Qazaqstan – EKOSAI prezıdenti

Álem • 31 Qazan, 2019

Qazaqstan – EKOSAI prezıdenti

Túrkııa astanasy Ystanbul qalasynda ótken Ekonomıkalyq yntymaqtastyq elderiniń joǵary aýdıt organdary uıymdarynyń VIII assambleıasynda Qazaqstan EKOSAI prezıdenti bolyp saılandy.

Egemen Qazaqstan

Bul elimiz úshin jaýapty ári qurmetti mıssııa. Iаǵnı Qazaqstannyń halyqaralyq arenadaǵy bedelin nyǵaıtýǵa múmkindik beredi jáne sheteldermen áriptestik baılanystardy keńeıtýge yqpal etedi.

21-23 qazan aralyǵynda ótken assambleıaǵa elimizdiń Esep komıtetiniń tóraıymy Natalıa Godýnova bastaǵan delegasııa qatysty. Sondaı-aq assambleıa aıasynda 8-sımpozıým jáne basqarma keńesiniń 24-otyrysy ótkizildi. Assambleıa jumysyna Aýǵanstan, Ázerbaıjan, Belarýs, Iran, Qazaqstan, Qatar, Qyrǵyzstan, Kýveıt, Pákistan, Palestına, Tájikstan, Túrikmenstan jáne Túrkııadan kelgen 13 eldiń joǵary aýdıt organdarynyń ókilderi qatysty. Kún tártibiniń negizgi taqyryptary retinde «Aýdıt júrgizýdiń tıimdiligi jáne aýdıtorlyq tekserýlerdiń nátıjeliligi» jáne «Memleket-jekemenshik áriptestigi uıymdarynyń tıimdi aýdıti» tańdaldy.

EKOSAI Bas hatshysy Djavaıd Djehangır 2016-2018 jyldary júrgizilgen jumystyń nátıjeleri týraly habardar etti. Irannyń jáne Tájikstannyń JAO usynǵan Aýdıt jónindegi komıtettiń EKOSAI esepterin aýdıtorlyq tekserý esepteri, EKOSAI-dyń trenıngtik komıtetiniń 19-otyrysynyń esebi jáne 2018-2021 jyldarǵa arnalǵan bıýdjet qaralyp, bekitildi. Sonymen qatar uıymnyń negizgi basymdyqtary talqylandy jáne EKOSAI-dyń 2019-2022 jyldarǵa arnalǵan oqý jospary bekitildi.

Elimizdiń Esep komıtetiniń tóraıymy Natalıa Godýnova assambleıanyń negizgi taqyryby boıynsha baıandama jasady. Ol memlekettik aýdıtti damytýdyń negizgi baǵyttary týraly aıtyp, memlekettik aýdıttiń qarjylyq baqylaýdyń ulttyq júıesin jetildirý boıynsha Qazaqstannyń tájirıbesimen bólisti.

«2015 jyly qabyldanǵan «Memlekettik aýdıt jáne qarjylyq baqylaý týraly» zań respýblıkalyq bıýdjet jobasyn shyǵystardyń negizgi baǵyttary boıynsha aldyn ala baǵalaý, bıýdjettiń atqarylýyn jáne Memlekettik josparlaý júıesi qujattarynyń iske asyrylýyn aǵymdaǵy baǵalaý, memlekettik boryshty basqarýǵa aýdıt júrgizý jáne basqa da birqatar baǵyttar boıynsha ókilettikterdi bere otyryp, Esep komıtetiniń fýnksııalaryn edáýir keńeıtti. Osyny eskere otyryp, bizdiń jumysymyzdyń basty baǵyty tıimdilikti taldaý jáne onyń ósýine arnalǵan rezervterdi anyqtaý, sondaı-aq aldyn alý sharalaryn qoldaný boldy», dedi Qazaqstannyń Esep komıtetiniń basshysy.

Sondaı-aq Natalıa Godýnova Qazaqstan Respýblıkasynyń Parlamenti bıylǵy bıýdjet qarajaty men memleket aktıvterin tıimsiz josparlaǵany jáne paıdalanǵany úshin memlekettik organdardyń laýazymdy adamdarynyń jaýapkershiligin qatańdatý bóliginde qoldanystaǵy zańnamany ózgertý jónindegi Esep komıtetiniń bastamasyna qoldaý bildirgenin atap ótti.

«Bizdiń oıymyzsha, atalǵan ózgeristi qabyldaý aýdıtorlyq tekserýlerdiń nátıjeliligine jaǵymdy áser etedi jáne eldegi bıýdjettik josparlaý saıasatyn aıtarlyqtaı ózgertedi. Sonymen qatar aýdıtorlyq tekserýlerdiń nátıjeliligine sapany baqylaý júıesi de mańyzdy áser etedi», dedi ol.

EKOSAI-dyń Trenıngtik komıtetiniń 19-otyrysy barysynda EKOSAI-dyń 2019-2022 jyldarǵa arnalǵan daıyndaý baǵdarlamasy aıasynda 2021 jyly Qazaqstanda «Memlekettik boryshqa aýdıt júrgizý» oqý baǵdarlamasyn ótkizý týraly sheshim qabyldandy.