Aımaqtar • 23 Qazan, 2019

Taraz shaharyndaǵy tamasha tún

31 retkórsetildi

Eki myń jyldan astam tarıhy bar kóne Taraz shahary týraly kóptegen jazbalarda kezdesedi. Ertede Tarazdyń iri saýda ortalyǵy, kópester qalasy bolǵany da kópshilikti qyzyqtyrady. Osy oraıda «Ejelgi Taraz eskertkishteri» memlekettik tarıhı-mádenı qoryq-mýzeıiniń uıymdastyrýymen Taraz qalasyndaǵy «Kóne Taraz» tarıhı-mádenı kesheninde qala turǵyndary men qonaqtary úshin «Kóne shahardaǵy myń bir tún» atty «Mýzeı túni» ótti. Shara aıasynda kóne Tarazdyń tarıhynan taǵylym beretin teatrlandyrylǵan kórinister qoıylyp, ony úsh myńnan astam kórermen tamashalady.

Tarıhı shahardyń bolmysyn taný jáne kóne ǵasyrlarǵa saıahattaý maqsatynda uıymdastyrylǵan atalǵan sharany «Ejelgi Taraz eskertkishteri» memlekettik tarıhı-mádenı qoryq-mýzeıiniń dırektory Nurlan Byqybaev sóz sóılep ashyp, «Mýzeı túni» kelýshilerge tereń tarıhtan taǵylym berýde mańyzy zor ekenin aıtty. Sonymen qatar Jambyl oblystyq qazaq drama teatrynyń dırektory Bolat Bekjanov, oblystyq ardagerler keńesiniń múshesi Saılaýhan Ashanov, Túrkistan oblysynyń «Ordabasy» memlekettik tarıhı-mádenı qoryq-mýzeıiniń qyzmetkeri Baqytbek Qasymov, Almaty oblysynyń «Tańbaly» memlekettik tarıhı-mádenı qoryq-mýzeıiniń qyzmetkeri Qýanysh Nurmaqsutovtar mundaı is-sharalardyń, ásirese jas urpaqtyń ulttyq tarıhymyzdy tereń tanyp, otansúıgishtik rýhynyń asqaqtaýyna ózindik úlesin qosatynyn atap ótti. Tarazdyń tek qana iri saýda ortalyǵy ǵana emes, kezinde sulýlar men ǵashyqtardyń shahary bolǵany da áńgime arqaýyna aınaldy.

«Mýzeı túni» kópshilikke keremet kóńil kúı syılady deýge bolady. Kelýshiler arnaıy uıymdastyrylǵan «Kópester men qolónershiler qalasynyń» tarıhı atmosferasyna úńilip, Qarahan men Aısha bıbi ańyzynyń tarıhymen de keńinen tanys­ty. Sonymen qatar mýzeı keńistiginde Taraz topyraǵynda ótken tarıhı tulǵalardyń beıneleri qaıta jandandy. Al ǵajaıyp álemge saıahattaǵysy kelgen jastar túrli-tústi ınstallıasııa aıasynda estelik fotoǵa túsip, bir sát tarıh qoınaýyna súńgýge múmkindik aldy. «Mýzeı túni» barysynda belsendi qatysýshylarǵa arnaıy Alǵys hattar men baǵaly syılyqtar tabys etildi.

 

Jambyl oblysy

 

Sońǵy jańalyqtar

Uqsas jańalyqtar