«Ortalyqqa ýnıversıtetimizdiń deneshynyqtyrý jáne sport fakýltetin 25 jyl basqarǵan, shańǵy sporty boıynsha búkilodaqtyq dárejedegi tóreshi Alekseı Trýnovtyń esimin berýdi jón dep sheshtik. Endi stýdentterimiz munda sportpen alańsyz shuǵyldanyp, úlken jarystarǵa daıyndalady. Bıyl ShQMÝ-ǵa 37 sport sheberi oqýǵa tústi. «Altaı», «Torpedo» klýbtarynyń sportshylary da bizde oqıdy. Memleket tarapynan da úlken qoldaý kórsetilip jatyr. Oblys ákimi Danıal Ahmetov bıyl jastarǵa 400 grant bóldi», dedi ortalyqtyń ashylýynda sóz sóılegen ýnıversıtet rektory Muhtar Tólegen.
Fıtnes ortalyqtyń ashylý saltanatyna «Qazaqstan Barysy» týrnıriniń eki dúrkin jeńimpazy Aıbek Nuǵymarov, Nur Otan partııasy oblystyq fılıaly tóraǵasynyń birinshi orynbasary Ánýarbek Muhtarhanov, Alekseı Trýnovtyń qyzy Irına Kornılovıch qatysyp, jyly lebizderin jetkizdi. «Bul jerden bolashaqta álem chempıondary shyǵatynyna kúmánim joq. Sebebi birneshe álem chempıony osy qarashańyraqta oqyǵan. Ortalyq qazirgi zaman talabyna saı jabdyqtalǵan eken. Osyndaı jattyǵý zaldary kóp bolsyn degen tilek aıtamyn», dedi dańqty balýan.
Fıtnes ortalyqty jabdyqtaý úshin bıýdjetten tys 10 mıllıon teńgeden astam qarajat bólinipti. 50 stýdentke tegin abonement berilipti. Aldaǵy ýaqytta belsendi jastarǵa taǵy da 50 abonement tegin bólinbek.
О́SKEMEN
