Ortalyq Azııa Koreı túbegi úshin de úlgi bola alady

Forýmnyń ashylýymen qut­tyqtaý alǵysózinde Syrt­qy ister mınıstri Muhtar Ti­leý­berdi osymen 12-ret ótip jat­qan «Ortalyq Azııa – Ońtústik Ko­reıa» forýmynyń rólin nyǵaı­týǵa Qazaqstannyń kóp kúsh sa­lyp jatqanyn atap ótti. «Or­talyq Azııa elderiniń Koreıa Res­pýblıkasymen yntymaqtas­tyǵyn damytýdaǵy aıryqsha qa­rym-qatynasymyzǵa Qa­zaq­stannyń forýmǵa qatysý deń­geıin Syrtqy ister mınıstr­lerine deıin kóterýge bastama jasaýy dálel bola alady. Bizdiń oıymyzsha, «Ortalyq Azııa – Ońtústik Koreıa» forýmynyń alańy Koreıa Respýblıkasynyń Ortalyq Azııa elderimen serik­tes­tigin nyǵaıtýda tıimdi tetik qyzmetin atqarmaq», dedi óz sózinde Muhtar Tileýberdi.

Syrtqy ister mınıstri Muhtar Tileýberdi Ortalyq Azııa elderiniń kópǵasyrlyq or­taq tarıhy men mádenıeti memleketter arasyndaǵy ynty­maqtastyq pen dostyqtyń negizi sanalatynyn eske saldy. Sonymen birge Ortalyq Azııanyń qarqyndy ósip jatqan aımaqqa aınalǵanyn, búginde strategııalyq mańyzǵa, joǵary adamı jáne ekonomıkalyq áleýetke ıe ekenin aıtyp ótti. «Qazaqstannyń Tuńǵysh Prezı­denti – Elbasy Nursultan Nazarbaev pen Qazaqstan Prezı­denti Qasym-Jomart Toqaev óńirdegi eldermen baýyrlas­tyq qarym-qatynasty nyǵaı­týǵa aıryqsha nazar aýdarady. Bizdiń memleketterimizdiń kósh­basshylarynyń turaqty kez­desýleri jaqsy dástúrge aınal­ǵan. Senim men seriktestiktiń osy bir joǵary deńgeıin erekshe baǵalaımyz», dedi M.Ti­leý­berdi. Mınıstr osyndaı forýmdardyń nátıjesinde mem­leketter basshylary bes­jaqty áriptestik negizinde elder arasynda vızasyz rejim ornatyp, seriktestiktiń jarqyn bolashaǵyna bastaıtyn josparlar qurylǵanyn eske saldy. Oǵan qosa, Qazaqstannyń Koreı túbegindegi «beıbit prosesti» jáne Seýldiń koreıaralyq qaty­nastardy damytý ári óńir­degi shıelenisti tómendetý saıasatyn qoldaıtynyn jetkizdi. Elimiz úshin ıadrolyq qarý­dan azat beıbitshilikke qol jet­kizý basty basymdyq sanala­tyndyǵyn basa aıtty. «Qa­zirgi álemde qarýdyń osynaý túrine ıelik etý ústemdik­tiń kórsetkishi bolyp sanal­maıdy. Qaıta jahandyq qaýip­sizdikke qater tóndirip, halyq­aralyq qo­ǵamdastyqpen yntymaq­tas­tyqqa kedergi týdyrady. Osy­­ǵan oraı Ortalyq Azııada ıadro­­lyq qarýdan azat biregeı aımaq­tyń qurylýy Koreı túbegi óńiri úshin de úlgi bola alady», dedi mınıstr.

Jıyn sońynda BAQ ókil­derine suhbat bergen Syrtqy ister mınıstrliginiń ókili Aı­bek Smadııarov 20 qyrkúıek kúni Ońtústik Koreıa astanasy Seýlde jeti jasar balany qaǵyp ketken 20 jastaǵy qazaqstandyqtyń tergeý ızolıatorynda ekenin málimdedi. Onyń aıtýynsha, qazir naqty sheshim aıtýǵa erte. Otandasymyzǵa qorǵaýshyny Koreıa tarapy usyn­baq. Qazaqstan konsýly­nyń aıyptalýshymen jáne tergeý­shimen kezdesetini belgili boldy. Aqparatqa súıensek, aıyptalýshy Koreıada zańsyz júrgen. Sonymen birge Aıbek Smadııarov búginde balanyń jaǵdaıy qalypty ekenin habarlady.