Ýnıversıtet janynan ashylǵan múmkindigi mol zerthana Qazaqstannyń Ulttyq akkredıtteý ortalyǵynda akkredıtteldi. Munda 10 element boıynsha topyraq taldamasy jasalady. Atap aıtqanda, azot, fosfor, kalıı, kúkirt, gýmýs jáne basqa da elementter boıynsha taldaý jasalady. Taldaý quny eýropalyq, amerıkalyq jáne otandyq zerthanalarǵa qaraǵanda tómen. Zerthanaǵa qajetti zamanaýı jabdyqtardy satyp alýǵa Germanııanyń Gannover ýnıversıteti grant bólgen.
Ýnıversıtet rektory Aqylbek Kúrishbaevtyń aıtýynsha, qazirgi tańda mundaı zerthana elimizdiń aýyl sharýashylyǵy salasyna asa qajet ekeni anyq. Buǵan deıin dıqandardyń egis alqabyndaǵy topyraq quramyn zertteýge múmkindigi bolmaǵan. Sonyń saldarynan topyraqtyń qunary tómendep, shyǵym kólemi kúrt kemip ketti. Zerthana mundaı keleńsizdiktiń aldyn alýǵa septigin tıgizbek.
«Mundaı eýropalyq talaptarǵa saı zerthana elimizde tuńǵysh ret ashylyp otyr. Keleshekte olardyń sanyn kóbeıte berýimiz kerek. Sebebi onyń aýyl sharýashylyǵy taýaryn óndirýshiler úshin mańyzy zor. Sondaı-aq ýnıversıtet qabyrǵasynda iske qosylǵany stýdentter, magıstranttar, doktoranttar úshin óte úlken jetistik», dedi rektor.
Topyraqty ósimdiktiń qorektik elementterimen qamtamasyz etý – aýylsharýashylyq taýar óndirýshiniń basty mindeti. Biraq ony anyqtaý úshin zertteý jumystary qajet. Al zertteý júrgizý ýaqyt pen qarjylyq josparlaýǵa baılanysty qıynǵa soǵyp otyrǵany belgili. Endi bul olqylyqtyń orny tolady deıdi ýnıversıtet basshylyǵy.
«Sońǵy 15 jylda jazdyq bıdaıdyń ónimi Aýstralııada 30-40 paıyz kóbeıgen. Al Reseıde 34 paıyz kóbeıdi. Al bizdiń soltústik óńirlerde atalǵan kórsetkish 14 paıyzǵa ǵana ulǵaıdy. Onyń bir sebebi – jer qunarynyń tómendeýi. Al topyraqtyń qunaryn joǵaltpaý úshin bizge topyraqty zertteıtin zamanaýı zerthanalar qajet. Búgin bizdiń oqý ornymyzdyń janynan ashylyp otyrǵan zerthananyń basty ereksheligi – topyraq quramyn sońǵy úlgidegi qurylǵylar arqyly zertteýmen shektelmeı, naryqta jumys istep jatqan fermerlerge de qyzmet kórsetemiz. Buryn otandyq fermerler topyraq taldamasyn bilý úshin Amerıka men Eýropanyń zerhanalaryna júginetin», deıdi A.Kúrishbaev.
A.Kúrishbaevtyń aıtýynsha, sońǵy 4 jylda Qazaq agrotehnıkalyq ýnıversıteti shetelden 2 mlrd teńge ınvestısııa tartqan. Bul qarajat túrli qurylǵy satyp alýǵa jáne qyzmetkerlerdi shetelde oqytý úshin alynǵan.
