Festıvaldiń ashylýyna deıin qonaqtar sándik-qoldanbaly óner kórmesimen jáne ýkraın jastar qanaty Jastar jylyna arnap uıymdastyrǵan «HHI ǵasyr jastary – obektıvte» fotokórmesimen tanysty.
«Elimizdegi barlyq etnomádenı birlestikterdiń ortaq qurylymy bolǵan, azamattyq qoǵamnyń erekshe ınstıtýty – Qazaqstan halqy Assambleıasy ulttar men ulystardyń altyn dińgegine aınalǵanyn» atap ótken Qazaqstan halqy Assambleıasy Tóraǵasynyń orynbasary – Hatshylyq meńgerýshisi Janseıit Túımebaev qatysýshylardy festıvaldiń ashylýymen shyn júrekten quttyqtady.
«Búginde Qazaqstan kópultty jáne kópkonfessııaly el bolyp tanyldy. Elbasymyz Nursultan Nazarbaevtyń qoǵamdyq birlik pen jalpyulttyq birliktiń modeli álemge tanymal boldy.
Tarıhı taǵdyry ortaq túrli ult ókilderi táýelsiz Qazaqstannyń irgesin birge qalasýda. Olardyń arasynda basqa etnostardyń barlyǵymen terezesi teń ýkraındyqtar da bar. Sol úshin de sizderge alǵys aıtamyn!» deı kele, Janseıit Túımebaev óz sózin myńjyldyq tarıhy bar qazaq-ýkraın dostyǵynyń bastalýy, ýkraındyqtardyń «Uly dala elinde» paıda bolý tarıhynan bastady.
Qazaqstandyq ýkraındardyń qazaq jerine qonystaný tarıhy hronologııalyq turǵydan uzaq ýaqyt aralyǵyn qamtıdy. Tarıhı derekter boıynsha, 1768 jyly basyp janyshtalǵan gaıdamak qozǵalysy músheleriniń Sibirge, ishinara qazaq halqy meken etken aýmaqtarǵa jer aýdarylǵan eken. Biraq ýkraın kóshiniń negizgi lekteriniń biri HIH ǵasyrdyń 80-90 jyldary jáne Stolypınniń reformasy aıasynda júzege asyryldy. Nátıjesinde, HH ǵasyrdyń basynda ýkraındar sany jaǵynan qazaqtar men orystardan keıingi orynǵa kóterilgen edi.
Qyzyqty málimetterge toly baıandama barysynda Janseıit Túımebaev «qazaqstandyq ýkraındar elimizdegi eń kóp sandy ult ókilderiniń qatarynda» ekenin atap óte otyryp, Qazaqstan men Ýkraınadaǵy tamyry qazaqstandyq ýkraındar týraly da aıta ketti: «bokstan álem chempıony V.Klıchko – Qazaqstannyń týmasy bolsa, qazaqstandyq aýyr atletshi A.Hrapatyı – ýkraındyq. Qazaqstandyq bokser V.Levıt pen belgili qazaqstandyq jýrnalıst Iа.Krasıenkonyń ulty ýkraın».
Shamamen 300 adam qatysqan festıval Qazaqstannyń 11 oblysynan jınalǵan ýkraın shyǵarmashylyq ujymdarynyń merekelik konsertimen, sondaı-aq festıval jeńimpazdaryn marapattaý rásimimen jalǵasyn tapty.
Atalǵan sharaǵa Parlament Májilisiniń depýtattary, «Rada ýkraınsev Kazahstana» respýblıkalyq zańdy tulǵalar birlestiginiń tóraǵasy Iýrıı Tımoshenko, Ýkraınanyń Qazaqstandaǵy elshisi Ivan Kýleba, memlekettik organdar men sheteldik dıplomatııalyq mıssııa ókilderi, etnomádenı birlestikter men QHA músheleri jáne t.b. qatysty.
