Qarjy jáne bıýdjet komıtetiniń tóraǵasy Olga Perepechına sharany asha kelip, «Kollektorlyq qyzmet týraly» zań kúshine engen kúnnen bastap 2 jyldan astam ýaqyt ótkenin, birqatar tájirıbe jınaqtalǵanyn jáne zańnyń quqyqtyq qoldanylýyna belgili bir taldaý jasaý qajettigin atap ótti.
Elimizdiń Ulttyq banki tóraǵasynyń orynbasary Oleg Smolıakov kollektorlyq agenttikterdiń qyzmetin retteý, ózekti máseleler jáne olardy sheshý joldary týraly habardar etti.
O. Smolıakov qaryz sharttary boıynsha bereshekti óndirip alý jónindegi qyzmetti júzege asyratyn uıymdardyń áreketterine azamattardyń kóptegen shaǵymdary kollektorlyq qyzmet týraly zańdy qabyldaýǵa sebep bolǵanyn eske saldy. Mundaı kompanııalardyń qyzmeti Azamattyq kodeks erejeleriniń negizinde júzege asty jáne olardyń sany zań qabyldanǵanǵa deıin shamamen 900 kompanııa boldy.
O.Smolıakovtyń aıtýynsha, 2017 jyly qajettiligi eskerile otyryp, kollektorlyq agenttikti qurý tártibi, sondaı-aq kollektorlyq qyzmetti júzege asyrý erejeleri rettelgen kollektorlyq qyzmet týraly zań ázirlenip, qabyldanǵan bolatyn. Olarǵa sáıkes kollektorlyq agenttiktiń boryshkermen, onyń ókilimen jáne úshinshi tulǵalarmen úı-jaılarda aýdıo-jáne beınetehnıka quraldarynyń kómegimen ózara is-qımyl prosesin mindetti túrde tirkeı otyryp ózara is-qımyl jasaý tásilderi, sany, sondaı-aq ýaqytsha shekteri belgilengen.
Agenttikterge qatysty yqpal etý sharalaryn qoldaný quqyǵy boıynsha kollektorlyq agenttikterdiń qyzmetin baqylaý jónindegi ýákiletti organ bolyp Ulttyq bank belgilendi.
Búgingi kúni tizilimge 177 kollektorlyq agenttik engizildi, olardyń 12-si erikti túrde tizilimnen shyǵaryldy. Qazaqstanda qazirgi kezde barlyǵy 165 kollektorlyq agenttik jumys isteıdi.
«Bıylǵy qyrkúıek aıynan bastap Qazaqstan Respýblıkasy Parlamenti Senatynyń depýtattary, Ulttyq bank, Qazaqstan qarjygerler qaýymdastyǵy, Qazaqstan kollektorlar odaǵy, sondaı-aq kollektorlyq agenttikterdiń basshylary aǵymdaǵy máselelerdi talqylady. Onyń qorytyndysy boıynsha zańnamany jetildirý boıynsha usynystar toptamasy ázirlendi», - dedi O.Smolıakov.
Onyń pikirinshe, bul sharalar Ulttyq Bankke kollektorlyq agenttikterdiń qyzmetin tolyq kólemde baqylaýdy júzege asyrýǵa, olardyń qyzmetiniń ashyqtyǵyn arttyrýǵa, osylaısha quqyqqa qarsy yqtımal áreketterden azamattardy qorǵaýǵa múmkindik beredi.
«Qazaqstan kollektorlar odaǵy» zańdy tulǵalar birlestiginiń tóraǵasy Iýrıı Lı Qazaqstan kollektorlar odaǵynyń kózqarasy turǵysynan kollektorlyq qyzmet týraly zańnamany jetildirý boıynsha oılarymen bólisti.
Qazaqstan qarjygerler qaýymdastyǵy keńesi tóraǵasynyń orynbasary Janar Ábdikárimova óz sózinde kollektorlar ınstıtýtyn damytý máselelerine jáne onyń Qazaqstannyń qarjy naryǵyna áseri egjeı-tegjeıli toqtaldy.
Dóńgelek ústel otyrysyna Ádilet, Eńbek jáne halyqty áleýmettik qorǵaý mınıstrlikteriniń, sondaı-aq Bas prokýratýranyń ókilderi qatysty.
Shara barysynda senatorlar Ǵumar Dúısembaev, Baqtybaı Shelpekov jáne Nurlan Qylyshbaev óz usynystary men eskertpelerin aıtty.
Olga Perepechına dóńgelek ústel otyrysyn qorytyndylaı kelip, dnpýtattar mańyzdy máselelerdi odan ári talqylaýǵa, olardy depýtattyq saýaldar barysynda da, kollektorlyq qyzmet týraly zańnamany jetildirý aıasynda da sheshýge daıyn ekenin atap ótti.
