Sýretti túsirgen Rafhat HALELOV
Aqjaıyq, Báıterek, Terekti aýdandarynyń túrli eńbek ujymdaryn aralap, halyqpen júzdesken Úkimet delegasııasy óńirde memlekettik baǵdarlamalar men Prezıdenttiń tapsyrmasy qalaı oryndalyp jatqanyna nazar aýdardy.
Báıterek aýdanynyń Darııan aýylyna barǵan Premer-Mınıstrdiń orynbasary B.Saparbaev aýyldaǵy arnaýly əleýmettik kómek kórsetý ortalyǵymen tanysty. Odan keıin Mədenıet úıinde Memleket basshysynyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýyna baılanysty jıyn ótti. Eńbek jəne halyqty əleýmettik qorǵaý mınıstri B.Nurymbetov AƏK jaıly keńirek túsindirip berdi. Búginde elimizde 400 myńnan astam otbasy – 2 mıllıondaı adam jańa úlgidegi ataýly əleýmettik kómek alyp jatyr eken.
– Ataýly áleýmettik kómek tólenetin 1 mln 300 myń balanyń 60 paıyzy – kóp balaly otbasylarǵa tıesili. Iаǵnı osy sanattaǵy otbasylar muqtaj bolyp otyr. Kelesi jyly tabys kólemine qaramaı 4 nemese odan da kóp balasy bar otbasylarǵa AƏK taǵaıyndaımyz. Ər balaǵa 11 myń teńgeden tólenedi. Kirisi az otbasylardyń balalaryna kepildendirilgen kómek beriledi. Əleýmettik pakette tamaq, kıim-keshek, gıgıenalyq quraldar qamtylady. Kepildendirilgen kómek əleýmettik karta – sertıfıkat arqyly beriledi, – dedi B.Saparbaev.
Premer-Mınıstrdiń orynbasary elimizde ekonomıkalyq qıyndyqtarǵa qaramastan halyqtyń əl-aýqatyn arttyrýǵa kóńil bólinip jatqanyn, bıylǵy bıýdjet qarajatynyń 40 paıyzy əleýmettik salaǵa baǵyttalǵanyn aıtty.
Aqjaıyq aýdanynyń ortalyǵy Chapaev aýylynda jergilikti dárigerlermen kezdesken Densaýlyq saqtaý mınıstri E.Birtanov ta elimizde medısına salasyn damytýǵa kóp kóńil bólinip jatqanyn aıtty. Ásirese jas mamandardyń turǵyn úımen qamtamasyz etilýi basty nazarda. Mınıstr aýylǵa kelgen jas mamandarǵa eń aldymen baspana berilýi qajet dedi. Aýdan ortalyǵyndaǵy emhana men aýrýhananyń ujymymen júzdesken mınıstr medısına salasyn sıfrlandyrý, emdelýshilerdiń áleýmettik medısınalyq saqtandyrý júıesindegi mártebesin aıqyndaýdy avtomattandyrý barysyn tekserdi. Sonymen birge kadr jetispeýshiligin boldyrmaý úshin medısınalyq joǵary oqý oryndarynyń stýdentterimen qazirden bastap, baılanys ornatýdy tapsyrdy.
B.Saparbaev pen E.Birtanov Batys Qazaqstan oblystyq balalar aýrýhanasynda da jergilikti dárigerlermen kezdesti. Bul jerde áńgime mindetti áleýmettik medısınalyq saqtandyrý júıesin damytý týrasynda órbidi. Terekti aýdanyndaǵy bilim mekemeleriniń jumys barysymen tanysqan Bilim jáne ǵylym vıse-mınıstri Sh.Karınova úsh aýysymda bilim beretin Podstepnyı qazaq mektebiniń jaǵdaıyn kózimen kórdi. Oral qalasynda belsendi jastarmen júzdesken B.Saparbaev memleket tarapynan jastarǵa qamqorlyq júıeli jalǵasatynyn aıtty.
– «Jas kelse – iske» degen, sizderdiń boılaryńyzda túrli ıdeıa únemi qaınap turady. Alda Eriktiler jyly kele jatyr. Eriktilerdiń kóp bóligi – jastar. Túrli qaıyrymdylyq sharalardyń basynda jastar júredi dep senemin. Memlekettik baǵdarlamalar kómegin tıimdi paıdalanyp, jańa kəsip bastańyzdar. Jastar saıasatyn damytýǵa baǵyttalǵan usynystardy biz árdaıym qoldaımyz, – dedi ol.
Mádenıet jáne sport vıse-mınıstri N.Dáýeshov Qadyr Myrza Áli atyndaǵy mádenıet jáne óner ortalyǵynda boldy. Aqyn atyndaǵy ádebı-memorıaldyq kabınetti aralap, birtýar qalamgerdiń muralarymen qatar, jergilikti aqyn-jazýshylar týraly derektermen, jádigerlermen tanysty.
Qazaqstan Respýblıkasy Kúıshiler odaǵy BQO fılıalynyń tóraǵasy Asqar Kenjeǵalıev N.Dáýeshovke mınıstrlik tarapynan «Halyq kúıshisi» memlekettik ataǵy, Qurmanǵazy, Dına atyndaǵy tósbelgiler bekitilip, olardy óner maıtalmandaryna berýdi usyndy. Sondaı-aq Oral qalasynda Qurmanǵazy mýzeı-ortalyǵyn jáne alyp dombyra monýmentin turǵyzý, Oral qalasynda batys aımaqtyq-respýblıkalyq mýzykalyq mektep-ınternat keshenin ashý týraly usynysyn aıtty.
Aqjaıyq óńirinen shyqqan tanymal tulǵalardy ulyqtaý týraly usynysty belgili aqyn, Qadyr Myrza Áli atyndaǵy mádenıet jáne óner ortalyǵynyń basshysy Baýyrjan Halıolla da aıtty. Keler jyly 100 jyldyǵy atap ótiletin aqyn Juban Moldaǵalıevke Almaty qalasynda eskertkish ornatýdy suraǵan usynysty halyq qol shapalaqtap qoldady.
Úkimettik delegasııanyń qorytyndy jıyny Jáńgir han atyndaǵy Batys Qazaqstan agrarlyq-tehnıkalyq ýnıversıtetinde ótti. Oblystyń ár óńirinde halyqpen júzdesken B.Saparbaev halyqtyń kóńil kúıi jaman emestigin, memlekettik baǵdarlamalar men Elbasy tapsyrmasy retimen júrgizilip jatqanyn aıtty.
– Elbasymyzdyń «Aldymen ekonomıka, sonan soń saıasat» degen ustanymyn jaqsy bilesizder. Qazaqstannyń ekonomıkasy júıeli damyp keledi. Bıyl el ekonomıkasynyń damý deńgeıi – 4,1% boldy. Prezıdent Qasym-Jomart Toqaev bul kórsetkishti 5 paıyzǵa jetkizýdi tapsyrdy. Osy el tabysynyń negizgi bóligi halyqty áleýmettik qorǵaýǵa, ál-aýqatyn jaqsartýǵa jumsalady, – dedi B.Saparbaev.
Vıse-premer Qazaqstanda daryndy balalardy, ásirese aýyl oqýshylaryn qoldaýǵa erekshe kóńil bólinetinin aıtty. Qazaqstan Respýblıkasynyń Tuńǵysh Prezıdenti qory men Úkimet birlesip «El úmiti» atty jobany iske qospaq. «Bul joba arqyly myńdaǵan daryndy balaǵa qoldaý kórsetemiz», dedi B.Saparbaev.
Úkimet delegasııasynyń jergilikti zııaly qaýym ókilderimen kezdesýinde Batys Qazaqstan oblystyq analar keńesiniń tóraıymy Shalqyma Qurmanálına, aqyn Baýyrjan Halıolla, jýrnalıst Janar Dáýletova sóz alyp, usynys-pikirlerin ortaǵa saldy. Premer-Mınıstrdiń orynbasary memlekettik baǵdarlamalardy qurýda, júzege asyrýda halyq arasynan aıtylǵan usynystardyń eskeriletinin aıtty.
Batys Qazaqstan oblysy
