Elimizdiń shekaralyq aımaqtarynda halyq sanynyń jyl saıyn azaıyp, mektepterdiń jabylyp jatqanyn, memleket tarapynan shuǵyl sharalar qabyldanbasa shekara boıyna ıen qalý qaýpi tónip turǵandyǵyn gazetimiz buǵan deıin birneshe márte kótergen edi. Jaqynda Memleket basshysy Qasym-Jomart Toqaev Shyǵys Qazaqstannyń shekaralyq aımaǵynda oryn tepken myńnan astam turǵyny bar Kúrshim aýdanynyń eń ózekti máselesine nazar aýdaryp, Úkimetke oblys ákimdigimen birge Buqtyrma sý qoımasyna kópir salý úshin qarjy bólý máselesin qarastyrýdy tapsyrǵan bolatyn.
Shyraıly ólke, shuraıly meken Shyǵys Qazaqstannyń Kúrshim-Marqakól, Katonqaraǵaı óńirlerinde sońǵy 30 jyl muǵdarynda halyq sany eki-úsh esege deıin azaıyp ketkeni kópshilikke belgili. Osy rette kezinde tarap ketken aýdandardy qaıta qalpyna keltirý jóninde jergilikti turǵyndar tarapynan az usynystar aıtylyp júrgen joq. Mundaı usynys keshe, 28 qazanda kúrshimdik-marqakóldik aqsaqaldardyń oblys ákimi Danıal Ahmetovpen kezdesýi kezinde de aıtylǵanymen aımaq basshysy shekaralyq aýdandy damytýǵa qatysty óz josparyn feısbýk jelisindegi paraqshasy arqyly jetkizdi.
«Qazirgi tańda jyl saıyn turǵyndarynyń sany azaıyp bara jatqan shekara mańyndaǵy aýyldardyń máselesi óte ózekti ekeni belgili. Bul jaǵdaı Tarbaǵataı, Katonqaraǵaı aýdandaryna da qatysty. Bolashaǵy joq aýyldar qatary, ásirese, Kúrshim aýdanynda kóp. Aqsaqaldar Marqakól aýdanyn qaıta qurýdy usyndy. Alaıda ol úshin 9 mlrd.teńge qajet. Sondyqtan aýdandy qalpyna keltirgennen buryn bul qarajatty turǵyndardyń ómir sapasyn jaqsartýǵa jumsaǵan abzal. Bir aıdyń ishinde biz Kúrshim aýdanynyń shekara mańyndaǵy aýyldyq okrýgterin damytýǵa baǵyttalǵan besjyldyq baǵdarlama jasaımyz. Ony aýdan turǵyndary men aqsaqaldardyń aldynda qorǵaımyz. Josparǵa ınfraqurylymdy qalpyna keltirý, aýylsharýashylyq, kásipkerlik, bilim men densaýlyq salalaryn damytý jumystary kiredi. Sondaı-aq, jańa jumys oryndary ashylady» degen oblys basshysy jaqyn arada el Úkimetinde Buqtyrma sý qoımasy arqyly ótetin jańa kópirdiń qurylysyna qajetti bıýdjetti qorǵaý jospary turǵanyn da tilge tıek etti.
О́SKEMEN
