Baıqaý eki kúnge sozyldy.Oǵan Qostanaıdan ózge Semeı, Almaty, Nur-Sultan, Jezqazǵan, Kókshetaý qalalarynan 15 jas ánshiler qatysty. Qazaq ulttyq óner ýnıversıtetniń professory, Qazaqstannyń eńbek sińirgen qaıratkeri, belgili jyrshy Almas Almatov bas bolǵan qazylar alqasynyń sharty boıynsha ár ánshi Nurjan Naýshabaevtyń bir ánin jáne halyq nemese halyq kompozıtorlarynyń bir shyǵarmasyn oryndaýy tıis edi. Búginge deıin asa keń taralmaǵan Nurjan ánderin jas ánshiler tez úırenip, naqyshyna keltire oryndady. Mysaly, Nurjannyń baıqaýda «Bátımaǵa», «Ara-aı», «Kóken-aı» taǵy basqa ánderin ánshilerdiń árqaısysy óz naqyshynda alyp shyqty.
Baıqaýdyń ekinshi kúni iriktelgender dodaǵa qaıta tústi. Ánshiniń bári dúldúl, bári bulbul bolsa da, máre bári birdeı kespeıtini bar.Sonymen úshinshi oryn kókshetaýlyq Názıra Beısenovaǵa, jezqazǵandyq Saǵymbaı Málibekov pen Qostanaı aýdanynyń ókili Janat Minaıdarǵa buıyrdy. Olarǵa árqaısysy 100 myń teńgeniń sertıfıkaty qosa tapsyryldy.Ekinshi oryndy Semeı qalasynyń ókili Tańat Muqashev pen nursultandyq Aqyltaı Zekenov bólisti, olardyń árqaısysy 200 myń teńgeniń sektıfıkatyn aldy. Birinshi oryndy almatylyq Zárına Rahmanberdıeva jeńip aldy. Oǵan 300 myń teńgeniń sertıfıkaty tapsyryldy. Al bas júlde Nur-Sultan qalasyndaǵy qazaq ulttyq óner ýnıversıtetiniń 2 kýrs stýdenti Farhat Jákishke 500 myń teńgeniń sertıfıkatymen birge tapsyryldy.
«Nurjan ánderi arqanyń ózge ánderinen óz boıaýymen erekshelenedi. Ol aldymen aıqaılap, qıqý salyp alady. Sondaı erekshelikterin jas ánshiler ashyp kórsete aldy. Ásirese, ol Nurjannyń «Kóken-aı», «Ara-aı» atty ánderinen baıqaldy. Osy kezge deıin asa zerttelmegen, nasıhaty da az bolǵan aqyn ári kompozıtor Nurjannyń ánderinen tuńǵysh baıqaý bolsa da ánshilerdiń aıaqalysy jaman bolǵan joq. Azdy-kemdi kemshilikterin elemeımiz, óıtkeni aldaǵy ýaqytta dástúrli ótetin baıqaýǵa áli talaı talanttar qatysatyn, kóshti túzeıtin bolady» dedi qazylar alqasynyń múshesi, nurjantanýshy Aqylbek Shaıahmet.
