Alqaly jıynǵa Qaraǵandy oblysynyń ákimi Jeńis Qasymbek, qoǵam jáne memleket qaıratkeri Oralbaı Ábdikárimov, aqyn, Qazaqstan Jazýshylar odaǵynyń tóraǵasy Ulyqbek Esdáýlet, «TÚRKSOI» Túrki mádenıeti men ónerin damytý jónindegi halyqaralyq uıymnyń bas hatshysy Dúısen Qaseıinov, Ulttyq Ǵylym akademııasynyń akademıgi Hangeldi Ábjanov, ál-Farabı atyndaǵy Qazaq ulttyq ýnıversıtetiniń professory Kúlásh Ahmet, sondaı-aq belgili lıngvıster, ádebıettanýshylar, tarıhshylar, halyqaralyq uıymdardyń basshylary, JOO oqytýshylary, magıstranttar men stýdentter qatysty.
Konferensııa barysynda «Úsh arys» kitap-albomy men «Sáken Seıfýllın – memlekettik tulǵa» atty kitaptyń tusaýkeser rásimi uıymdastyryldy. Alǵashqy atalǵan eńbek Sáken Seıfýllınniń, Ilııas Jansúgirovtiń jáne Beıimbet Maılınniń 125 jyldyǵyna arnalǵan. Kitap-albom «TÚRKSOI» halyqaralyq uıymynyń tapsyrysy boıynsha qazaq jáne orys tilderinde jaryqqa shyqqan.
– Bizdiń uıymnyń basty maqsaty – túrki halyqtarynyń ortaq mádenı murasyn álemdik arenaǵa shyǵarý. Úsh jazýshymyzdyń shyǵarmashylyǵyn sýretter men shyǵarmalary arqyly kórsetý úshin kitap-albom shyǵarýǵa sheshim qabyldadyq, – dedi «TÚRKSOI» Túrki mádenıeti men ónerin damytý jónindegi halyqaralyq uıymnyń bas hatshysy Dúısen Qaseıinov.
Al Hangeldi Ábjanov, Serik Ospanov jáne Temirǵalı Arshabekov birigip jazǵan «Sáken Seıfýllın – memlekettik tulǵa» Qaraǵandy oblystyq mádenıet, muraǵattar jáne qujattama basqarmasynyń bastamasymen jaryq kórdi.
Bul eńbekte Omby arhıvinen jáne Almatydaǵy Prezıdenttik muraǵattan alynǵan materıaldardy keńinen paıdalanǵan avtorlar Sáken Seıfýllınniń tulǵasyn memleket qaıratkeri retinde kórsetýge tyrysqan.
Jalpy, atalǵan konferensııa materıaldarynyń jınaǵyna kelip túsken 120 ǵylymı maqalanyń ishinen 95 jumys iriktelip alynypty. Seksııalyq otyrystarda qatysýshylar «Sáken Seıfýllınniń memleket jáne qoǵam qaıratkeri retindegi tarıhı beınesi», «Jahandaný dáýirindegi til biliminiń ózekti máseleleri» jáne «Qazaq ádebıetiniń damý tarıhy: keshe jáne búgin» atty taqyryptarda pikir almasty.
Konferensııa aıasynda Sáken Seıfýllınniń jeke zattarynyń, sondaı-aq murajaı eksponattary men kitaptarynyń, muraǵat materıaldarynyń kórmesi uıymdastyryldy.
Qaraǵandy oblysy
