«Memleket basshysy bilim salasyn damytýdaǵy basty maqsattar men mindetterdi belgilep berdi. Qazir bilim salasyn damytýdyń 2025 jylǵa deıingi baǵdarlamasy daıyndalýda. Odan bólek, pedagogtar mártebesi týraly zań jobasy Májiliste qaralýda. Artyq júktemelerdi azaıtý, ustazdardyń jaýapkershiligin arttyrý baǵyttary bar. Jalpy, másele kóp. Ashyp aıtyńyzdar. Biz osy maqsatta óńirlerdi aralap júrmiz. Pikirlerińizdi eskeremiz», dedi Berdibek Saparbaev.
Bilim jáne ǵylym mınıstri Ashat Aımaǵambetov pedagogtar mártebesi týraly zań jobasyn jan-jaqty túsindirip berdi. Onyń aıtýynsha, memleket-jekemenshik áriptestikti damytýda Shymkent kósh bastap keledi. Bıyl bul maqsatta 10 jekemenshik mektep ashylǵan. Bul – jaqsy kórsetkish. Sondaı-aq jıynda ustazdar tarapynan ulttyq tárbıeni kúsheıtý, áleýmettik jaǵdaıdy kóterý, mektepterdegi orynsyz tekserýlerdi azaıtý máseleleri kóterildi.
Memleket basshysynyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynyń óńirlerde oryndalýy jónindegi esepti kezdesýde Premer-Mınıstrdiń orynbasary Berdibek Saparbaev qaladaǵy áleýmettik máseleler boıynsha turǵyndardyń pikirin tyńdady.
Ashyq dıalog formatynda ótken jıynda ataýly áleýmettik kómek tóńiregindegi keıbir keleńsizdikter sóz boldy. Sondaı-aq Joldaýdaǵy kózdelgen negizgi tapsyrmalardyń oryndalýy boıynsha halyqpen pikirlesti.
«Prezıdent Q.Toqaevtyń tapsyrmasyna sáıkes halyqty áleýmettik qoldaý maqsatynda bıýdjetten 250 mlrd teńge qarjy bólindi. Sonymen qatar halyq arasynda nesıe tóleýden keshigip, aıyppuly ósip ketken shyǵyndardy óteý úshin 142 mlrd teńge jumsaldy. Memleket basshysynyń Joldaýyn júzege asyrý úshin qoǵam men bılik ortasyndaǵy keri baılanysty ońtaılandyratyn tıisti qujattar ázirlenýde. Halyqtan kelgen birde-bir suraqtar jaýapsyz qalmaýy kerek. Ár óńirde qurylǵan qoǵamdyq keńestiń jumysynda da kemshilikter jeterlik, ashyqtyq joq. Sondyqtan halyq arasynda jıi saýaldama ótkizýdi josparlap otyrmyz. Áleýmettik saýaldama boıynsha kórsetkishi 30 paıyzdan tómen bolsa, jedel túrde máselesi qaralatyn bolady», dedi Berdibek Máshbekuly.
Esterińizge salar bolsaq, Shymkent qalasynda bıylǵy toǵyz aıda ataýly áleýmettik kómekke (AÁK) bólingen 22,3 mlrd teńgeniń 14,6 mlrd teńgesi, ıaǵnı 65,5 paıyzy ıgerilgen. Al AÁK alýǵa ótinish bergenderdiń sany bıyl 6,9 esege artqan. Bul kórsetkish ataýly áleýmettik kómekti tóleýdiń jańa modelin jasaýǵa túrtki bolyp otyr.
Osy oraıda memleket tarapynan shyn muqtaj jandarǵa kórsetilgen kómekti orta joldan qaǵyp ketkisi keletinder az bolmapty. Jergilikti ákimdik músheleriniń aıtýynsha, ataýly áleýmettik kómekke qujat tapsyrǵan muqtajdar qatarynda 7 596 otbasynyń tabysyn jasyrǵany anyqtaldy. Qazirgi ýaqytta 2 529 otbasyna taǵaıyndalǵan 1 530 mln teńge kólemindegi tólemder tolyq toqtatyldy.
El qazynasynan bólingen qarjynyń jumsalýyn qadaǵalaý maqsatynda qala ákimdigi tarapynan júrgizilgen zertteýler men tekserýler nátıjesinde 271 otbasyna habarlandyrý taratylyp, onyń 3-ýi ǵana óz erkimen 828,4 myń teńge qarjysyn bıýdjetke qaıtarǵan. Qazirgi tańda 5 116 otbasynyń áleýmettik tólemderine qaıta esepteý jumystary júrgizilýde. Búginge deıin 4 255 otbasynyń tólemderi qaıta eseptelip taǵaıyndalǵan qarjy 1 037,4 mln teńgege kemitildi.
Bul jóninde salalyq mınıstrlik pen jergilikti atqarýshy bılik birlesip jumys isteýde. «Eń bastysy ataýly áleýmettik kómekti taǵaıyndaýda masyldyqqa jol bermeýimiz qajet», deıdi sala basshylary.
Turǵyndar men sala mamandarynyń pikirin tyńdaǵan Úkimet basshysynyń orynbasary Berdibek Saparbaev memleket birinshi kezekte balalarǵa jáne kóp balaly otbasylarǵa kómektesetinin jetkizdi. Ári eńbekke qabiletti azamattar jumys isteýge nıetti bolsa, memleket jumysqa ornalasýǵa nemese kishi bıznespen aınalysýǵa kómektesetinin atap ótti.
ShYMKENT
