Bul kitap «Egemen Qazaqstan» gazetiniń 100 jyldyq mereıtoıyna arnalǵan. Onda qazaq baspasóziniń qara shańyraǵy – bas basylymnyń 2000-2008 jyldar aralyǵyndaǵy «lezdemesi» qamtylyp, shyǵarmashylyq laboratorııasy nazarǵa usynylǵan. Iаǵnı gazettiń osy kezeńdegi tarıhı belesteriniń jylnamasy men dereknamasy ispetti.
Lezdeme– jýrnalısterdiń sheberlik shyńdaýynyń ózindik mektebi ekendigi belgili. Sol sebepti de onda ortaq múdde turǵysynda búkpesiz áńgime órbitiledi. Gazettiń mazmuny men sapasy, tili men stılıstıkasy, túrli janrdaǵy materıaldardyń jazylýy men berilý tásilderi, t.b. máseleler ótkir pysyqtalady. Oqyrmandardyń talap-tilekteri, ótinishteri muqııat eskeriledi. Qaıtkende gazetti sapaly shyǵarý kerek? Tájirıbe, iskerlik, izdenimpazdyq, júıelilik, baıqampazdyq sekildi qasıetter bir arnaǵa toǵystyrylady. Qysqasy, lezdeme – «shabyt shaqyrý» alańyna uqsap ketedi. Taqyryp alýandyǵyna den qoıylady. Táýelsizdiktiń murattaryna adaldyqtyń jarqyn kórinisi joǵary talap deńgeıinde saraptalyp, oqyrmandar talqysyna salynady. Gazet úshin usaq másele joq. Bári mańyzdy, kókeıkesti. Sondyqtan da gazet kótergen máselelerdiń tini bolattaı berik bolýy tıis. Mine, atalmysh eńbekte «lezdemelerdiń» osyndaı san qıly qyrlary avtordyń – «Egemenniń» baıyrǵy qyzmetkeriniń kózimen naqpa-naq, eshbir qospasyz baıandalǵan. «Ádil sóz ashy bolady, Ádildik ákimdikten de kúshti», dep ǵulama oıshyl Júsip Balasaǵun aıtpaqshy, bul kitaptaǵy áńgimeniń negizi shyndyq qaınarynan sýarylǵan desek, artyq emes. Kitap sonysymen qundy.
«Egemenniń» keıingi býyny! Osy jazbalarym Seniń kádeńe tıtimdeı bolsa da jarap jatsa, maqsatymnyń oryndalǵany dep bilem!», dep avtordyń aǵynan jarylǵanynan biraz jaıtty ańǵarýǵa bolady. Kitap joǵary oqý oryndarynyń stýdentterine, jalpy jýrnalıster qaýymyna arnalǵan.
S.NURBEK
Nur-Sultan
