Ortalyq jáne jergilikti atqarýshy organdardy tyńdaý qorytyndylary jáne ınvestısııalar tartý jónindegi jumystardyń uıymdastyrylýy týraly Ulttyq ekonomıka mınıstri R.Dálenov, ımportty almastyrý týraly «Atameken» UKP tóraǵasy A.Myrzahmetov, AHQO-nyń óńirlerde ınvestısııalar tartý máseleleri boıynsha AHQO basqarýshysy Q.Kelimbetov baıandady.
Otyrysta ulttyq ekonomıkanyń ozyq qarqyn kórsetýin jalǵastyryp jatqany atalyp ótti. Bıylǵy 9 aıdyń nátıjeleri boıynsha ósý qarqyny 4,3%-dy qurady. Halyqaralyq valıýta qory Qazaqstan ekonomıkasynyń ósý boljamyn 2019 jyly 3,2%-dan 3,8%-ǵa deıin, 2020 jyly 3,2%-dan 3,9%-ǵa deıin arttyrdy. Azııa damý banki de el ekonomıkasynyń ósýi boıynsha 2019 jyly kútiletin nátıjelerdi 3,5%-dan 3,7%-ǵa deıin kóterdi. Moody’s reıtıngtik agenttigi elimizdiń nesıelik baǵalanýyn turaqtydan pozıtıvtige arttyrdy. Dúnıejúzilik ekonomıkalyq forýmnyń Jahandyq básekege qabilettilik ındeksinde Qazaqstannyń pozısııasy 59-dan 55-orynǵa jaqsardy.
Eýropa Qaıta Qurý jáne damý (EQQDB) bankiniń Qazaqstandaǵy basshysy A.Preımanıs jáne Qazaqstandaǵy Azııa damý banki (ADB) ókildiginiń dırektory Dj. Kapannellı Qazaqstannyń ekonomıkalyq jáne ınvestısııalyq saıasatyndaǵy oń qarqyndy atap ótti.
Ekonomıka ósiminiń qazirgi qarqynyn qoldaý men arttyrýdyń asa mańyzdy sharttarynyń biri ınvestısııalar tartý jáne ekonomıkanyń kapıtal syıymdylyǵyn arttyrý. 2024 jylǵa qaraı negizgi kapıtalǵa salynǵan ınvestısııalar deńgeıin IJО́ 30%-yna deıin jetkizý kózdelgen. Búginde 2020-2024 jyldary 41 trln-nan astam teńge ınvestısııa tartýǵa múmkindik beretin ınvestısııalyq jobalar pýly qurylǵan. Investısııalar ósiminiń negizgi draıverleri bazalyq ındýstrııalandyrý, AО́K, kólik, týrızm jáne saýda bolady.
«Elbasy Nursultan Nazarbaev pen Prezıdent Qasym-Jomart Toqaevtyń tapsyrmalaryna sáıkes, ekonomıka damýynyń ozyq qarqynyn qamtamasyz etý úshin elimizge tikeleı sheteldik ınvestısııalardy tartý jumysyn sapaly túrde kúsheıtý qajet», dedi A.Mamın.
Úkimet basshysy jumys istep turǵan ınvestısııalyq ınfraqurylymdy jetildirýdi, elimizdiń arnaıy ekonomıkalyq jáne ındýstrııalyq aımaqtarynda ınvestorlar úshin artyqshylyqtardy birizdendirýdi, memleket-jekemenshik áriptestiktiń damýyn jandandyrýdy, joǵary qosylǵan quny bar eksportqa baǵyttalǵan jobalardyń úlesin arttyrýdy tapsyrdy.
«Investısııalyq jobalardy ázirleý jáne daıyndaý máselesine neǵurlym sapaly qaraý qajet. Bul úshin konsaltıngtik kompanııalardyń jáne EQQDB, EADB, IDB, ADB tárizdi halyqaralyq qarjy ınstıtýttarynyń jáne basqalarynyń áleýetin elimizge kórsetiletin tehnıkalyq kómek aıasynda paıdalaný qajet», dedi A.Mamın.
Premer-Mınıstr óńirlerdegi ınvestısııalyq belsendilikti damytý maqsatynda AHQO quqyǵymen jáne onyń ıýrısdıksııasyn qoldaný arqyly qurylymdalǵan jobalardy iske asyrý boıynsha máselelerdi pysyqtaýdy tapsyrdy.
«О́ńirlerde ákimderdiń ınvestısııalyq jobalarmen tikeleı aınalysatyn orynbasarlary bar. AHQO-nyń qarjy naryǵynyń qolda bar áleýeti men qoldanystaǵy quraldaryn barynsha paıdalanýdyń mańyzy zor. Úılestirý keńesiniń otyrysy óńirlerdiń AHQO-men yntymaqtastyǵynyń sapaly damýyna bastaý bolady dep senemin», dedi A.Mamın.
Úkimet basshysy ortalyq memlekettik organdarǵa, ulttyq kompanııalarǵa jáne ákimdikterge ınvestısııalar tartý boıynsha bekitilgen nysanaly ındıkatorlarǵa qol jetkizip, alǵa qoıylǵan mindetterdi oryndaýdy qamtamasyz etýdi tapsyrdy.
