Bul aksııanyń maqsaty ulttyq mádenı muralardyń jalpy halyqqa qoljetimdiligin qamtamasyz etýge baǵyttalǵan. Ásirese, ol jastar sanasyna ulttyq tarıhtan tereń habar beredi. Sonymen birge ol mádenıet pen óner salasynda memleket tarapynan bolyp jatqan is-sharalarǵa qazaqstandyqtardyń nazaryn, azamattarǵa «Rýhanı jańǵyrý» jáne «Uly dalanyń jeti qyry» baǵdarlamalary týraly birshama aqparat berýdi maqsat etken. Eksponattarmen tanysýdyń ózi tarıhtyń qyzyqty sıýjetteri, kvest, vıktorınalar, master-klastar, ekskýrsııalar arqyly ótip, jastardy jalyqtyrmaıtyn, kerisinshe qyzyǵýshylyǵyn týdyratyn is-sharalar arqyly júrgiziledi.
«Abylaı han rezıdensııasy» mýzeı kesheninde sherý aldymen ekskýrsııamen bastalyp, odan ári qaladaǵy S.Muqanov atyndaǵy mýzykalyq drama teatry ónerpazdarynyń qoıylymymen jalǵasty. «Abylaı hannyń Reseı elshisimen kezdesýi» atty bul qoıylym hannyń ómiri men qaıratkerlik, dıplomattyq qyrlarynan syr shertti. Qazaq dalasyna entelep enip kele jatqan patshanyń ekspansııasyn toqtatýdy oılaǵan hannyń ádis-aılasy, amal-tásilderi birshama kórinis tapty. Al «Ǵasyrlardan jetken tarıh» kvest oıyny boıynsha jınalǵan jastar Abylaı hanǵa tikeleı «suraqtar qoıý» múmkindigine ıe boldy. M.Qozybaev atyndaǵy memlekettik ýnıversıtettiń stýdentteri bul oıynda ásirese úlken belsendilik kórsetti. «Serpin» baǵdarlamasymen oqyp jatqan jastar arasynan Raıymbek Babash, Nurdáýlet Tastan jáne t.b. hanǵa «tikeleı suraqtar» qoıyp, ózderin tolǵandyrǵan máselelerge jaýap aldy. Oıyndardyń bári mýzeı eksponattaryn qoldaný, dýlyǵany basqa kıip, qylyshty belge ilýimen qyzyqty boldy. Sonymen birge oıyndarǵa belsendi qatysýshylarǵa syılyqtar berildi. Odan ári kesh «Karaoka» kafesinde jalǵasyp, jastardyń búgingi talǵamyna jaýap berdi. Mýzeı keshi 21.00-de bastalyp, tańǵy 03. 00-ge deıin jalǵasty.
Mýzeı dırektorynyń orynbasary Ásemgúl Qydybekova halyqtyń kóp jınalǵanyna, ásirese jastardyń úlken qyzyǵýshylyq tanytqanyna rıza bolǵanyn jetkizdi. «Sharanyń osynsha aýqymdy, qyzǵylyqty bolǵanyna ózimiz de tańǵaldyq. Áýeli onyń sátti bolatynyna kúdikpen qaraǵan edik, biraq bári de óte kóńildi shyqty. Jastardyń qazaqtyń tarıhyna degen qyzyǵýshylyǵy bizdi tánti etti», dedi ol.
Sóıtip «aıly túnniń aıasynda» degen jalpy ataý alǵan mádenı shara sáttilikpen aıaqtaldy.
PETROPAVL
