Prezıdent • 22 Qazan, 2019

Memleket basshysy qalamger Ábdijámil Nurpeıisovti mereıtoıymen quttyqtady

67 retkórsetildi

Prezıdent Qasym-Jomart Toqaev Qazaqstannyń halyq jazýshysy, Memlekettik syılyqtyń laýreaty Ábdijámil Nurpeıisovti 95 jasqa tolǵan mereıtoıymen quttyqtap, jedelhat joldady. Bul týraly Aqordanyń baspasóz qyzmeti habarlady.

«Sizdi egemen elimizdiń ádebıeti men mádenıetiniń órkendeýine ólsheýsiz úles qosqan asa kórnekti jazýshy, sóz óneriniń patrıarhy retinde qadirleımiz. Qazaq qalamgerleri arasynan daralanyp shyǵyp, biregeı tulǵa dárejesine kóterilgen О́zińizdi únemi maqtan etemiz»,– delingen jedelhatta.

Sonymen qatar jazýshynyń «Qan men ter», «Sońǵy paryz» romandary qazaq kórkem sóziniń altyn qazynasyna enip, álem ádebıetinde ózindik orny bar rýhanı qundylyqqa aınalǵany jaıynda da aıtylǵan. Jazýshynyń jalpyadamzattyq máselelerdi arqaý etken shyǵarmalary arqyly halqymyzdy búkil dúnıe júzi tanyǵanyna da toqtalǵan.

«Barshany alańdatqan Araldyń ahýaly Sizdiń qaıtalanbas týyndylaryńyzda kórinis tapty. El múddesin jahandyq deńgeıge jetkizip, oqyrmannyń sheksiz yqylasyna bólenip kelesiz»,– dep jazdy Memleket basshysy.

Prezıdent mereıtoı ıesine «Jazýshylyq jolyńyz, ǵıbratty ǵumyryńyz jalǵasa bersin! Sizge zor densaýlyq, shyǵarmashylyq tabys, baq-bereke tileımin» degen yqylasyn bildirdi.

Sońǵy jańalyqtar

Uqsas jańalyqtar