Otandyq kınematografııa men teatr sahnasynda shoqtyǵy bıik áıelder obrazyn qalyptastyrǵan talantty óner sańlaǵymen qoshtasýǵa kelgen halyqtyń qarasy qalyń boldy. Qaraly jıyndy ashqan teatr dırektory, Qazaqstannyń eńbek sińirgen qaıratkeri Azamat Satybaldy aıaýly janmen qoshtasýǵa kelgen qaýymǵa kóńil aıtyp, kórnekti aktrısa týraly az-kem tolǵanysyn bildirdi.
«Raısa Májıtqyzy sanaly ǵumyryn qazaq ónerine arnady, teatr men kıno kórermenderi úshin sulýlyqtyń sımvoly boldy. Kınoda jasaǵan árbir obrazy kórermenniń kóz aldynda qaldy. Sahnadaǵy, ekrandaǵy tamasha beınelerimen kórermenniń júregin jaýlaı alǵan sırek daryn ıesi ekenin ónersúıer qaýym tolyq moıyndady. Osy beınelerdi kórip ósken ózinen keıingi býyndaǵy jas qyzdar men jigitter oǵan eliktedi, boı túzedi. О́zi súıikti jary, serigi, balalarynyń ákesi bolǵan Ǵabıt Músirepov atyndaǵy teatrda tabanynyń izi, júreginiń úni qaldy. О́nerde asqaq boldy, bıik boldy» dedi teatr dırektory.
Budan ary qaraı aza tutý rásimin Nur-Sultan qalasynan arnaıy kelgen resmı ókil, belgili qoǵam qaıratkeri Mádı Ádıuly júrgizdi. Ol aldymen Prezıdent Qasym-Jomart Toqaevtyń kóńil aıtý jedelhatyn oqyp berdi.
«Belgili mádenıet qaıratkeri, teatr jáne kıno ártisi Raısa Májıtqyzy Muhamedııarovanyń dúnıeden ótýine baılanysty aýyr qaıǵylaryńyzǵa ortaqtasyp, kóńil aıtamyn. Raısa Májıtqyzy uzaq jyldar boıy teatrda óner kórsetip, keıipkerlerdi asqan sheberlikpen sahnaǵa shyǵara bilip, kórermen qaýymnyń ystyq yqylasyna bólendi. Sondaı-aq kórkem fılmderge túsip, kóptegen basty rolderdi somdady. Onyń esimi men jarqyn beınesi ónersúıer qaýynyń júreginde máńgi saqtalady. Marqumnyń jany jánnatta, ımany salamat bolsyn» delingen Prezıdenttiń jedelhatynda.
Mádı Ádıuly marqumnyń týǵan-týystary men azaly jıyn qatysýshylaryna Parlament Senatynyń tóraǵasy Darıǵa Nazarbaevanyń, Mádenıet jáne sport mınıstri Aqtoty Raıymqulovanyń kóńil aıtý jedelhattaryn oqyp berdi.
«Án shaqyrady», «Meniń atym Qoja», «Naızatas baýraıynda» sııaqty esten ketpes eleýli fılmdermen kórermen mahabbatyna bólengen aktrısa budan ózge de 30-ǵa tarta kınofılmge túsip, arý qyzdar men aq jaýlyqty analar obrazy arqyly tanymal teatr tarlanyna aınala bildi. Qazaq óneriniń damýyna súbeli úles qosqan Raısa Májıtqyzynyń qaıtys bolýyna baılanysty onyń ónerdegi eńbegin zor baǵalaı otyryp qaıǵyly kóńilin bildirgen jedelhattar Almaty jáne Nur-Sultan qalasynyń ákimderinen de kelip tústi. Almaty qalasy ákiminiń kóńil aıtý jedelhatyn Til basqarmasynyń basshysy Mamaı Ahet pen Nur-Sultan qalasy ákiminiń jedelhatyn Q.Qýanyshbaev atyndaǵy Qazaq memlekettik drama teatrynyń dırektory Ashat Maemırov oqyp berdi.
Qoshtasý rásiminde belgili kınorejısserler Satybaldy Narymbetov, Bolat Qalymbetov, Qazaqstannyń halyq ártisi Roza Áshirbekova óner sheberimen birge júrip qyzmet istegen jyldaryn eske alyp, onyń jaısań minezi men jaqsy qasıeti týraly jyly lebizderin aıtty.
Qaraly jıyn sońynda marqumnyń denesi «Keńsaı-2» zıratyna jerlenetini jóninde habarlandy.
ALMATY
