Nur-Sultan qalasynda da osyndaı ıgi shara boldy. Bul – 350 oryndyq  «Jas ustaz» or­talyǵynyń ashylýy.

Ortalyqta komıssııanyń she­shi­mimen qalanyń jas mamandary, oqý ornyn úzdik bitirip, je­tistikke jetken, qoǵamdyq ju­mystarǵa belsendi aralasyp júrgen jastar iriktelip, tań­dalyp alyndy. Jastar munda birlese otyryp qalanyń bilim salasynda túrli máselelerdi qol­darynan kelgenshe sheshýge, birge sabaqqa daıyndalýǵa, qo­ǵamdyq isterge qatysýǵa, jas ma­mandar klýbynyń ári qaraı jandanýyna úles qosady. Ortalyqta demalysqa jáne ár­túrli sportpen aınalysýǵa, ózde­riniń biliktilikterin arttyrýǵa to­lyq jaǵdaı jasalǵan. Jas mamandar aıyna 15-17 myń teń­ge aralyǵynda ǵana tóleıdi. Bul – Nur-Sultan qalasyndaǵy alǵashqy ortalyq», deıdi Nur-Sultan qalasy Bilim berýdi jańǵyrtý ortalyǵynyń dırektory Gúlnar Qulmuhamedqyzy.

Elorda tórindegi eleýli iske erekshe qýanǵandardyń biri jas maman – Erjas Janatbekuly. Ol búgingi tańda Gýmanıtarlyq kolledjde muǵalim bolyp eńbek etýde.

«Jaqynda «Jas ustaz» or­ta­ly­ǵynyń saltanatty ashylýy ótti. Jańa ortalyq – jas mu­ǵalimder sabaqtan alǵan áser­lerimen bólisetin, zamanaýı ıdeıalar men ınnovasııalyq bilim berý jobalaryn talqy­laıtyn dıalog alańy. Elordalyq jas muǵalimder klýby men kóshbasshylardyń rezerv mektebi de osy jerde ju­mysyn jalǵastyratyn bolady. Bıyl Jastar jyly aıasynda jastarǵa qoldaý kórsetip, «Jas ustaz» ortalyǵynan jas ustazdarǵa arnalǵan jańa ja­taqhana ashyldy. Jataqhana 350 jas muǵalimdi qabyldaýǵa arnalǵan. Jas mamandarǵa bul óte jaqsy múmkindik. Qalamyzǵa Qazaqstannyń ár túkpirinen jı­­nalǵan jas mamandardy bir ortalyqqa shoǵyrlandyrý ar­qyly baspanamen qamtamasyz etýge barlyq jaǵdaı jasalǵan. Osyn­daı shara jastardyń eńbek etýine serpin beredi. Úkimet tara­pynan jastarǵa qoldaý kórse­tilip jatqandyǵy úshin jas us­taz­dardyń atynan alǵys aıtamyz», deıdi ol.

Astana qalasy ákimdiginiń má­limetinshe, búgingi tańda 200-den astam jas ustaz kiltterin alyp, jataqhanaǵa qonystana bastaǵan. Úmitkerler birqatar krıterııler boıynsha tańdalady. Birinshi, pedagogıkalyq bilim (úzdik dıp­lom alǵandarǵa artyqshylyq beriledi), ekinshi, jalpy jumys ótili 5 jylǵa deıin (Nur-Sultan qalasynyń bilim uıymdarynda), úshinshi, Nur-Sultan qalasynda úıiniń joqtyǵy, úılenbegen jáne asyraýynda balalarynyń bolmaýy shart.

 Úmitkerlerdi tańdaý kezinde pedagogıkalyq qyzmette jetis­tikteri bar jáne bilim uıym­nyń qoǵamdyq ómirine úles qos­qan jas muǵalimderge ar­tyq­shylyq beriledi. Bilim bas­qarmasyndaǵy komıssııa oqytý­shylar bergen ótinishterdi qa­raıdy. Komıssııa quramyna ká­sipodaq, qoǵamdyq uıymdar, Sy­baılas jemqorlyqqa qarsy is-qımyl agenttigi, BAQ, ata-analar qaýymdastyǵy jáne t.b. kiredi.

Uqsas jańalyqtar