Osy oraıda is bastaımyn degen sheberlerdi qoldap, aıaǵynan turǵyzýǵa tyrysatyn, sondaı-aq kóp balaly analar men az qamtylǵan áıelderdiń jeke isin júrgizýge, óz múmkindikterin damytýyna jáne ulttyq qolónerdi nasıhattaýǵa kómektesetin áleýmettik joba – «Kórpe Fest» mega-festıvaliniń mańyzy zor.
Alǵash tusaýyn Nur-Sultan qalasynda kesken festıval óńirlerdegi jumysyn Aqtaý qalasynan bastady. Elimizdiń Eńbek jáne halyqty áleýmettik qorǵaý mınıstrligi men Mańǵystaý oblysy ákimdiginiń uıymdastyrýymen ótken festıval aıasynda oqytý semınarlary, tigin jáne qoldanbaly óner boıynsha sabaqtar ótkizildi, áleýmettik jelilerde bıznes júrgizý boıynsha sheberlik synyptary men kórmeler uıymdastyryldy.
Shara aıasynda tanymal etnodızaıner, «Altyn sapa» syılyǵynyń laýreaty Yrza Tursynzadanyń qolónershi izbasarlary daıyndaǵan buıymdar jármeńkesi ótti. Sonymen qatar «Analar amanaty» derekti serıalynan fılm kórsetilip, onda «Mádenı muralar men ulttyq qolónerdi jańǵyrtý» áleýmettik jobasy týraly aıtyldy.
Yrza Tursynzada men onyń shákirtteri Mańǵystaý oblysynyń tarıhı oryndary boıynsha ekspedısııa uıymdastyryp, olar «Beket Ata» meshitine óz qoldarymen tigilgen jastyqtar, kórpeler, ulttyq naqyshtaǵy jamylǵylar syılady. «О́li razy bolmaı, tiri baıymaıdy» deıtin halqymyzdyń babalar rýhyn qasterleıtin qalpyna saı jasalǵan syılyqtar endi meshitke kelgen jamaǵattyń qajetine jaraıtyn bolady.
Sondaı-aq elimizdiń tól mádenıetiniń damýyna zor úles qosyp júrgen batyr analarǵa «Amanat» qoǵamdyq qory atynan syılyq, eń ozyq tiginshilerge Mańǵystaý oblysy ákimdigi men «Tigin mashınalar úıi» atynan barlyǵy otyz tigin mashınasy, qarjylaı sertıfıkattar men alǵyshattar tabystaldy. Al qyz-kelinshekke arnalǵan eń ádemi kóılek tikken qatysýshyǵa arnap avtorlyq dızaında jasalǵan matalar syılyqqa tapsyryldy.
