Bul quraldy elimizdiń kez kelgen turǵyny paıdalana alady. Arnaıy plagınniń qurylǵany týraly «Áleýmettik medısınalyq saqtandyrý» KEAQ Aqparattyq júıelerdi damytý departamentiniń dırektory Aıdar Aıtýev aıtyp berdi.
– Bul plagındi qurýdaǵy maqsat qandaı, halyqqa berer paıdasy bar ma?
– Fýnksıonaldy turǵydan alǵanda, qural óte qarapaıym. Arnaıy resýrsqa kirip, ár turǵyn óziniń JSN nómirin engizse boldy, saqtandyrý mártebesin bile alady. Búgingideı barlyq adam gadjet qoldanatyn zamanda, bul yńǵaıly ári ýaqytty únemdeıdi. Eger «saqtandyrylǵan» degen jaýap kelse, onda alańdamaýǵa bolady. Al eger jaýap «saqtandyrylmaǵan» bolsa, onda sebebin anyqtaý kerek. Mysaly, azamattyń «jaldamaly jumysshy» degen mártebesi bar jáne bul úshin tólemdi jumys berýshi jasaıdy delik. Júıe arqyly jumysshy ózi jumys isteıtin uıymnyń ózi úshin medısınalyq saqtandyrýǵa tólem jasaǵanyn nemese jasamaǵanyn anyqtaı alady.
– Elimizdiń árbir turǵyny óziniń saqtandyrý mártebesin ne úshin qadaǵalap otyrýy kerek?
– 2020 jyldyń 1 qańtarynan Qazaqstanda MÁMS júıesi iske qosylady. Osy ýaqytqa deıin barlyǵymyz MÁMS júıesindegi saqtandyrý mártebemizdi anyqtap alýymyz kerek. Mysaly, adamǵa qandaı da bir syrqat boıynsha dıagnoz qoıyldy jáne oǵan medısınalyq kómek qajet boldy. Eger ol saqtandyrylmaǵan bolsa, onda bul adamǵa quramyna ýchaskelik dáriger, jedel kómek, shuǵyl stasıonarlyq kómek, áleýmettik mańyzy bar aýrýlar kezinde kórsetiletin medısınalyq kómek túrleri kiretin tegin medısınalyq kómektiń kepildik berilgen kólemi (TMKKK) qoljetimdi bolady. Al MÁMS paketi boıynsha beriletin medısınalyq kómek túrleri tek saqtandyrylǵan azamattarǵa ǵana qoljetimdi. Osylaısha eger siz MÁMS júıesinde ózińizdiń saqtandyrý mártebeńizdi anyq bilseńiz, 2020 jyldan bastap ózińizge qajetti barlyq medısınalyq qyzmetter spektrin ala alasyz.
– Bul quraldy paıdalaný qoljetimdi me, ıaǵnı kez kelgen jerden qosylýǵa bola ma?
– Plagın ámbebap formatta jasalǵan. Ol kez kelgen saıtqa tirkeýge yńǵaıly. Osy múmkindikti paıdalana otyryp, bul máselege qyzyǵýshylyq tanytqan barlyq saıt ıelerine aıtarym: «Eger sizder óz resýrstaryńyzda plagındi ornatqylaryńyz kelse, «Áleýmettik medısınalyq saqtandyrý» KEAQ-qa ótinish jaza alasyzdar. Baılanys úshin e-mail: p.andreev@fms.kz. Plagındi qarap kórip, zerdeleý úshin «MSQ» KEAQ-tyń www.fms.kz resmı saıtyn ashý kerek.
Daıyndaǵan
Dýman ANASh,
«Egemen Qazaqstan»
