Sońǵy jyldary basylymdaǵy ózgeristerdiń oqyrman hám básekelestik talabyna saı júrgizilip jatqany, resmı saryn azaıyp, esesine synı, halyqaralyq jaǵdaılarǵa qatysty materıaldar, sheteldik sarapshylardyń pikirlerine kóp oryn berile bastaǵany da zııaly qaýym ókilderi tarapynan aıtyldy.
Túrkistan oblystyq Qoǵamdyq damý basqarmasynyń qoldaýymen, Qazaqstan Jýrnalıster odaǵy Túrkistan oblystyq fılıalynyń uıymdastyrýymen ótken forýmda kezinde el gazetinde eńbek etken ardagerlerge qurmet kórsetilip, basylymnyń búgingi jańashyl qadamdary úlgi etildi. Túrkistan, Jambyl, Qyzylorda oblystarynan, Almaty, Shymkent qalalarynan kelgen belgili jýrnalıster respýblıkamyzdyń bas gazetiniń torqaly toıyna qutty bolsyn aıtty. Túrkistanda ońtústik óńirler jýrnalısteriniń basyn qosqan forýmǵa tilektestigin bildirip, usynysy men quttyqtaýlaryn jibergender de az emes. Mysaly, qazaq basylymynyń janashyrlary Senat depýtattary Nurtóre Júsip pen Aıgúl Qapbarova, Májilis depýtaty Darhan Myńbaıdan arnaıy quttyqtaýlar kelip tústi. Al «Egemen Qazaqstan» respýblıkalyq gazeti» AQ Basqarma tóraǵasy Darhan Qydyráliniń quttyqtaý hatyn forým jumysyn júrgizgen Jýrnalıster odaǵy Túrkistan oblystyq fılıaly tóraǵasy Ǵalymjan Elshibaı oqyp berdi. «Búgingi aqparat aıdyny óte shapshań damýda. Osyndaı syndarly kezeń zamana kóshine ilesip qana qoımaı, kez kelgen qıyndyqtardan jańashyldyqpen jol taýyp, tyń pikirlermen zamanaýı tilmen aıtqanda kreatıvti ıdeıalarǵa arqa súıeýdi qajet etedi. Mundaı jaǵdaıda medıakeńistikte ter tógip, aqparat salasynyń qazanynda qaınap júrgen qyzmetkerlerdiń basyn qosý, tájirıbe bólisýdiń mańyzy óte zor. Tek Túrkistan ǵana emes, respýblıkanyń birneshe óńirindegi buqaralyq aqparat quraldarynyń, blogerleriniń basyn qosqan búgingi medıaforýmnyń alǵa qoıǵan maqsaty – osy salada júrgen mamandardyń tájirıbesin ushtaý, qundy pikirlerdi alǵa qaraı ilgeriletý dep esepteımin», delingen Basqarma tóraǵasynyń quttyqtaý hatynda. Sondaı-aq alqaly jıynda sóz alǵan jýrnalıster el gazetiniń ótkeni men búginine, básekelestikke saı ózgeristerine keńinen toqtaldy. Kóp jyldar el gazetinde eseli eńbek etken belgili qalamger, «Alash» ádebı syılyǵynyń ıegeri, jazýshy Marhabat Baıǵut «Egemenniń» el tarıhyndaǵy erekshe orny men búgingi baǵyty týraly áńgimeledi. Ári jas jýrnalısterdi jańashyldyqqa, óz mindetin atqarýda jaýapkershilikke úndedi. Kezinde bas basylymnyń damýyna ózindik úles qosqan Alash arystary Turar Rysqulov pen Sultanbek Qojanovtyń qazaq gazetterine janashyrlyǵyn tilge tıek etip, rýhanı baılyq izdegen tulǵalardyń aǵartýshylyq baǵyttaǵy eńbekterin óskeleń urpaqqa úlgi-ónege etýge shaqyrdy. Al Q.A.Iаsaýı atyndaǵy HQTÝ jýrnalıstıka kafedrasynyń oqytýshysy, ǵalym Seıdolla Sadyqov «Egemennen» elimizdiń 100 jyldyq tarıhyn aıqyn kórýge bolatynyn atap ótti. «Zulmat jyldardyń elesi, asharshylyq, repressııa, ekinshi dúnıejúzilik soǵys, tyń ıgerý sııaqty halqymyzdyń basynan ótken shejireli kezeńniń barlyq kórinisin basylymnan taba alasyz. Ulttyq ádebıetimizdiń klassıkalyq ozyq úlgileri, sóz marjandary da osy gazette jarııalandy. Men ózimniń ǵylymı monografııalarymdy jazý barysynda osy basylymnyń muraǵatyn aqtardym. Stalındik jappaı repressııalaý kezindegi qaralaý, bılik tarapynan qoldan uıymdastyrylǵan iritki salarlyq derekti maqalalar da, jalpy qazaq halqynyń júrip ótken joly, ótken kúniniń shejiresin osy elimizdiń bas gazeti muraǵatynan tabýǵa bolady. Basylymnyń búgingi baǵyty, naryqtyq zamandaǵy izdenisteri de úlgi eterlik. Jýrnalıstıkany tańdaǵan jastarǵa bereri mol basylym», deıdi Seıdolla Sadyqov. Sondaı-aq Jambyl oblystyq «Aq jol» gazetiniń bas redaktory Kósemáli Sáttibaıuly memlekettik satyp alý, gazetke jazylý jáne basqa da máseleler boıynsha óz kózqarasyn ashyq aıtty. «Tar zamanda Alash zııalylary eldiń baı-manaptaryn qazaq baspasózine jazylýǵa shaqyrǵan. Qazaq basylymdaryn tóbesine kótergen bul erlik gazetke qyryn qaraıtyndarǵa sabaq bolsa», dep aǵynan aqtaryldy K.Sáttibaıuly. Al «Egemen Qazaqstan» gazetiniń Jambyl oblysy boıynsha menshikti tilshisi Hamıt Esaman basylymnyń búgingi baǵyty, jańa aıdarlar, ınternet resýrstaǵy jetistikteri jóninde áńgimeledi. Túrkistan oblystyq Qoǵamdyq damý basqarmasynyń basshysy Damır Júnisov «Egemenniń» aqparattyq keńistiktegi saıası salmaǵynyń basymdyǵyn aıtyp, óńirde ońdy isterdiń el gazeti arqyly respýblıkaǵa taralyp jatqandyǵyna toqtaldy. Sondaı-aq forýmda «Egemenniń» baı fotomuraǵatynda jınaqtalǵan el tarıhynan, táýelsizdiktiń syndarly sátteri men jarqyn jetistikterinen syr shertetin fotosýretterdi, Elbasy men kórnekti tulǵalardyń, Qazaqstan qalalary men kórikti mekenderiniń sırek kezdesetin kórinisterin búgingi naryqtyq suranysqa saı tıimdi paıdalanýdy usynǵandar da boldy.
Keleli keńeste kezinde «Egemen Qazaqstan» gazetinde qyzmet istegen ardager jýrnalıster Marhabat Baıǵut pen Kósemáli Sáttibaıulynyń ıyǵyna shapan jabylyp, qurmet kórsetildi. «Zań medıa» JShS bas dırektory Dosymbek Qonysbek, respýblıkalyq «Ulan» gazetiniń bas redaktory Juldyz Ábdilda, «Otyrar» medıaholdınginiń dırektory Áıgerim Jumaǵulova, «Ońtústik rabat» gazetiniń redaktory Jánibek Nurysh, Jambyl oblystyq «Araı» gazetiniń bas redaktory Dáýlet Tólendi «Jańa jáne dástúrli medıa: yntymaqtastyqtyń zamanaýı modelderi» taqyrybynda oı tolǵady. «Feık jańalyqtar ındýstrııasy: zardabymen kúresý joldary» taqyryby da qyzý talqylanyp, usynys-pikirler ortaǵa salyndy.
Túrkistan tórindegi forým aıasynda Qazaqstan Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaıdyń uıytqy bolýymen odaqtyń Jambyl, Qyzylorda, Túrkistan oblystyq, Shymkent qalalyq fılıaldary jáne «Medıakratııa» qoǵamdyq birlestigi arasynda birlesken memorandýmǵa qol qoıyldy. Forýmǵa qonaq retinde qatysqan Qazaqstan Jýrnalıster odaǵy basqarmasynyń tóraǵasy Seıitqazy Mataev tirshiligi qaınaǵan tilshiler qaýymyn bereke-birlikke shaqyryp, eldik múdde jolynda eńbek etýge shaqyrdy. Jýrnalıster odaǵyna múshelikke qabyldanǵan birqatar áriptesterge múshelik kýálikti tabys etti.
TÚRKISTAN
