Rýhanııat • 11 Qazan, 2019

Qarsylastardyń emes, qazylardyń soqqysy aýyr tıdi

839 retkórsetildi

Osydan dál 35 jyl buryn el sportynda eleýli bir oqıǵa boldy. Atap aıtsaq, 1984 jyly О́zbekstannyń bas shaharynda ótken KSRO chempıonatynda qazaqtyń tórt boksshysy qarsylastarynyń barlyǵyn qoǵadaı japyryp, jarystyń bas júldesin oljalady. Olar – Kárimjan Ábdirahmanov (48 kılo), Serik Nurqazov (57 kılo), Serik Qonaqbaev (67 kılo) jáne Asylbek Qılymov (75 kılo). Eger sporttyq shejireniń sarǵaıǵan betterin paraqtasaq, Qazaqstannyń boksshylary buryn-sońdy osyndaı orasan zor tabysqa qol jetkize alǵan joq. Al Tashkent tórinde tórt birdeı qandasymyzdyń jeńis tuǵyrynyń eń bıik satysynda marqaıyp turýy mereıimizdi ósirdi. Mine, sol juldyzdy komandanyń sapynda jasyndaı jarqyraǵan Kárimjan ÁBDIRAHMANOVPEN jýyrda júzdesýdiń sáti tústi.

– Kezinde asa jeńil sal­maqta Odaqtyń bas boksshysy atanǵan qazaqtyń qoltoq­paqtaı ǵana uly Kárimjan Ábdirahmanovtyń sport­tyń bul túrin tańdaýyna ne túrtki bol­dy? Kóp jankúıer osy sa­ýal­dyń jaýabyn bilgisi keledi...

– Barlyǵy da bala kezimde Se­rik Qonaqbaevqa elikteýden bas­taldy. 1976 jyly KSRO-nyń jastar oıyndarynda top jar­ǵannan keıin Jambyl boks mek­tebi túleginiń ataǵy biraz jerge jaıyldy. Keıinnen aǵamyz kóp­tegen dúbirli dodada daralanyp, basqa da bıik belesterdi birinen keıin birin baǵyndyra bastady. Dańqty jerlesimizdiń osyn­daı dárejege jetýi myń­da­ǵan jas jetkinshektiń boks úıirmesiniń tabyldyryǵynan at­taýǵa septigin tıgizgeni anyq. So­lardyń qatarynda biz de barmyz.

Men de Jambyl oblysynyń túlegimin. 1964 jyldyń jaıma-shýaq kókteminde Baızaq aýdanyna qarasty Qyzyl Tý aýylyn­da dúnıege keldim. О́zimniń jora-joldastarymmen birge irgedegi oblys ortalyǵyna jıi qatynap turatynmyn. Barǵan saıyn sport­­tyń biraz túriniń basyn shala­­tynbyz. Birde mektebimizge «Qo­naqbaev kele jatyr» degen áńgimeni qulaǵymyz shalyp, barsha jurt ataqty boksshyny asyǵa kútti. Aty ańyzǵa aınalǵan aıtýly azamatty sol jerde alǵash ret kórdim. О́zi symbatty ári kórikti jigit eken. Jınalǵan qaýym aldynda Serik aǵamyz biraz tartymdy áńgimeniń tıegin aǵytty. Jeńiske jetý jolyndaǵy jan­kesh­­tilik pen janqııarlyq, óziń tańdaǵan kásipke degen adal­­dyq, otanshyldyq sezim men patrıottyq rýh jaıynda aq­taryla sóıledi. Biz osy áńgi­meniń barlyǵyn uıyp turyp tyń­dadyq. Qoshtasarda «Balalar bokspen shuǵyldansańdar, jaman bolmaısyńdar!» dep jyly ǵana jymıdy. Sol kezdesýden keıin meniń sanamda «Serik aǵa sekildi boksshy bolamyn. Qalaı da Qonaqbaevtyń deńgeıine je­te­min» degen oı qylań berdi. Osylaısha, kórshiniń uly Murat Ibragımov altynshy synyp oqyp júrgen kezimde meni bilikti bapker Ámirhan Tólenov jetekshilik etetin boks úıirmesine ertip ákel­di. Mine, meniń sporttaǵy jolym osylaı bastalǵan edi.

– Alǵashqy jeńister sport­shynyń jadynda máńgi saq­talady deıdi ǵoı. О́zińizdiń de tyr­naqaldy jeńisterińiz esińizde shyǵar?

– Árıne, esimde. Biraq men qalalyq jáne oblystyq dodalarda eleýli tabystarǵa qol jet­kizsem de, biraz ýaqyt boıy res­pýblıkalyq deńgeıdegi jarys­tarǵa shyǵa almaı júrdim. Sebebi – salmaǵymnyń azdyǵy. Boksqa alǵash kelgenimde nebári 24 kılo tarttym. Odan keıin de salmaǵym tym baıaý ósti. Sonyń saldarynan talaı jarystan shet qaldym. Aqyry reti kelip, Qyrǵyzstannyń Jalalabad qalasyna jolym tústi. Sol jerdegi búkilodaqtyq týrnırde top jardym. 1980 jyly Almatyda ótken Qazaqstannyń mektep oqýshylarynyń spartakıa­dasynda dara shyqtym. Osyndaı jeńisterdiń arqasynda elimizdiń jasóspirimder quramasynyń aǵa jattyqtyrýshysy Asqar Mal­qarov meni komandaǵa qabyl­dady. Sodan keıin túrli oqý-jı­­yndaryna qatysyp, she­ber­­­­ligim ábden shyńdaldy. О́z qatar­­lastarymnyń arasyn­da Qa­­zaqstan chempıony, KSRO bi­rin­shiligi men mektep oqýshy­lary spartakıadasynyń qola júldegeri atandym. Sharshy alań­daǵy meniń tyrnaqaldy tabystarym osylar.

– Jastar býyny arasyndaǵy jarys­tarda da qomaqty tabys­tarǵa qol jetkizgenińiz barshaǵa málim. Sol básekelerde sizdiń bas­ty qarsylasyńyz Qazaq­stan­nyń taǵy bir ataqty boks­shysy, ózińizdiń jerlesińiz Ra­shıd Kabırov bolǵan desedi...

– Dáp solaı. Ekeýmiz bir aýyl­dyń týmasy ekenimiz bylaı tursyn, tipten bir kósheniń boıynda turdyq. Jaqsy aralastyq, dos boldyq. Áli de syılastyǵymyzǵa syzat túsken joq. Rashıd menen bir jas úlken. Ekeýmizdiń jolymyz únemi respýblıkalyq jáne odaqtyq deńgeıdegi dodalarda qıysatyn. Alǵashqy kezder ol utyp júrse, keıinnen meniń asyǵym alshysynan tústi. Kezinde Kabırovtyń da óte myqty boks­shy bolǵanyn jurt jaqsy biledi. Ol – Eýropa chempıonatynyń qola júldegeri, KSRO halyqtary spartakıadasynyń jeńimpazy, KSRO chempıonatynyń qola júl­degeri. Rashıd Kabırovtaı qa­rym­dy jigitpen ıyq tirese júrip, me­niń de sheberlik deńgeıim artty.

– Alǵashynda Ámirhan Tó­lenovten tálim-tárbıe alǵa­ny­ńyz jaıynda joǵaryda aıt­tyńyz. Al dańqty Serik Qonaq­baevtyń jeke bapkeri Iýrıı Shaıdyń qol astynda qaı kezden beri jattyǵa bastadyńyz?

– Bul da bir qyzyq hıkaıa. 1982 jyly jastar arasyndaǵy Eýropa birinshiligi qarsańynda ótken sparrıngte men Rashıd Kabırovtan basym tústim. So­dan Germanııaǵa barýym kerek edi. Oqý-jattyǵý jıyny ótip jatqan kezderdiń birinde Iýrıı Shaı maǵan kelip, jolymdy óz shákirtine berýdi ótindi. Men ol kisige «Jolymdy bereıin. Biraq meniń de bir ótinishim bar. Aldaǵy dodalarǵa siz meni baptańyz» – dep jaýap qaıtardym. Dańqty bapker: «Aldymen ózińniń jeke jattyqtyrýshyńmen aqyldas. Ol ruqsat berse, men qarsy emes­pin», – dedi. Jany jaısań Ámir­han aǵa bar jaǵdaıdy túsindi. Barlyǵymyz úlken bir dastarqan basynda aqyldasa otyryp, ortaq mámilege keldik. Sóıtip men Shaı­­dyń qaramaǵyna óttim.

– Jasóspirimder men jastar arasyndaǵy talaı dúbirli dodada júlde alǵanyńyz týraly biraz áńgimeledińiz. Endi eresekter dýyna qalaı qosylǵanyńyz jaıynda aıtyp berseńiz?

– Qazaqstannyń jas­tar quramasynda Ábdirashıd Ábdirah­manovtyń jáne KSRO komandasy sapynda Konstantın Kopsevtiń qol astynda jattyǵyp, ábden ysyldym. Basqasyn aıtpaǵanda, beltemirde 100 ret tartylyp, 300 ret «otjımanıe» jasaıtyndaı jaǵdaıǵa jettim. Bir sózben aıtsaq, fızıkalyq daıarlyǵym óte kúshti boldy. Osyndaı mektepten ótkennen keıin eresekter dýyna qosylý aıtarlyqtaı qıyndyq týǵyza qoıǵan joq. Bul rette alǵashqy ret 1982 jyly Cheho­slovakııaǵa sapar shektim. Ýste nad Labe qalasynda ótken asa iri halyqaralyq týrnırdiń jartylaı fınalynda Vengrııanyń jas juldyzy, keıinnen Seýl Olımpıadasynyń qola júldegeri atanǵan Robert Ishasegıdi birinshi raýndta uryp-jyqtym. Fınalda rýmynııalyq Marıan Rotarýdy básekeniń basynan aıaǵyna deıin qýyp júrip sabap, 5:0 esebimen jeńiske jettim. Taǵy bir jaýap­ty jarys qarsańynda uıym­dastyrylǵan sparrıngte Máskeý Olımpıadasynyń jeńimpazy Shámil Sabırovtan basym tústim. Osy jeńisterimniń kýási bolǵan bas bapker Artem Lavrov meni KSRO quramasyna qabyldady. So­nyń arqasynda AQSh pen KSRO qu­ramalary arasynda ótken eki birdeı matchtyq kezdesý­de kúsh synasý qurmetine ıe boldym.

– Eger qatelespesem, alǵash ret eresekterdiń KSRO chempıonatyna qatysqan kezde-aq jeńis tuǵyryna kóterildińiz emes pe?

– Iá, solaı. 1983 jyly KSRO halyqtary spartakıadasy men chempıonaty birge ótti. Más­keýde jalaýy jelbiregen ja­rysta úshinshi orynǵa taban tiredim. Negizi, jartylaı fınalda armenııalyq Artýr Dımaksıandy utqan edim. Alaıda tóreshiler bura tartyp, qarsylasymnyń qo­lyn kóterdi. Desek te alǵash ret osyndaı iri dodaǵa qatysyp otyrǵan bozbala úshin osynyń ózi úlken jetistik edi. Al 1984 jyly Tashkentte uıymdastyrylǵan Odaq birinshiliginiń dál sol me­je­sinde ekeýimizdiń jolymyz qaıta qıysty. Sol jekpe-jekte jaqsylap turyp Dımaksıannyń sazaıyn bergen edim. Fınalda Nshan Mýnchıandy jeńip, KSRO chempıo­ny atandym. Bir qyzyǵy, asa jeńil salmaqta jeńis tuǵyryna kóterilgen tórt boksshynyń úsheýi armıan jigit edi. Atap aıtsaq, Nshan Mýnchıan – kúmis, Artýr Dı­maksıan men Lernık Papıan – qola medal aldy. Al sol Qap taýy qyrandarynyń barlyǵynan qazaq oǵylandarynyń tuǵyry bıik boldy (keıipkerimiz qushtar­lana kúldi). Al eń bastysy, Tash­kent tórinde ózim pir tutqan Se­rik Qonaqbaevpen birge, Serik Nur­qazov pen Asylbek Qılymov ta altyn medaldy moıyndarynda jarqyratty.

– Tarıhqa júginsek, asa jeńil salmaqta kúsh synasqan Qazaqstannyń boksshylary arasynan KSRO-nyń tuńǵysh chempıony siz ekensiz...

– Aıtýly jarysta aldy­myzdaǵy aǵalarymyzdyń birazy jeńis tuǵyryna kóterilgeni má­lim. Jandos Kókimov, Vasılıı Pla­kýshıı, Marat Jaqsybaev, Berik Jamanqulov syndy sań­laqtar kúmis pen qola medaldardy moıyn­daryna ildi. Al bas júldeni oljalaý baqyty ma­ǵan buıyrǵan eken. Áli esim­de, men KSRO chem­­pıony atan­ǵanda kezinde 48 kılo salmaq dáre­jesinde atoı salyp, óreli óner­lerimen talaı kórermendi qýant­qan Janos Kókimov pen Bolat Saǵyndyqov aǵalarymyz dál óz­deri altyn alǵandaı qatty qýanǵan edi.

– Jer sharynyń altydan bir bóligin baýyryna basqan alyp ımperııanyń basty dodasynda tórt birdeı qazaq ji­giti altyn tuǵyrda marqaıyp tur­ǵanda, barsha Qazaqstan hal­qy men Alash jurtynyń abyroıy asqaqtap, mereıi ósken edi. Sol sátte siz de Olımpııa oıyndarynda atoı salýdy armandaǵan bolarsyz?

– Máskeýdegi jarysta bas júl­demen qatar, sol jyly Los-Andjeleste alaýy tutanýǵa tıis Olımpııa oıyndarynyń da joldamasy da ýysymyzǵa túskende erekshe shattandyq. Tórtjyldyqtyń basty dodasyna «tórt qazaq qol ustasyp baratyn boldy» dep barsha jurt qýandy. Biraq bul qýanyshymyz uzaqqa sozylmady. Sodyr saıasattyń saldarynan Olımpıadanyń bastalýyna bir aı ǵana ýaqyt qalǵanda Amerıkaǵa barmaıtynymyz belgili boldy. KSRO bastaǵan sosıalıstik baǵyttaǵy memleketter boıkot jarııalǵan eken. Oǵan biz qatty kúıindik, ashyndyq. Biraq qoldan keler dármen joq. Al Olımpııa oıyndarynda bizdiń jigitterden san márte taıaq jegen ózge eldiń ókilderi birinen keıin biri jeńis tuǵyryna kóterilgenin kórgende, ókinishten ózegimiz órtendi.

– Esesine sosıalıstik baǵyt­taǵy memleketterdiń basyn qos­qan «Dostyq» oıyndaryna qa­­tysyp, kúmis medaldy olja­la­dyńyz. Sol jarysta jeńip al­ǵan júlde sál bolsa da kóńi­lińizdi kótergen shyǵar?

– Gavanada ótken jarystyń da deńgeıi óte joǵary boldy. Sarapqa salynǵan 12 bas júlde­niń 11-in kýbalyqtar oljalady. Bir altyndy nemis boksshysy enshiledi. Serik Nurqazov ekeýmiz kúmis medaldy ıelensek, Serik Qonaqbaev úshinshi orynǵa taban tiredi. Biraq Olım­pıadanyń jóni bólek qoı. Báribir kóńilde bir kirbiń qaldy. Desek te Bostandyq aralynda qyzyqty oqıǵalar az bolǵan joq. Sol jerde dańqty revolıýsıoner Fı­del Kastromen betpe-bet kez­desýdiń reti keldi. Kýba kóseminiń óz aýzynan qazaqtyń batyry Baýyrjan Momyshulyn erekshe qur­metteıtinin estigende, keýde­miz­di aıryqsha bir maqtanysh se­zimi kernedi.

– «Dostyq» jarysynda júl­de alǵandardyń barlyǵyna KSRO-ǵa eńbek sińirgen sportshy ataǵy berilgen eken. Sol ataq jal­ǵyz sizge ǵana buıyr­mady. Nege?

– Ol jaǵy maǵan da belgisiz. Kýbadan oralǵannan keıin «Dos­tyq» oıyndarynda atoı salǵan sańlaqtar «Taras Býlba» kemesine minip, Odessadan Bolgarııanyń Varna qalasyna attandy. Qara teńiz jaǵalaýynda 15 kún boıy saýyqtyrý jıyny ótti. Sondaı shýaqty kúnderdiń birinde saltanatty jıyn uıymdastyrylyp, Bostandyq aralynda júlde alǵandardyń barlyǵyna KSRO-ǵa eńbek sińirgen sportshy ata­ǵy berildi. Sol jerde tek meniń esimim atalmaı qaldy. Sóıt­sem, osy iske jaýapty azamat­tar meniń qujattarymdy tıisti mekemege ótkizbepti. Bul qasa­qana túrde jasalǵan áreket ekeni túsinikti. Barlyq pále ózge­lerden emes, ózimizden keldi. Osylaısha, barlyq sportshy qýanyp jatqanda, men elge kóńili qulazyǵan kúıde oraldym.

– Sonda sol ataq sizge múlde buıyrmady ma?

– Buıyrmady. KSRO qurama­sy sapynda óner kórsetip júr­gen kezimde jarystar men jıyn­dar­dan qolym bir bosamady. Al sport salasynyń tizginin usta­ǵan basshylardyń bul ispen aına­lysýǵa zaýqy soqpady. Sodan Keńes Odaǵy kelmeske ketti. Áıteýir, araǵy 26 jyl ótkende ádildik ornady. 2012 jyly Qazaq­stanǵa eńbek sińirgen sportshysy ataǵy maǵan tabys etildi.

– 1985 jyly qos birdeı baı­raqty básekeden oljaly oral­dyńyz. Býdapeshtte ótken Eýropa chempıonaty men Seýlde uıym­dastyrylǵan álem kýbogynda qola medaldi ıelendińiz. Osy jarystarda bas júlde úshin talasýǵa ne kedergi boldy dep oı­laısyz?

– Býdapeshttegi birinshiliktiń bastapqy básekelerinde qarsy­lastarymdy aıqyn basymdyqpen utyp, jartylaı fınalda ger­manııalyq Rene Braıtbartpen kúsh synastym. Ony eki ret nokdaýnǵa jibergenimen, ózim eki ret eskertý aldym. Nátıjesinde jeńis nemis boksshysynyń ýysynda ketti. Seýlde taılandtyq Shýpap Voondordqa ese jiberdim.

– Odan keıingi jyldary taǵy qandaı belesterdi baǵyn­dyrdyńyz? Jalpy Seýl Olım­pıadasyna qatysýǵa múmkin­digińiz boldy ma? Sony bileıin degenim ǵoı...

– 1986 jylǵy KSRO chempıonatynda qola medaldi ıelen­dim. Shırek fınalda Iýrıı Arba­chakovtan aılamdy asyryp, jartylaı fınalda Nshan Mýn­chıandy sabadym. Alaıda tóreshiler uzaqqa deıin keńesip, aqyry eshkimniń qolyn kótermedi. Ekeýimiz eki jaqqa kettik. Bul jerde bir shıkiliktiń baryn meniń ishim sezdi. Erteńinde armenııalyq boksshy aqtyq synda máskeýlik Aleksandr Mahmýdovpen aı­qasty. Sol jyly Máskede alaýy tutanǵan Izgi nıet oıyndarynda kúmis medaldi enshiledim. 1987 jyly KSRO kýbogynda bas júldeni oljalap, 1988 jyly KSRO chempıonatynda qola me­daldi ıemdendim. Osy jarys­tarda top jara almaǵandyqtan, Olım­pııa oıyndarynan shet qaldym.

– Seýl Olımpıadasyna da jolyńyz túspegennen keıin sharshy alańnan múlde kórinbeı kettińiz ǵoı...

– Ádiletsizdik ataýly meniń jolymda kóp kezdesti. Kóp jaǵ­daıda qarsylastardan emes, tóre­shilerden «taıaq jedim». Bizdiń kezi­mizde asa jeńil salmaqta ishki jarystyń ózinde básekelestik óte kúshti boldy. Shámil Sabırov, Rashıd Kabırov, Nshan Mýnchıan, Artýr Dımaksıan, Lernık Papıan, Iýrıı Arbachakov, Aleksandr Mahmýdov, Sergeı Iýn, Anatolıı Fılıppov, Rýdık Kazandjıan, Keneshbek Dúısheev, Shaıbek Qa­raǵazıev... qaı-qaısyn alsa­ńyzdar da myqty boksshylar. Aldy – Olımpıada men álem chempıonattaryn utsa, qalǵandary keminde KSRO birinshiliginde júldegerler qataryna qosyldy. Ár jyldary men osylardyń barlyǵyn da uttym. Keıinnen Mýnchıan men Alek­sandr Mahmýdovtyń ta­sy órge domalady. Álemdik deń­geıdegi dodalarǵa ekeýi alma-kezek baryp júrdi. Seýldegi oıyn­dar qarsańynda ótetin oqý-jat­­tyǵý jıyndarynda ózim­niń myq­tylyǵymdy san márte dáleldedim. Armenııalyq boksshymen «jan alysyp, jan berisip» aıqassaq, Reseı ókiliniń eki aıaǵyn bir etikke tyǵatynmyn. Alaıda qurama bap­kerleriniń ishteri maǵan bir jylymaı-aq qoıdy.

– Úlken sportan qol úzgen eki jyl aralyǵynda nemen shuǵyldadyńyz?

– Ol kezderi QazMÝ-diń zań fakýltetiniń stýdenti edim. Oqýym­dy jalǵastyryp, qolyma dıplom aldym. Bar bitirgen sharýam sol.

– 1990 jyly Lýskidegi KSRO chempıonaty esimizde. Sharshy alańǵa qaıta oralǵan Kárimjan myqtylardy sy­pyra utyp, kúlli qazaq jan­kúıer­lerin taǵy bir qýantty...

– Onyń da óz tarıhy bar. 1989 jyly jaqyn dosym Tileýǵazy Seksenbaev jáne taǵy birneshe jigit KSRO chempıonatyn kórý úshin Bishkekke sapar shektik. Barlyq básekeni basynan aıaǵyna deıin tamashaladyq. Asa jeńil salmaqta Nshan Mýnchıan top jarsa, Aleksandr Mahmýdov kúmis aldy. Qyrǵyzstannyń qos boks­shysy úshinshi orynǵa jaıǵasty. 51 kılo salmaq dárejesinde bola­shaq álem jáne Eýropa chempıony, kásipqoılar arasynda eń beldi nusqalar boıynsha kóptegen altyn belbeýdi ıelengen Iýrıı Arbachakovqa teń keler eshkim tabylmady. Osynyń bárin kórgen Tileýǵazy: «Kezinde osy jigitterdiń barlyǵy da Kárimjannan taıaq jegen edi. Al qazir olar – juldyz, al seni jankúıerler umyta bastady», – dep til qatty. Dosymnyń osy biraýyz sózinen keıin men kádimgideı oılanyp qaldym. Sharshy alańǵa qaıta oralýǵa bekindim. Nesi bar, qartaıyp turǵanym joq. Jasym nebári 26-da. Kúsh-qýatym boıymda. О́zim qatarly, tipten menen de eresek jigitter judyryqtasyp júr ǵoı. Olardan qaı jerim kem? Osylaı oı túıindedim de, Almatyǵa oralǵan bette qaıta jattyǵý zalyna bettedim.

– Uzaqqa sozylǵan úzilisten keıin babyńyzǵa qaıta kelý qıyn bolǵan joq pa?

– Ol kezde salmaǵym 65 kıloǵa jetip qalǵan. Men úshin eń qıyny osy boldy. Artyq salmaqtan arylý úshin janymdy salyp jat­tyqtym. Kúnde Medeýge jú­gir­dim, saǵattap monshada býlandym, sport zalynda aıanbaı ter tóktim. Shyny kerek, kópti kórgen kánigi mamandardyń ózderi alǵashynda maǵan kúle qarady. Eshkim senbedi. Biraq men alǵan betimnen qaıtpadym. Jankeshti jattyǵýlardyń arqasynda sal­maǵym retke keldi. Sodan soń elishilik irikteý jarysynda dara shyqtym. Joldamaǵa ıelik etkennen keıin Lýskige attandym. Aıtýly jarysta barlyq jekpe-jekte jeńiske jetip, fınalda chıtalyq Anatolıı Fılıpovtan basym tústim. Sóıtip KSRO-nyń eki dúrkin chempıony atandym. Al 1991 jyly qazanda ótken Odaq birinshiliginde qola medaldy enshiledim. Sóıtip, 27 jasymda bylǵary qolǵabymdy shegege ildim.

– Úlken sporttan qol úzgen­nen keıin birden bapkerlik qyzmetti tańdadyńyz ba?

– 1992-1999 jyldar araly­ǵynda asa aýyr salmaqta judy­ryq­tasqan ózimniń dosym ári jer­lesim, KSRO chempıonatynyń eki dúrkin qola júldegeri, bir­qatar halyqaralyq jarys pen KSRO-AQSh matchtyq kezdesýdiń jeńimpazy Serik О́mirbekovti jattyqtyrdym. Ol Qazaqstan chem­pıonaty men Galledegi asa iri týrnırdiń bıik tuǵyryna kó­terildi. 1997 jyly álem chempıo­natynda shırek fınalǵa deıin jetti. Iá, ol dosymnyń áleýeti óte zor, júreginiń túgi bar edi. О́zi susty, soqqylary da óte aýyr. Oǵan qarsy shyqqandardyń eshqaısysy ashyq aıqasqa barmaıtynyna dúıim jurt kýá. Barlyǵy Serikten seskenetin. Biraq О́mir­bekovtiń de joly aýyr boldy. Ol da talaı jaýapty jarystan shettetilip, sharshy alańdaǵy óz nesibesin tolyqtaı ala almaı ketti. Sodan sporttan qol úzdi. Al men jat­tyq­ty­rýshylyqpen qatar, qazylyq qyz­metti de atqar­dym. AIBA tó­reshisi jáne Qazaq­stannyń ult­tyq komandasynyń bapkerler shtabynda boldym. Qazirgi kezde Almaty qalasynda ornalasqan «Shańyraq» shaǵyn aýdanyndaǵy sporttaǵy daryndy balalarǵa ar­nalǵan maman­dandyrylǵan mek­tep-ınternatta eńbek etip júrmin.

– Áńgimeńizge rahmet.

 

 

Banner
Sońǵy jańalyqtar

Taǵylymdy tulǵa

Rýhanııat • Búgin, 09:36

Ǵylym qanatyndaǵy ǵumyr

Rýhanııat • Búgin, 09:34

Moıynqumǵa ushaq qatynaıdy

Aımaqtar • Búgin, 09:29

«Para berme» chellendji bastaý aldy

Aımaqtar • Búgin, 09:27

Kásipodaq úzdikteri marapattaldy

Aımaqtar • Búgin, 09:26

Bı-aǵa salǵan án eken...

Rýhanııat • Búgin, 09:17

Qaıta oralǵan «Don Karlos»

Rýhanııat • Búgin, 09:15

Jeti óner qonǵan jampozym

Rýhanııat • Búgin, 09:12

Taǵdyry tańdalǵan patshaıym

Rýhanııat • Búgin, 09:09

Naǵyz qazaq

Rýhanııat • Búgin, 09:05

«Brakoner» biraz basbuzardy quryqtady

Aımaqtar • Búgin, 09:00

Reseıden de úırenýge bolady

Saıasat • Búgin, 08:52

Zań jobasyn talqylady

Qoǵam • Búgin, 08:46

IýNESKO-nyń syılyǵyn jeńip aldy

Qazaqstan • Búgin, 08:45

«Eńbek» eleýsiz qaldy

Qoǵam • Búgin, 08:43

Robot-tehnıka úıirmeleri qajet pe?

Qazaqstan • Búgin, 08:26

Qurylysshylar nege ereýilge shyqty?

Qazaqstan • Búgin, 08:24

«Januıa» ortalyǵy jumysyn bastady

Qoǵam • Búgin, 08:22

Kedergisiz ómir syılaıdy

Qoǵam • Búgin, 08:22

Reformalar oza shabýdy kótermeıdi

Qoǵam • Búgin, 08:19

Azamattyq jaýapkershilik qajet

Qoǵam • Búgin, 08:16

Ashyq qoǵam aıshyqtary

Búgin, 08:14

Tazalyqtan aldyna jan salmaıtyn jurt

Qoǵam • Búgin, 08:08

Jaldamaly jumysshylar jalaqysy artty

Ekonomıka • Búgin, 08:05

Sheteldik taýarlar qymbattady

Ekonomıka • Búgin, 08:03

Ekonomıkalyq ósimniń kóleńke tusy

Ekonomıka • Búgin, 08:00

Baspana baǵasy nege kóterildi?

Qoǵam • Búgin, 07:58

Yntymaqtastyqtyń jańa kezeńi

Qazaqstan • Búgin, 07:52

Eń qysqa áńgime. Qanat Ábilqaıyr

Eń qysqa áńgime • Keshe

Eń qysqa áńgime. Arman Álmenbet

Eń qysqa áńgime • Keshe

Uqsas jańalyqtar