235 mıllıard teńge múgedek jandardy qoldaýǵa baǵyttalǵan

Qazirgi ýaqytta Qazaq­stan­da múgedektigi bar 690 myń adam turady. Olardyń ishinde eńbekke qabiletti jastaǵy – 424 myń adam, zeınetkerlik jastaǵy – 177 myń adam, 18 jasqa deıingi balalar – 89 myń adam.

2019 jylǵy 9 aıda múgedek­ti­gi boıynsha memlekettik áleýmettik járdemaqy tóleý­ge 198,1 mlrd teńge baǵyt­tal­dy. Aǵymdaǵy jyldyń 1 qazanyndaǵy jaǵdaı bo­ıynsha alýshylar sany 521 myń 153 adamdy qurady, járdemaqynyń ortasha mól­she­ri – 42 496 teńge. Bıyl bul maqsatqa 265,3 mlrd teńge qarastyrylǵan.

Eńbek jáne halyqty áleý­mettik qorǵaý mınıstr­li­gi­niń Áleýmettik qyzmetter depar­ta­mentiniń dırektory Artem Ábil­dı­nov­­tyń aıtýynsha, múgedektigi bar adamdar­dyń quqyqtaryn qamtamasyz etý jáne ómir súrý sapasyn jaqsartý boıynsha jumys keńinen júrgiziledi.

«Aǵymdaǵy jylǵy 1 shil­de­­den bastap múgedek ba­la­lar­dy jáne 18 jastan asqan bala kezinen birinshi topta­ǵy múge­tek­tigi bar adamdardy kútý bo­ıynsha mem­le­­ket­tik járdemaqy kólemi art­ty. Onyń mólsheri
41 578 teńgeni quraıdy. Búginde járdemaqynyń birin­shi túrin 27 mlrd teńge somasyna 84,7 myń adam, ekinshi túrin 4,3 mlrd teńge somasyna 13,5 myń adam aldy», dedi departament dırektory.

Jumys berýshiler tarapynan áleýmettik aýdarymdar júzege asyrylǵan azamattar eńbekke qabiletin joǵaltqan kezde de Memlekettik áleý­met­tik saqtandyrý qorynan (budan ári – MÁSQ) tólemder alatynyn aıta ketý kerek. 2019 jylǵy 9 aıdyń qorytyndysy boıynsha MÁSQ-dan 84 myń 139 adam 10,2 mlrd teńge somasynda járdemaqy aldy. Múmkindikteri shekteýli adam­dardyń áleýmettený deń­ge­ıin arttyrý maqsatynda olar tehnıkalyq kómekshi (ornyn toltyrýshy) quraldarmen jáne ońaltý qyzmetterimen qamtamasyz etiledi. 2019 jyly bul maqsatqa múgedektigi bar 125 530 adam úshin 7,5 mlrd teńge qarajat qarastyrylǵan. Jyl basynan beri osy baǵyt boıynsha 4,8 mlrd teńge ıgerildi.

Múgedektigi bar adamdardy áleýmettik qamsyzdandyrý júıe­siniń bir baǵyty – jar­tylaı stasıonar jáne úı jaǵ­daıynda arnaýly áleýmettik qyzmetter kórsetý. 2019 jyly osy maqsatqa respýblıkalyq bıýdjetten 1,2 mlrd teńge qara­jat qarastyrylǵan. Búgingi tańda mundaı qyzmetter jalpy somasy 688 mln teńge kóleminde 4 myńnan astam aza­matqa kórsetildi.

2030 jylǵa deıingi áleý­met­tik damý tujy­rym­da­mada 2025 jylǵa qaraı Qazaq­stan­da áleýmettik qyzmet­ter men áleý­met­tik kómek kór­­se­týdiń ıntegra­sııa­lan­ǵan mo­­­­de­­lin qurý kózdelgen. Artem Ábil­dınovtyń aıtýyn­sha, bul model áleýmettik qo­laı­­syzdyqtyń aldyn alýǵa baǵyttalǵan.

«Bilim berý, densaýlyq saqtaý, áleýmettik qorǵaý jáne basqa da salalardyń áleý­mettik qyzmetkerleriniń qyz­metin úılestirý tetigi ázir­lenedi, bul muqtaj aza­mat­tarǵa «jalǵyz tereze» qaǵıdaty boıynsha áleý­met­tik qyzmet kórsetýge múm­kindik beredi», dedi A.Ábil­dı­nov. Sonymen qatar ol qazir ınteg­rasııalanǵan mo­deldi engi­zý boıynsha qanat­qaq­ty joba elimizdiń 10 óńi­rin­de (Aqmola, Almaty, Batys Qazaqstan, Jambyl, Qa­ra­ǵandy, Qyzylorda, Qos­ta­naı, Pavlodar oblys­ta­ry, Almaty, Nur-Sultan qala­la­ry) iske asyrylyp jatqanyn aıtty.

Eske sala keteıik, qazannyń ekinshi jeksenbisi elimizde mú­ge­dektigi bar adamdar kúni bo­lyp belgilengen.