Qazaqstan Respýblıkasy Parlamenti Senaty delegasııasynyń sapary aıasynda Aleksandrov baǵyndaǵy Belgisiz soldat zıratyna gúl shoqtaryn qoıý rásimi ótti.
Senat Tóraǵasy «Basqarýdyń jańa tehnologııalary» ortalyǵynda bolyp, «Belsendi azamat», «Bizdiń qala» jobalarymen, memlekettik elektrondy qyzmettermen jáne Máskeý úkimetiniń kraýdsorsıng jobalarymen tanysty.
Jobalar memlekettik organdardyń qala turǵyndarymen keri baılanysyn júzege asyrýǵa: azamattardyń shaǵymdary men pikirlesýine oraı áreket etýge; merııa baǵdarlamalaryna baılanysty qala turǵyndaryna saýalnama men zertteý júrgizýge múmkindik beredi. Onda qazirgi zamanǵy erekshe IT-tehnologııalar qoldanylady, azamattar keń taralǵan kommýnıkasııalyq qyzmetterdiń (saıt nemese mobıldi qosymsha arqyly) kómegimen jobany paıdalana alady. Máselen, «Bizdiń qala» portalynyń reglamentine sáıkes problemalardy joıý merzimi 8 kún bolyp otyr.
«Belsendi azamat» jobasy Máskeýde 2014 jyldan beri jumys isteıdi jáne Máskeý qalasy turǵyndarynyń ótinishterin jınaqtaý jáne aýqymdy saýalnama júrgizý úshin mobıldi qosymsha ári saıt túrinde qyzmet kórsetip keledi. Saýalnama taqyryptarynda qala ómiriniń barlyq salalary: jańa metro stansasynyń dızaınyn ázirleýden bastap memlekettik emhananyń jumys kestesin aýystyrǵanǵa deıin qamtylady. Saýal nátıjeleri máskeýlik bıliktiń sheshim qabyldaý barysynda eskeriledi. Jobanyń júzege asýy qalalyq problemalardy talqylaýǵa áleýmettik belsendi jas urpaqty tartýǵa múmkindik berdi. Joba jumys istegen 5 jylda oǵan 2,4 mıllıon máskeýlik atsalysqan.
Senat basshysy «Bizdiń qala» portaly jumys istegen jyldary 3,7 mıllıon máseleniń sheshimin tabýy turǵyn úı-kommýnaldyq sharýashylyq máselelerin retteý júıesin jetildirýdegi múmkindikter men baǵyttardy kórsetip otyrǵanyn atap ótti.
«Azamattardy óz úılerine qyzmet kórsetý men kútip-ustaýdy sıfrlyq turpatta baqylaýǵa belsendi túrde tartý búgingi zamanǵa saı, yńǵaıly ári basqarýǵa tıimdi. Mundaı ádisterdi Parlamentte turǵyn úı-kommýnaldyq sharýashylyq máseleleri jónindegi zań jobasyn talqylaýda qarastyrýǵa bolady. Halyqpen keri baılanys tájirıbesi qyzyqtyrady. Oılanatyn másele», dedi D.Nazarbaeva.
Darıǵa Nazarbaeva sondaı-aq Halyq sharýashylyǵy jetistikteri kórmesinde ornalasqan Qazaq KSR eski pavılonynyń ornynda boı kótergen «Qazaqstan» pavılonynda boldy.
