Aımaqtar • 04 Qarasha, 2019

Atyraýda qoǵamdyq kólikke jolaqy tóleý 85% elektrondy túrde júrgiziledi

66 retkórsetildi

Bul týraly Ortalyq kommýnıkasııalar qyzmetinde ótken brıfıngte Atyraý oblysynyń ákimi Nurlan Noǵaev aıtty.

Aımaq basshysynyń aıtýynsha, qoǵamdyq kóliktegi jol aqysyna engizilgen dıfferensııalanǵan tarıf tıimdiligin kórsetken.

- О́tken jyldyń qazan aıynda «Sıfrly Qazaqstan» memlekettik baǵdarlamasy aıasynda Atyraýda elektrondy bıletteý júıesi qanatqaqty jobasy engizildi. 11 qazanda jol aqysyn tóleý júıesin elektrondy túrge aýystyrý úshin dıfferensııalanǵan tarıf iske qosyldy. Qazir qoǵamdyq kóliktegi jol aqysyn tóleý  85% elektrondy túrde júrgiziledi dep senimmen aıtýǵa bolady, - dedi ákim.

Nurlan Noǵaevtyń sózinshe, elektrondy bıletteý júıesi tıimdiligin kórsetken, bolashaqta qolma-qol aqshany kóleńkeli aınalymnan shyǵarýǵa, sonymen qatar, jolaýshylar leginiń naqty mólsherin anyqtaýǵa, bıýdjetke salyq túsimderin kóbeıtýge, tasymaldaýshylardyń tabysyn arttyrýǵa múmkindik beredi, ol óz kezeginde avtoparkterdiń avtobýstar quramyn, materıaldyq-tehnıkalyq bazasyn jańartýǵa, jolaýshylar tasymaly salasyndaǵy mamandardyń eńbekaqylaryn, qyzmet kórsetý deńgeıin kóterýge jol ashady.

Eske salsaq, aımaqta qoǵamdyq kólik qatynasyn damytýdyń 2020 jylǵa deıingi tujyrymdamasy iske asyp jatyr. Baǵdarlama aıasynda Atyraýda 160 jańa avtobýs alyndy, keler jyly taǵy da 170 dana avtokólik alynady, qazir Semeı qalasynda daıyndalyp jatyr. Búginde Atyraý qalasynyń turǵyndary 120 myń jolaqy kartasyn aldy.

Aıta keteıik, Atyraý Astana men Almatydan keıingi dıfferensııalanǵan tarıf pen elektrondyq bıletteý júıesi engizilgen Qazaqstandaǵy úshinshi qala.

Sońǵy jańalyqtar

Uqsas jańalyqtar