«Astana» alty dúrkin chempıon

Sońǵy týrǵa deıin chempıon­dyq­qa talasqan elordanyń «Asta­na­sy» syrt alańda «Tobyl­dy» jeńip, alty dúrkin el chempıony atansa, qatarlas ótken kezdesýde elordalyqtardy ókshelep kele jatqan Almatynyń «Qaıraty» Pav­lodarǵa qonaqqa baryp, «Er­tis» klýbynan ońbaı utyldy. Sóıtip maýsym aıaqtalýǵa bir týr qalǵanda «Qaırat» chempıondyq ataqtan úmitin úzip, qatarynan besinshi ret kúmis júlde ıelendi. Premer-lıga erejesi boıynsha chempıon komanda anyqtalatyn týrlarda barlyq oıyn bir ýaqytta bas­talady. О́ıtkeni matchtar ártúr­li ýaqytta bastalyp, erte aıaq­­ta­lyp qoıǵan oıynnyń esebi, ke­ıin ótetin matchtyń taǵdyryna ás­er etpeýi kerek. Mysaly, «Qaı­rat» «Astanadan» bir saǵat er­te oınap, «Ertisten» jeńilip qalǵan bolsa, bir saǵat keıin bastalǵan «Tobyl» – «Astana» arasyndaǵy kezdesý teń eseppen aıaqtalýy da múmkin edi.

Jalpy chempıonattaǵy ár týr úsh upaı úshin bolǵan soń matchtar tartysty ótedi. Biraq chempıonattaǵy eń tartysty týr osy – 32-týr boldy dep aıta alamyz. О́ıtkeni bul týrdaǵy «Tobyl» – «Astana» matchy eki komanda úshin de mańyzdy boldy. «Tobyl» jeńiske jetse, kelesi jyly Eýropa lıgasynyń irikteý kezeńine joldama berýshi úshinshi oryndy ıelenetin edi. Al «Shahter» men «Qaırat» matchy aıtpasa da túsinikti. Sondaı-aq «Atyraý» men «Ordabasy», «Taraz» ben «Qaısar» arasyndaǵy match ta bul týrdyń mańyzdy oıyn­­dary bolyp esepteldi. «Aty­­raý» men «Taraz» Premer-lı­ga­­da jan saqtap qalýdy oılasa, «Or­dabasy» úshinshi oryn úshin kú­re­sýde. Al upaı taratyp júrgen «Qaısarǵa» báribir. Birinshi lıgaǵa túsip qalǵan «Aqtóbe» óz jankúıerleriniń aldynda jeńil­meı, tek jeńis úshin oınaıtyny belgili. «Oqjetpes» pen «Jetisý» ózderiniń jeke nátı­je­sin jaqsartý úshin baryn salary anyq edi.

Sonymen oıyndarǵa jeke-jeke toqtalyp ótsek. «Tobyl» men «Astana» arasyndaǵy oıyn­da qaısy bir komanda basym bol­dy dep aıta almaımyz. Eki komandada da gol soǵatyn birne­she múmkindik boldy. Tek «Astana» oıynshylary ózderine beril­gen bir ǵana múmkindikti tıim­di paıdalanyp, alań ıele­ri­nen jeńisti julyp aldy. Jal­ǵyz goldyń avtory Iýrıı Logvınenko bıyl «Astanaǵa» altynshy chempıondyqty alyp berdi. Sondaı-aq ol ótken týrda aǵylshyndyq fýtbolshy Ýeıın Rýnı sekildi qaıshy ádisimen «Oqjetpes» qaqpasyna tamasha gol soǵyp, sol týrda da komandasyna mańyzdy úsh upaı syılaǵan bolatyn.

Pavlodarda ótken oıynda shynyn aıtý kerek, «Qaırattyń» joly bolmady. «Ertis» qaqpasyna qansha shabýyldaǵanymen, dop qaqpaǵa kirmeı qoıdy. Jal­py Almatynyń komandasy «Ertis­ten» sońǵy ret 2002 jylǵy chempıonattyń birinshi týrynda iri eseppen jeńilgen eken. Sol oıynda «Ertis» oıynshylary «Qaırat» qaqpasyna jaýapsyz 4 gol soqqan bolatyn. Mine, araǵa 17 jyl salyp «Ertis» 2002 jylǵy rekordyn jańalap, 5:0 esebimen «Qaıratty» oısyrata jeńdi. Bir qyzyǵy, bul matchtaǵy birinshi goldy «Astananyń» «Ertiste» jalda júrgen oıynshysy Sultan Saǵynaev soǵyp, esepti ashyp berdi. Ekinshi taımda Jeremı Manzorro, Mılosh Stamenkovıch, Arman Keńesov jáne Karlos Fonseka bir-bir goldan soqty.

32-týr oıyndary bastalmaı turyp, beıresmı derekkózderdiń málimeti boıynsha, eger «Ertis» komandasy «Qaıratty» jeńetin bolsa «Astana» basshylyǵy Pavlodar komandasynyń oıyn­shy­laryna 150 myń AQSh dollary kóleminde syıaqy berýge ýáde etipti-mys. Al «Qaırat» basshylyǵy «Tobyl» fýtbolshylaryna «Astanany» jeńetin bolsa dál joǵarydaǵydaı kólemde qarjylaı syıaqy beretinin aıtqan kórinedi. Onsyz da úshinshi oryn úshin talasqan «Tobylǵa» mundaı syıaqy qosymsha kúsh bere almady, al Bi­rin­shi lıgaǵa túsip qalý qaýpi bar «Ertis» úshin «As­ta­nanyń» usynysy pavlo­darlyq fýtbolshylardy qamshy­laı túsken sııaqty.

Úshinshi orynǵa talasyp jatqan Shymkenttiń «Ordabasy» komandasy syrt alańda «Aty­raý» komandasyn 3:1 esebimen jeńip, chempıonattyń qola júl­desi úshin «Tobylmen» ara­daǵy máseleni sheship qoı­ǵan­­daı. О́ıtkeni kelesi týrda «Or­da­ba­sy» taǵy bir Premer-lıgadan shyǵyp qalý qaýpi bar «Taraz» komandasymen oınaıdy. Eki Ońtústik komandasyna bir upaı jetkilikti, ekeýine jeńis te, jeńilis te kerek emes. Sondyqtan «Ordabasy» bıylǵy úzdik úshtikti qorytyndylady dep aıta berýge bolatyn shyǵar.

Al «Taraz» bul týrda Qyzylordanyń «Qaısar» koman­da­symen oınap, 2:1 esebimen jeńiske jetti. Taldyqorǵannyń «Jetisý» klýby Kókshetaýda «Oqjetpes» komandasymen 1:1 nátıjesimen teń tústi. Bul kezdesý osy týrda upaı úshin emes, ózderiniń jeke kezdesýdegi kórsetkishteri úshin ǵana oınaǵan jalǵyz match boldy. Sondaı-aq áldeqashan Birinshi lıgaǵa túsip qalǵan «Aqtóbe» óz alańynda Qaraǵandynyń «Shahterin» qabyldap, jankúıerlerine tamasha jeńis syılady. О́ıtkeni bul «Aqtóbeniń» óz alańynda oınaǵan Premer-lıgadaǵy sońǵy oıyny bolatyn. Tartysqa toly ótken matchta alań ıeleri 3:2 esebimen qarsylastarynan basym tústi.

Sondaı-aq Birinshi lıgada jeńimpaz atanǵan Petropavldyń «Qyzyljar» komandasy men ekinshi oryn ıelengen Aqtaýdyń «Kaspıı» komandasy kelesi jyly Premer-lıgada oınaýǵa múmkindik aldy.

Aldaǵy jeksenbi kúni chempıonat­tyń sońǵy 33-týr oıyn­dary ótedi. Bul týrda «Astana» – «Ertis», «Jetisý» – «Shahter», «Qaırat» – «Atyraý», «Qaısar» – «Oqjetpes», «Ordabasy» – «Taraz» jáne Tobyl» – «Aqtóbe» komandalary kezdesedi.