Taraptar ınvestısııalyq jáne saýda-ekonomıkalyq yntymaqtastyqty damytý máselelerin, onyń ishinde bıylǵy 1 qazanda Erevan qalasynda Eýrazııalyq ekonomıkalyq odaq pen Sıngapýr arasynda qol qoıylǵan erkin saýda týraly kelisim ratıfıkasııalanǵannan keıingi EAEO – Sıngapýr formatyndaǵy eki eldiń ózara is-qımylynyń perspektıvalaryn talqylady.
«Tuńǵysh Prezıdent Nursultan Nazarbaev Sıngapýrmen yntymaqtastyqqa únemi zor kóńil bóldi jáne Premer-Mınıstr Lı Kýan Iýmen jeke dos boldy, osynyń arqasynda eki eldiń arasyndaǵy qarym-qatynastar oıdaǵydaı damyp jatyr. Memleket basshysy Qasym-Jomart Toqaev ta syrtqy saıasattaǵy sabaqtastyqty ustana otyryp, Sıngapýrmen yntymaqtastyqty tıimdi damytýǵa kóp kóńil bólip keledi», dedi A. Mamın.
Qazaqstan Sıngapýrdyń Ortalyq Azııadaǵy asa iri saýda-ekonomıkalyq seriktesi, ekijaqty saýda aınalymy 2018 jyldyń qorytyndysy boıynsha $520 mln-nan asty. Bıylǵy maýsym aıyndaǵy jaǵdaı boıynsha Sıngapýrdan Qazaqstan ekonomıkasyna túsken tikeleı sheteldik ınvestısııalar kólemi úsh esege jýyq – $28,5 mln-nan $80,7 mln-ǵa deıin artty.
Úkimet basshysy sıngapýrlyq tarapty «Astana» halyqaralyq qarjy ortalyǵyna óziniń qatysýyn belsendi arttyrýǵa, eki eldiń iskerlik ortalarynyń arasynda tyǵyz baılanystar ornatýǵa, Qazaqstannyń kólik jáne turǵyn úı ınfraqurylymyn jańǵyrtý boıynsha ınvestısııalyq jobalarǵa qatysýǵa shaqyrdy.
Premer-Mınıstr tikeleı sheteldik ınvestısııalar men saýda kóleminiń ósýin qamtamasyz etý Qazaqstan Úkimeti jumysynyń basym baǵyttarynyń biri ekenin atap ótti.
Úkimet basshysy Sıngapýr ókilderin aldaǵy ýaqytta, 2020 jyly maýsym aıynda Nur-Sultan qalasynda ótetin Dúnıejúzilik saýda uıymynyń XII Mınıstrler konferensııasyna qatysýǵa shaqyrdy.
