Senattyń Áleýmettik-mádenı damý jáne ǵylym komıtetiniń tóraǵasy Murat Baqtııaruly sharany asha kelip, elimizde medısına salasyna qomaqty qarjy bólinip jatqanyna qaramastan sheshimin tappaǵan máseleler men qordalanǵan túıtkilder azaımaǵanyn atap ótti. Medısınalyq kadrlar daıarlaýda sapa emes, bilimdiligi men biliktiligi jetispeıtin dárigerler de paıda bolýda. «Bir top Senat depýtattarynyń qatty synyna qaramastan Aqmola men Soltústik Qazaqstan oblystarynda medısına salasyna qatysy joq joǵary oqý oryndary janynan medısınalyq fakýltetter ashyldy», - dedi senator.
M.Baqtııaruly qazirgi kezde keıbir dárigerlik qatelikterden bolǵan kóptegen máseleler tıisti túrde rettelmegen dep sanaıdy. «Bul mınıstrliktiń aldaǵy kezde sheshetin basty jumystarynyń biri bolýy tıis», - dedi Senat komıtetiniń tóraǵasy.
Densaýlyq saqtaý mınıstri Eljan Birtanov baıandama jasady. Ol mınıstrlik densaýlyq týraly jańa kodeks jobasyn ázirlegenin habarlady. Onda birqatar negizgi bólimder qarastyrylǵan.
«Qoǵamdyq densaýlyqty qamtamasyz etýde azamattardyń ortaq jaýapkershiligi belgilendi, medısına qyzmetkerleriniń mártebesi kúsheıtiledi, elektrondyq densaýlyq saqtaýdyń qazirgi zamanǵy kórinisteri anyqtalady», - dedi mınıstr.
E.Birtanov sondaı-aq Senattyń usynysy boıynsha kodeks jobasynda halyqtyń densaýlyq jaǵdaıy týraly baıandama daıyndaý jáne ony elimizdiń Prezıdentine berý jóninde mınıstrliktiń jańa quzyreti qarastyrylǵanyn atap ótti.
«2019 jylǵy 6 sáýirdegi parlamenttik tyńdaýdyń qorytyndysy boıynsha Senat Qazaqstan Respýblıkasynyń Úkimetine 13 usynys, Densaýlyq saqtaý mınıstrligine 26 usynys berdi, olardyń barlyǵy oryndaldy», - dedi E.Birtanov.
Áleýmettik-mádenı damý jáne ǵylym komıtetiniń hatshysy Serik Bekturǵanov óz sózinde otandyq densaýlyq saqtaýdyń jaı-kúıi men problemalaryna jan-jaqty taldaý jasady, olardy sheshýge Parlament pen Úkimettiń belsendi qatysýy talap etiletini aıtyldy. Ol medısına qyzmetkerlerin qyzmettik mindetterin oryndaý kezinde agressııa men shabýyldan qorǵaý sharalaryn qabyldaý qajettigin atap ótti.
«Ýákiletti organǵa osy másele boıynsha zańnamany ózgertýge bastama jasaý kerek dep sanaımyn. Memleket medısınalyq qyzmetkerlerdiń jumysy úshin qaýipsiz jaǵdaılardy qamtamasyz etýi tıis», - dedi senator.
S.Bekturǵanov sondaı-aq dárigerlik qatelikterdi qylmysqa balaý jeń ushynan jalǵasýǵa dýshar etti dep sanaıdy, sondyqtan bul jaǵdaılar kóbinese ujym ishinde qalyp keledi.
Dúnıejúzilik densaýlyq saqtaý uıymynyń málimetteri boıynsha, árbir onynshy pasıent medısınalyq turǵyda kelispeýshilikterge tap bolady, ony álemde dárigerlik qatelik dep ataıdy.
«AQSh-ta júrek-qan tamyrlary aýrýlary men onkologııadan keıingi ólim-jitimniń úshinshi sebebi – bul medısınalyq janjaldar men kelispeýshilikter, sodan keıin ǵana jol-kólik oqıǵalary men jaraqattar bar ekenin ashyq aıtady. Qazaqstandaǵy jaǵdaıdyń qandaı ekenin biz bilemiz be? Jaýaptyń ekitalaı ekeni anyq», - dedi S. Bekturǵanov.
Onyń aıtýynsha, dárigerlik qatelikter úshin jaýapkershilik bolýy kerek, dáriger qandaı jaǵdaıda jáne qandaı jazaǵa tartylýy kerek – ol naqty ári ábden saralanyp anyqtalýy qajet.
S.Bekturǵanov Densaýlyq saqtaý mınıstrligine osy máseleni resmı talqylaýdy bastaýdy usyndy.
Úkimet saǵaty barysynda Qaraǵandy, Túrkistan oblystary ákimderiniń orynbasarlary sóz sóıledi.
Senatorlar densaýlyq saqtaý júıesin jetildirý, sıfrlandyrýdy engizý, onkologııalyq naýqastardy emdeý jáne basqa da máseleler boıynsha óz eskertýleri men usynystaryn aıtty.
