Aımaqtar • 23 Qazan, 2019

Aqmolanyń astyǵyna suranys mol

18 retkórsetildi

Dıqan qaýymnyń kóńilin kúpti etken astyq úshin arpalys ta aıaqtaldy. Endigi sharýa qambaǵa quıylǵan dándi elekten ótkizip, suryptap, keptirý.

Bıyl astyqqa suranys mol. Baǵasynyń ósýi de sodan. Qazirgi kúni alqaptaǵy jumystar aıaqtalǵanymen, elevatorlardaǵy qaýyrt istiń kórigi qyza túsýde. Bıyl Esil aýdanynyń dıqandary 440 myń gektar egistik alqabyna dán tuqymyn sińirgen bolatyn. Kúzgi oraqtyń nátıjesi belgili bolyp otyr. Shyǵymdylyǵy shamamen gektaryna 10 sentner. Jazdaǵy qýańshylyq pen qyrkúıektegi súmbileni eskersek, bul kórsetkish te jaman emes.

–Esil elevatory – sonaý tyń ıgerý jyldarynyń sarqyty. Dala tósin eńbek áýenine bólep, el yryzdyǵy úshin tyńǵylyqty eńbek etken dıqandar endi eńbek maıdanyn astyq saqtaıtyn kásiporyndarda óristetip jatyr. Bul elevatordyń irgetasy sonaý 1964 jyly qalanypty. Sodan beri úzdiksiz qyzmet etip keledi. 84 myń tonna astyq qabyldaýǵa qaýqarly. Árbir maýsymnyń óz erekshelikteri bar. Máselen, bıyl alqaptan jetkiziletin astyq dymqyl bolǵanymen, esesine qamyrlylyǵy joǵary,– deıdi «Esil-Dán» seriktestiginiń jetekshisi Qaırat Aıtyqov.  

Seriktestik jetekshisiniń aıtýyna qaraǵanda, táýligine bir jarym myń tonnaǵa deıin astyq tasymaldanýda. Dán keptirilip, suryptalǵannan keıin elimizdiń ońtústik aımaǵyna, Orta Azııa men Iran memleketterine jóneltiledi.

Ústimizdegi jyly elevator keptirý men suryptaýǵa arnalǵan qural-jabdyqtardyń biraz bóligin jańartypty. Jumystyń ónimdi bolýyna bul da sep.

–Tehnıkalyq qamtamasyz etý baǵytynda bıyl qyrýar is atqardyq. Astyqtyń sapasyn anyqtaıtyn zerthana jańartyldy. Astyq tazalaıtyn seporatorlar 50 prosentke zamanaýı qondyrǵylarmen almastyryldy. Osyndaı ilkimdi istiń arqasynda tez tazarlap jatyrmyz,–deıdi bas ınjener Zahan Qyryqbashev.

Astyqtyń qamyrlylyǵy, aqýyz salmaq bóligi men dymqyldylyq tárizdi sapalardy zerthanadaǵy saraptaý óte dál kórsetedi. Osy bir qaýyrt shaqta kúni-túni elevatorda eńbek etip jatqan 55 adamnyń jumysy dál osy jerden bastalady.

Yrys ysyrapsyz jınalsa, dıqan qaýymnyń aq edil eńbeginiń aqtalǵany.

Sońǵy jańalyqtar

Uqsas jańalyqtar