Quzyrly organdardyń habarlaýynsha, júk mashınasy Ulybrıtanııaǵa Zebrıýgge dep atalatyn Belgııa portynan kelgen. Kólik júrgizýshisi – 25 jastaǵy Soltústik Irlandııa azamaty kisi óltirdi degen kúdikpen ustaldy. Brıtanııa aqparat quraldarynyń jazýynsha, júrgizýshi múrdelerdi kórgen boıda polısııaǵa habarlasqan. Búginde quqyq qorǵaý organdary Eýropadan zańsyz jumysshy tasıtyn toptardyń da qylmysqa qatysy bar-joǵyn anyqtap jatyr. Júk kólikteriniń júrgizýshileri sońǵy aıaldamaǵa kelgenshe júk tıelgen konteınerlerdi ashyp qaraýǵa quqyǵy joǵyn aıtady. Bul málimdemeni Belgııadaǵy Brıýgge qalasynyń basshysy da qoldady. «Kún saıyn bizdiń portqa 4 myńǵa jýyq mashına keledi. Ár kóliktegi júkti tekseretin bolsaq, kezektiń sońy Brıýsselge deıin jeter edi», dedi Dırk de Faý.
Brıtanııa aqparat quraldarynyń boljamyna súıensek, ádette Qytaıdan keletin azamattardy Ulybrıtanııaǵa kúshtep alyp keledi eken. Olardyń kóbi eýropalyq qylmystyq toptardyń qolyna qumar oıyn úshin alǵan qaryzdaryn ótemegennen túsetin kórinedi.
Bul oqıǵa Ulybrıtanııa premer-mınıstri Borıs Djonsonnyń baqylaýynda. Ol marqumdardyń jaqyndaryna kóńil aıtyp, Esseks polısııasymen birlesip istiń anyq-qanyǵyna jetetinin habarlady. Ázirge kóliktiń Bolgarııada Irlandııa azamatyna tıesili kompanııa atyna tirkelgeni málim boldy.
Kólik júrgizýshileri assosıasııasynyń atqarýshy dırektory Rıchard Bernett júk tasýǵa arnalǵan kólikterdegi aýa temperatýrasy ádette -25°S-ge deıin baratynyn aıtty. «Mashınalar adamdar úshin múlde qolaısyz», dedi ol VVS-ge bergen suhbatynda. Al Esseks polısııa basshysynyń orynbasary Pıppa Mıllıstiń aıtýynsha, qaza tapqandar týraly naqty aqparatqa qol jetkizý uzaqqa sozylýy múmkin. «Ázirge qaza tapqandardyń 8-i áıel, 31-i erkek ekeni málim. Oǵan qosa olardyń bireýi kámelettik jasqa tolmaǵan. Polısııa tıisti jumystardy júrgizý ústinde. Zerthana qyzmetkerleri ár máıitti jeke qarap jatyr. Sondyqtan biraz kútýge týra kelip tur. Tutqyndalǵan kúdiktiniń úıinde jáne taǵy bir úıde izdeý júrgizildi», dedi Pıppa Mıllıs.
