Forýmǵa oblysqa belgili kásipkerler Jalǵas Dáýletov, Nurjan Edilov, Aıgúl Ilııasova qatysyp, qala kásipkerlerine, stýdentter men joǵary synyp oqýshylaryna óz jetistiginiń qupııasyn ashty.
-Qazir Qazaqstan boıynsha 22 dúkenimiz bar. 7 dúkendi ashqan soń, qalǵanyn franshıza baǵdarlamasymen berdim. Alǵash ret Aqtaýdan soń Jańaózennen kásip bastaǵan soń, bul qala maǵan ystyq. Jetistikke jetý joly ońaı emes. Biz óz qateligimizden sabaq alyp, úırengen kásipkerlermiz. Qazirgideı bıznes trenerler de bolǵan joq. Bıznes bastaý úshin kóp qarajat, úlken aýmaqty oryn, kóp taýar qajet dep oılasańyz, qatelesesiz. Biz de 500 sh.m. saýda alańymen bastap, ony 10 ese 50 sh.m. kishireıtip, 14 satýshy-qyzmetkerdi 3-ke azaıtyp, shyǵyndy únemdedik. Bıznes úshin tez satylatyn az taýar bolsa jetkilikti. Bızneste mańyzdysy-ýaqyt utý. Taýar kóp ýaqytty, aqshany ustap turmaýy kerek. 60-70 mln tg jumsaıtyn úlken dúkenderden góri 6-7 mln tg. jumsaıtyn kishigirim saýda orny, ótpeıtin taýardy tizimnen shyǵaryp, suranysqa ıe zatpen tolyqtyryp otyrý sııaqty qarapaıym ınstrýmentterdi qoldaný kerek.Taýardyń syrtqy álenýi men jarnama jasaý asa mańyzdy, «Domino» dúkender jelisiniń negizin qalaýshy Jalǵas Dáýletov.
Kezdesý ashyq formatta, suraq-jaýap almasý arqyly ótti. Zaldaǵy kórermender kásipkerlerge staýshy mamandardy tańdaý, úıretý, oqytý ádisterin surady. Iskerler bolsa, onyń jolyn izdemeı qarapaıym ǵana ádisine júginý qajettigin aıtty. Máselen, áleýmettik jelilerge, túrli toptarǵa maman qajettigi týraly tolassyz jazý, meılinshe úmitkerlerdi kóp jınaý. Kóptiń ishinen qabilettilerin tańdaý, bilmegenin úıretý eń ońaı ádis dep tabys kiltimen bólisti. Sonan soń kópshilik aldyna shyqqan «Baby bedding» brendiniń ıesi Aıgúl Ilııasova Máskeýden bitirgen joǵary bilim mamandyǵyn qoıyp, kásip ashqanyn tilge tıek etti. Oǵan ýaqyttyń ózi sebepshi bolǵan. Aıaǵy aýyr jáne kishkentaı eki balasy bar kelinshekke jumysqa turý ońaı bolmaǵan. «Sosyn burynnan boıynda bar tiginshilik qabiletimdi paıdalanyp sábılerge arnap kıimder, kórpeler tigip sata bastadym. Ony áleýmettik jelilerge shyǵaryp, brend deńgeıine kóterdim. Naqty maqsat pen tapjylmas talap bolsa, kez-kelgen kásipten paıda tabýǵa bolady, deıdi ol.
-«Atameken» UKP-y «Kásip túbi-násip» jańa jobasyn Jańaózende júzege asyryp jatqanyn erekshe atap ótý kerek. Kásipkerlerge qıyndyqty jeńip, jetistikke jetýge barlyq jaǵdaı jasalǵan, esik ashyq. Mamandyqty qaıta oqyp alamyn deseńizder de, múmkindik bar. «Jas kásipker» jobasy boıynsha Mańǵystaý oblysynda eń kóp qatysýshy Jańaózen qalasynda bolǵanyn aıtyp ótý kerek. Kásipker bolamyn degen azamattar bolsa, naryqqa beıimdelip, qoryqpaı kásip bastaýǵa shaqyramyn, deıdi «Kásip túbi - násip» jobasyn «Atameken»UKP birigip júzege asyrýshy Jańaózen qalalyq ákimdigi tarapynan ákim orynbasary Amanǵalı Nurdáýletov.
Sharaǵa kelgen joǵary synyp oqýshylaryna da paıdaly aqparat berildi. Bıylǵy oqý jylynan bastap, barlyq mektepterde «Kásipkerlik negizderi» páni oqytylyp jatyr. Demek, kásip bastaýdy mektep qabyrǵasynan bastap úırený, bıznes qyrlaryn ıegerýge degen jas órkenniń de qyzyǵýshylyǵyn baıqaýǵa bolady. Forým óte qyzyqty ári nátıjeli boldy dep tarasty qatysýshylar.
