Osyǵan oraı qan maıdanda erlikpen qaza tapqan jerlesterimizdi qaıta jerleý úshin arnaıy delegasııa jasaqtalyp, jolǵa attanbaqshy.
314-shi atqyshtar dıvızııasy Petropavl qalasynda qurylyp, quramynda 11 myńǵa jýyq soltústikqazaqstandyq sarbaz bolǵan.
«Jaýyngerlerdiń denesi Reseıdiń Lenıngrad oblysy Lodeınoe pole aýdany Svır selosy mańynan tabylǵan. 1-shi batalonnyń 1076-shy atqyshtar polki osy aýmaqta nemis basqynshylaryna qarsy keskilesken shaıqastar júrgizgen. Biz búgin Otan úshin keýdesin oqqa tosqan atalarymyzdyń rýhyna taǵzym etip, olardy eske alý sharasyna jınalyp otyrmyz», dedi qala ákiminiń orynbasary Asar Habıbýlın jıynda sóılegen sózinde.
Jer qoınynan tabylǵan 10 adamnyń 8-i petropavldyq , 2-ýi kókshetaýlyq ekeni anyqtalǵan. Solardyń biri– Aleksandr Artemev 1941 jyly batysqa attanyp, sodan habar-osharsyz ketken. «Atam 1908 jyly dúnıege kelgen. 314-shi atqyshtar dıvızııasynyń 1-shi batalony 1076-shy atqyshtar polkine qabyldanǵan. Tabylǵandardyń arasynan atamnyń esimin kórip qatty qýandym. Men de delegasııa quramynda qaıta jerleý rásimine attanyp baramyn», deıdi nemeresi Tamara Plıashechnıkova.
Delegasııa jetekshisi Imanǵalı Tatvaevtyń aıtýynsha Qyzyljar óńirinen topyraq salynǵan kapsýla jetkiziledi.
Mıtıngige qatysýshylar ekinshi dúnıejúzilik soǵysta qaza tapqan jaýyngerlerdiń eskertkishi aldyna gúl shoqtaryn qoıyp, únsizdikpen eske aldy.
Soltústik Qazaqstan oblysy
