Tanymdyq oıyndy Mahambet ýnıversıtetiniń fılologııa fakýlteti stýdentteri uıymdastyrǵan. Saıysqa ýnıversıtet stýdentterinen quralǵan «Bolashaq», «Jas qyran», «Jibek», «Kometa», «Bilgirler», «Samǵaý» atty 6 komanda qatysty.
– Oıynnyń maqsaty – Abaı ómiri men shyǵarmashylyǵyn jas urpaqqa nasıhattaý, til mádenıetin kóterý, talapty, talantty jastardy tabý bolatyn. Oıynǵa qatysýshylarǵa jol kartasy berildi. Osy karta boıynsha komandalar birinshi bekette Abaı ánderin oryndasa, ekinshi bekette Abaıdyń óleńderin jatqa oqydy. Úshinshi bekette hakimniń shyǵarmashylyǵynan túrli suraq qoıylsa, tórtinshi bekette aqyn ómiri men ol týraly zertteý eńbekterinen saýaldar berildi. Sońǵy, besinshi bekette oıynǵa qatysýshylar Oral qalasynyń ortalyǵynda oryn tepken Abaı eskertkishiniń janynda fotosýretke tústi, – deıdi osy tanymdyq oıyndy uıymdastyrýshylardyń biri, ýnıversıtettiń fılologııa fakýltetiniń 3-kýrs stýdenti Aıajan Qýanysheva.
Qazylar alqasy saıysta tapqyrlyq pen jedeldik tanytqany úshin ýnıversıtettiń mádenıet jáne óner fakýlteti stýdentterinen qurylǵan «Jibek» komandasyna 1-oryn júldesin tabystady. Ekinshi oryn fılologııa fakýltetiniń «Samǵaý» komandasyna, úshinshi júlde jaratylystaný-geografııa fakýltetiniń «Kometa» komandasyna buıyrdy. Oıyn jeńimpazdary arnaıy dıplomdarmen jáne estelik syılyqtarmen marapattaldy.
Batys Qazaqstan oblysy
