Qala turǵyndary men qonaqtary úshin teatr ujymy koreılerdiń Qazaqstanda ómir súrýiniń 80 jyldyǵyna arnalǵan «Blagoslovenny býdte naveka!» teatrlandyrylǵan qoıylymyn arnaıy daıyndady. Atalmysh qoıylymnyń qoıýshy rejısserleri – Nadejda Kım men Elena Kım. Bul qoıylymda koreı teatryndaǵy barlyq janr bir arnaǵa toǵysty: dramalyq, vokaldyq jáne horeografııalyq óner ortaq spektakldiń mazmunyn baıyta tústi. Qoıylym ejelgi zamannan búgingi kúnge deıingi koreı halqynyń shyrǵalańǵa toly baı tarıhyn kórkem ári tyń tásilmen baıandaýdy murat tutqan. Teatr ártisteri ejelgi Koreıanyń keńistikpen, dástúrmen úılesimdi salty men sulýlyǵyn, odan ári Qıyr Shyǵysqa qonys aýdarǵanyn, jer aýdarylyp kelgennen keıin qamqor peıilin kórsetken qazaq halqyna alǵysyn, soǵys jyldarynyń aýyrtpalyǵy men búgingi baqytty ómirdi sahna tilimen kelistire kórsetedi. Sahnalyq kórinister birinen keıin biri aýysyp, kórermenniń kóz aldynda koreı etnosynyń ómir tarıhy taldanady. Ulttyq kostıýmder, akterlerdiń shynaıy oıyny, vokalısterdiń ǵajaıyp daýysy jáne horeografııalyq kompozısııalar zalda otyrǵan kórermendi beıjaı qaldyrmaıdy. Spektakl tolyq anshlagpen ótti. Ártister koreı halqynyń deportasııalanǵan kezeńin kórsetkende, tula boıdy shymyrlatqan epızodtar kórermenderdiń kóńilinde umytylmas áser qaldyrdy.
Koreıa Respýblıkasynyń Qazaqstandaǵy Tótenshe jáne ókiletti elshisi Kım De Sık, Parlament Májilisiniń depýtaty, «Qazaqstan koreıleri qaýymdastyǵy» Qamqorlyq keńesi tóraǵasynyń orynbasary R.Ý.Kım, «Qazaqstan koreıleri qaýymdastyǵynyń» Prezıdenti S.G.Ogaı sııaqty qurmetti qonaqtardyń ártisterdiń ónerin tamashalap, spektakl sońynda tolqyǵan kóńilmen tik turyp rızashylyq bildirýin teatr ujymy «óz tarıhy men ónerine kórsetken qurmeti» retinde qabyl alǵanyn aıtady.
Gastroldik issapar kúnderi Qaraǵandy oblysy koreıleriniń etnomádenı birlestigi óziniń 30 jyldyq mereıtoıyn atap ótti, al bul birlestik pen teatrdy 20 jyldyq dostyq pen yntymaqtastyq baılanystyrady. Qazaqstan atty úlken ári tatý otbasynda ómir súrip jatqan koreı etnosynyń ókilderi bir-birine shyǵarmashylyq tabys, ósip-órkendeý jáne baq-bereke tiledi.
ALMATY
